Kum 2024 Kan Thleng!

Kan hunpui Krismas leh Kum thar kan hmang zo, a ṭhente chuan ruai pawh puar peng pawngin kan ṭheh ngei ang, thlarau lam ruai pawh hlim tak leh hlawk taka ṭheh kan awm ṭeuh bawk ka ring. Vawiinah hian tute nge kum thar chu thleng hlawm ta le? Hlep ruk hmang, Pathian thu kawra hmang ṭhin te, mi ṭha tak tak, rinawm tak tak, taima tak tak te kan ni hlawmin ka ring. Pathian hian ang khatin Ni a chhuahtir a, a tlaktir leh ṭhin a ni. Mi ṭha tak, fel tak, dam rei ta mang lo, mi sawi luai luai khawpa rinawm lo, mi ṭha lo tak, malsawmna (?) dawnga hmuingil ta riau te kan hreṭhinin ka ring. Eng nge a chhan ni ang le? Pathian hi a awm tak tak lo a ni ang a? Nge, Pathian hian a lo hriat sual palh hlauh ni ang? Aw le, engpawhnise, vawiina mi zawng te hi chuan kum thar chu kan thleng phawt mai le. Roreltu kan ni lo a, thuneitu pawh kan ni lo ve, Pathian rorel dan lo sawisel ve ngawt mai chu! A thil siamte kan ni a, a tih chi awm lo ve.

2023 Thlir Let Ila – Kan hria ang a, kum khat chhung hian ni tam tak, kar tam tak, a awm a ni. Hetih lai hian ṭhenkhat chuan tukina kan chawhmeh pawh kan hre mumal leh tawh lo vang a. Kum tluan maia kan nundan, tihsual, thil tih ṭhat han hre leh kilh kelh tur chuan a huphurhawm duh mai thei. A hriat awlsam ber tur zingah chuan Sunday school i kai kim em? Kum khat chhung hi rei ve tak a nia. Bible pawh chhiar chhuahna hman zàn a ni a, Thuthlung thar bu tal i chhiar chhuak em? Thuthlung hlui hunah kha chuan uire chu lunga den hlum tur a ni, Isua chuan ngaih chaka melh/rilru pu tawh phawt chu a uire a ni, a ti. Vantlang, kohhran lama hriat si lovin mi nu/pa, i lo uire reng tawh lo maw? Kei pawh hi Pathian, rilru leh thinlung zawng zawng hmu tlangtu hmuhah chuan ka fihlim lo tlat mai. Engpawhnise, hun kal tawh an ni a, koh kir theih tawh loh, siam ṭhat theih tawh loh, inenna'n/darthlalang atan erawh ṭangkai takin kan hmang thei.

Hma Lam Thlir Thung Ila – Kan hriat ṭheuh angin kan hma lam hun second khat, minute khat lek pawh hi kan thu a ni lo va. Tukina chhum zing chuai chuaite kha tlai lamah chuan a lo bo leh vek tawh a, dam ṭha takte pawh kha natna eng emaw takin min man thut thei a ni. Naktukah chuan chu chu ka ti ang, karlehah chuan chu chu ka ti leh ang, kan ti ngawt thei lo. Amaherawhchu, ruahmanna, thlirlawkna ang chite erawh kan siam thei, kan tih tur pawh a ni. Pawimawh tak a ni, mahse, kan hlawhtlintir thei lo ,a ti theitu chu Pathian chauh a ni. Kan dam ang a, kan ni tin hna chi hrang hrangahte eng eng emaw kan tawk leh ang, natna, damlohna, thihna hialte pawh kan tawk mai thei. Hengte hi a hunlai chuan tawrh har/hrehawm tak a ni ṭhin. Kan hriat ve reng tur erawh chu mite pawn an tuar, keimahni chauh kan ni lo, hringnun kalphung, zirlai ṭha tak min zirturtu an ni thei a ni. Sawi tawh angin hma lam hun hi a sawi lawk tak tak theih loh a, hlim tak leh a ṭha thei ang bera hman tum chu duhthusam a ni ngei ang.

Dam Chhung Tawi Té – Mi thiamte chuan khawvel hi kum maktaduai eng emaw zata upa a ni tawh, an ti, hetih lai hian kum eng zat nge a la daih dawn, tih erawh hi chu sawi a harsa khawp ang. Tunah khan kum 45, I ni a, I pian hma khan khawvel hi kum tam tak a lo awm tawh a ni, kum 85, vela thi tur angin lo in-hisap ta la, chumi hnuah pawh chuan khawvel chu kum tam tak a la awm dawn a ni. Khawvela I hun hman chhung chu kum 70/80 vel chu lo ni ta se, a rei i ti nge ti lo aw? A dik tak chuan kan damchhung nite hi a reilo a ni,chhum rei lo té lo langa ral leh ang mai, an tehkhin a ni. Hmm...kan dam chhung chu a rei lo ngei mai, mahse, mite chuan khawvel awm chhunga reh thei tawh lo turin an hming kan chher tlat. Chu'ngte chu mi bik deuhte tih theih chauh a lawm kan tih ka ring. Nia, a ni ngei a, mahse, thamna I lak loh mai khan, pawisa I ziah bo loh mai khan, I Pathian thusawi anga nangmah pawn I tih zel khan, mite thinlungah, ka thinlungah thu a sawi a ni. Kaa sawi hi chu bengah a lut a, lehlamah a chhuak lehnghal a, chetziaa sawi erawh mite thinlungah a riak reng tawh ṭhin.

Thu ṭha tak tak ziah, sawi hi chu kan thiam tlang viauin ka ring, a zawm tak tak, nunpui tak tak tur chuan, mi pangngai lo deuh, mawl, rethei te nih ngam a ngai, khawvela cheng kan ni miau a, a thei leh thiangzau deuhten ngaihhlut leh chawimawi an hlawh zel si chuan, kan khawvel, Zoram khawvel chu, kawtthlera awrawl tawp tawpa hnehna hlado chham vak vak pawh hian awmzia a nei thui hlei thei lo a ni ber mai.

Aw le, kan sawi tum lamah han lut leh ta ila, Krismas leh Kum thar kan hman danah kan lungawi tawk em, result ṭha lo tak nei turah chuan inngai lo ila. Hmang thleng leh thei tur chuan hun rei tak nghah leh a ngai, chu pawh chu engtin nge kan awm dawn pawh kan hre si lo va. Kum thar thutiam neihte hi ṭhenkhat chuan kan ti ṭhin a, a ṭha viau a, mahse, kei hi chuan vawi khat mah ka neih àwm hi ka la hre lo, chutih lai erawh chuan Chung lamin rem a ti zel a nih chuan kum tin Bible chhiar chhuah erawh hi chu ka tum.

Kum thar 2024 chu kan thleng, a lawm nan Chibai vek ule.

- Lalchhandama Colney, Ph - 9862982321