Tute nge MYC leh HPC hotuah awm dâwn ?

ZPM rawn sawrkar phat aṭangin a hrui thlun phelh ang zar zarin hmalakna hrang hrang a kal chho zawt zawt a. Ngaihngam takin sawrkar che vel kan lo thlir a, lung a awi kher mai. Ni 100 chhûnga hmalakna tur hrang hrang te, CBI koh luh theih an han ni ta te, Minister tharte han che vel han hmuh hian, kan sawrkar thar hi awm mai mai a tum lo tih a hmuh theih hle a nih hi. Mipui ṭawiawmna pawh an hmu ṭha rih hle niin a lang bawk.

Chutih mêk laiin Chhim lam mipuite chuan, Lunglei High Power Committee Vice Chairman leh Mizoram Youth Commission Chairman-ah tute nge ruat an nih dâwn tih kan lo thlir reng a. Mahse, tun thlengin MYC leh HPC hotu turte ruat an la ni ta tlat lo hi mak kan ti ta a ni. Pu Duha sawrkarin hna chanpual hrang hrang a sem a, hotu a ruat rual khân HPC leh MYC hotu turte hi a ruat ve nghal mai dâwn emaw kan lo ti a. Mahse, tun thlengin ruat an la ni ta lo hi eng nge a chhan ni ang tih hi kan zawhna a ni ta a ni.

Pu Duhoma sawrkar hian MYC leh HPC hi ṭhiah a tum ta mai em ni? Nge ni a, chhan dang vang zawkin hotu tur a la ruat lo zawk? Thil mak tak a ni ta hrim hrim mai. Tun thlengin titi thangvaah emaw, khawi hmunah mah HPC leh MYC chungchang thu sawi rik a ni ta miah lo mai a. Chhim mipuite hriat hauh loh leh, kan ngaihdan ngaichang hauh lovin ZPM sawrkar hian MYC leh HPC hi ṭhiah a lo tum reng a ni ang a, tih ngaihdan neih loh a har ta hle mai.

MYC leh HPC hnathawh tawhte han thlir kir ta ila. MNF leh Congress sawrkar hnuaiah khân MLA chuangtlaite tâna induhsakna post anga ngaih theih a nihna chen a awm ang. Mahse, HPC bik hi chu Lunglei Dist Planning Board nena thlun zawm a, chak taka Lunglei Dist. hmasawnna hna thawk tura Pu Hawla sawrkar din a ni a. Constitution behchhana Autonomous Dist Council anga din a nih ve loh avangin, Pu Hawla tuk fuh loh ṭuma ṭhiah leh mai theih a ni, an lo tih fiam ṭhin kha thu dik tak a ni.

Mahse, HPC kal tlang hian Lunglei Dist-ah hmasawnna hna tam tak thawh a lo ni tawh ṭhin a. Chutiang bawkin HPC kaltlang vek hian Party induhsakna nasa tak kalpui a lo ni ve tawh tho bawk. Chuti chungin Dist dangte’n an neih ve loh a nih avangin, Lunglei mipuite hian HPC hi kan ngaihlu hle a. Hmasawnna hna piah lamah Sports leh Education thlengin kan ṭangkaipui ṭhin hle a ni. Chutiang deuh bawkin MYC kal tlangin ṭhalai tam takte hma lam hunk al zel dan turah, ruahmanna siam a ni ṭhin a.

Zirna lamah te, eizawnna hna hrang hrang zawn kawngah leh ṭhalaite chawisânna kawng hrang hrang MYC kal tlang hian thawh a lo ni tawh ṭhin a ni. A dik a dik chuan Public Sector Unit (PSU) hrang hrang; MIFCO, ZIDCO etc tih velte ai chuan Zoram ṭhalaite hian MYC hi kan ṭangkaipui zawk hle a ni. MYC kal tlanga Civil Service coaching kalpui ṭhinte hi, a ṭangkaiin zirlai hna zawng mêkte tân a pawimawh êm êm tlat a ni. Chuti chung si chuan, Pu Duhoma sawrkar hian tun thlengin MYC Chairman leh HPC Vice Chairman a la ruat tlat si lova a nih hi!

Tun dinhmunah Lunglei Dist mipuite hian MYC leh HPC ṭhiah hi kan phal hauh lovin a rinawm a. HPC bik phei hi chu kan ngaihlu leh zual tih ZPM sawrkar hian min hriatsak se kan duh hle a ni. He thu ziak hi kan lo hmuh hunah, eng vanga tun thlenga hotu tur la ruat lo nge an nih tih chhanna Lunglei mipuite min pêk ngei kan beisei bawk a ni. MNF leh Congress Ministry hnuaiah khân Lunglei aṭang hian Minister 2 ngei ngeiin kan nei ṭhin a. Nimahsela, ZPM hnuaiah erawh pakhat chauh kan han nei ta a!

Chuti chung chuan Lunglei mipuite kan phunnawi lem lo. Sawrkar thar a nih angin, chak thei ang bera hma a lak theihna turin ruahmanna a siam a nih hi kan ti mai. Chu tah, Lunglei pual bik liau liau HPC Vice Chairman tun thlenga ruat a la ni lo leh zel leh, MYC Chairman pawh ruat a la ni lo hi chu thlir liam mai mai kan harsat ta tlat a ni. Chuvangin, a rang thei ang bera Pu Duhoma sawrkar hian Lunglei mipuite thinlunga hlauhthawnna leh zawhna awm reng hi, a chhanna min han pe thuai turin kan ngenin kan lo thlir reng a ni e.

- Lalremliana Pachuau