MIZOTE LEH BAWLHHLAWH

Kan ram (Mizoram) hi India ram State hrang hrang zingah chuan leimin tuar nasa pawl kan ni hial awm e. Hei hi a chhan ni bera lang chu BAWLHHLAWH PAIH chungchangah fimkhurna chang kan hriat loh vang a ni ber awm e. Ruah tui a tam chang phei chuan leimin nasa tak avangin nunna hlu tak chan hial an awm ṭhin mai bakah, kan buai thei ṭhin hle a nih kha. He khuarel chhiatna lo thleng ṭhin buaipui hian a bikin Mizorama kan tlawmngai pawl lian ber, YMA mi leh sa te chhanchhuahna hna thawka ṭanpui ngai apiangte ṭanpui hna thawka kan han che chhuak ṭhin leh, sawrkar lamten an theih ang tawkin an hmanrua neih ṭhat ang angte thawh chhuahpuiin leimin avanga chhiat tawkte buaipui hna thawka an che chhuak han hmuh hian a thlamuanthlakin a lawm awm tak zet a ni.

Leimin hi Mizoramah chuan ruah tui a tlak dan azirin kan tuar nasain kan tuar nep deuh niin a lang. Leimin hi chhan hrang hrang avangin a min a,tuihawk luanna turah Bawlhhlawh a tam ṭhin avangte, a hrana tuihawk luanna tur siam ṭhat tawk loh avangte leh tuihawk a luanna tur ni lo kawng dung velah tui a luan nasat ṭhin avangte hian, Mizoram hian leimin nasa takin kan tawrh phah ṭhin a ni.

Mizoramah hian hetiang em ema leimin a tamna chhan nia lang chu ni tina bawlhhlawh neih paih fimkhur loh vang leh kan ngaihsam lutuk ṭhin vangte hi a ni hial awm e. Ni tina bawlhhlawh neih ṭhinte hi chhungkaw ṭhenkhatte chuan an ṭhenawmten harsatna an tawk ang tih ngaihtuah miah lova mahni in bula bawlhhlawh paih duh maite hriat tur la awm ṭhin hian, inenfiahna tur leh insiamṭhatna tur tam tak an la nei tih a chiang hle mai. YMA-te VC te leh LC lamten he lai hmunah hian Bawlhhlawh paih phal loh tih an tar hmu reng chungin a ruka bawlhhlawh paih lui an awm ṭhin avang hian, khawtlangah leimin avangin chhiatna nasa tak a thlen ṭhin a, bawlhhlawh kan paih danah kan fimkhur thar a, kan khawtlang hruaituten mahni awmna khua leh veng ṭheuhah bawlhhlawh khawn ṭhin lirthei an ruahmannaah kan Bawlhhlawh neihte paih hram hram ṭhin ila. Bawlhhlawh khawn lirthei luh phak lohnaah kan awm a nih pawn ni tina bawlhhlawh kan neihte ṭhenawm leh khawtlang tibuai lo zawnga kan sawngbawl thiam a pawimawh tak zet a ni.

Ni tina bawlhhlawh kan neihte hi khawiah nge tuiin a len ang a, kan bawlhhlawh neihte hi a ṭawih ral thei chi a ni em tih te hi kan ngaihtuah pha ngai hauh awm lo ve. Nakin zel atan mahni tan a pawi thei em? tih te, kan awmna leh a chhehvel tan hian a him lo tihte phei chu kan ngaihtuah pha hauh lo ang le.

Thingtlang hmun hrang hranga chengte leh Aizawla veng hrang hranga chengte hian, ni tina bawlhhlawh kan sawngbawl danah ṭhenawm khua leh vengte entawn turin hma la thar zel ila. Aizawla Bazar awmna veng a ni emaw, thingtlang lama Bazar awmna vengte pawhin mahni awmna veng Bazar hmun ṭheuhte thianghlim takin enkawl chhunzawm zel ila. Hmun hrang hrang Bazar-a chawhmeh zuarte pawhin mahni hnuhmate mi dangte tih atana kalsan mai lovin, fai tak leh thianghlim takin mahni chawhmeh zawrh ṭhinna ṭheuhte kalsan ila, a lawmawm ngawt ang.

- George L.Ralte