POLICE INKAP PALH KHA

Chhiartu zawng zawng te, kumthar chibai ka buk a che u.

Kum 2023 Krismas leh Kum 2024 Kumthar chu ramchhung hmun tinah boruak muanawm tak hnuaiah kan hmang zo dawn nia kan inhriat laiin, Champhai khuaah Police pakhatin sapela an ramvahnaah a ṭhianpa a kap palh a, a hmunah a thi nghal tih thu khan ram pum min nghawng hle mai. An sawizel danin ramhnuai pika inhmu sual palh pawh ni lovin, thlam (riahbuk)-a an chawlh lai silai dah ṭhaa a tung fel turin tipuak palhin, a ṭhianpa hnute bulah a kap a, silaimuin a lung khawihin a hmunah a thi nghal niin an sawi. A va pawi tak em! Vanduaina tawktu nupui fanaute leh a tipalhtu leh a chhungte ṭawngṭaisak an ngai hle mai.

Mi sual, vantlang leh ram tana hnawksak, thil tisual ṭhinte chhui a, mana hremtu tur POLICE kan tih hi a lampum chu, 'Public Officer Legal Investigations and Criminal Emergencies' tihna a ni. Khawvela Police hmasa ber nia an sawi chu BC 3000 khan Aigupta lal Pharaoh khan a ram bial 42, venhim hna thawk turin Police Battalion a din niin an sawi. A pahnihna atan, AD 1611-ah khan Scotland rama Edinburgh-ah din a ni leh chauh a ni. Kan Lal Isua hring chan changa a len laia Police an tihte kha chu, ram venghima enkawltu police ni lovin Temple police mai niin an sawi. India ram bikah chuan, The Indian Council Act of 1861 angin British sawrkar hnuaiah Lord Corwallis khan a din a. Mizoramah chuan kum 1889 khan din niin, Tlabung khua chu Police Station awmna hmasa ber a ni. 21.1.1972 aṭang khan anmahni ruaitu Deptt te enkawlna hnuai aṭangin inrelbawlna hran neia inenkawlin an lo awm ta a ni.

Mizoram Police station in post a neih zat chu 12206 a nih laiin, tuna thawktu a neih mek chu 8634 an ni a, post hnawhkhah ngai hi 3572 nia ngaih a nih laiin heti zat hi a ni chiah em tih erawh hriat a har. An mawza man to zia aṭanga teh chuan thlarau police, a taka awm lo; thla tina hlawh pek ve si lo awm nual mah se, pumpelh kawnga Bus tlantir ang ema thil awm lo chu a ni lo vang. Tuna service kan neih mekte zingah mi fel tak tak ni ṭhin, dinhmun ṭhaa dinga sum hmuh zo ta lo, zua buai mek an awm nual a. Lak an nih hma nun en pawha thawk ṭha thei lo tur chiang sa tam tak, an fit em tichiang tura field-ah vawikhat pawh tlan kual lote, motor khalh thiam miah lo Driver atana lakte leh kum upa tawh lam Pion atan te, Chowkider atan te, hmunphiat atan leh Chawchhum atan tea an lak, zu lo duh ve tak tak te khan an han service a ni a. Chuvang chu a ni ang, Batalion tinah hian Duty tak tak atana rintlak loh hi hlui 3 hlui 4 hi an awm deuh vek a ni. A thawk ṭha thei za rual zette lah chu kum 20 kalta vel aṭang khan an pute in sain kawla ni chhuak chhiarin an inak chhuak bawk si, khawngaihthlak tak an ni. Kan sawrkar thar hian chhui chhuakin titawp thei se a va duhawm em.

Kan police-te hna pui ber tur chu, mipuite hi mi sualte lakah min venghim ang a, ram dang leh state dang mite lakah kan ram an venghim ang a, kan ram thing leh mau, lui dung nungchate leh ramsa sava thlenga khawih chhetu, Dan bawhchhiate chhui chhuak a, mana hrem tur a nih lai a, sapela an ramchhuak leh thihna hial a lo thleng hi a pawi takzet a ni. Vanduaina kan tih tam ber hi dan bawhchhiatnaa inṭan, kan tih loh tawp tur kan tih aṭanga lo thleng an ni.

Hei hian kan ramah dan leh hraiin awmzia a neih lohzia chiang takin a lantir a ni. He thil thleng ṭha lo tak leh inhmeh lo tak hmang hian inbihchiangin inenfiah ang u. Kan ramah hian dan leh hraiin awmzia a neih theih nan leh, hetiang thil rapthlak hi a thlen tawh loh nan kan ram hruaitu thlan tharte hian theihtawpin hma han la se la, mipuiten theih tawp chhuahin support ila, ZORAM THAR KALPHUNG THAR A LO THLENG THEI ANG.

- Pc Muankima