REIEK TLANG LEH A BEHBAWM

Reiekah eng emaw tih tur kan neih avangin ka fapa leh kan nau pakhat nen kan zuk kal a. Hun âwl kan neih deuh avang te, khua a nawm avangte leh ka la kal ve miah loh avangtein Reiek tlanga lâwn ve ka rawt a, kan lâwn ta a lawm!

Ka fapa leh kan nau chu vawi 2/3 ve ve an lo kal tawh a, gate kan pelh chiah aṭangin naupan lai style-in, “Kan thleng teuh tawh em?” tiin ka zawt fiamthu nghal a. An sawi dan chuan darkar khat vela thleng thei tur angah kan inngai a. Kawng chu cement concrete-a siam tura hmalak mek, signboard-a a intàr dan ang chuan March 2024-a zawh tur, cheng nuai 200 chuang man a ni. Lung a inphah a, rah mâm loh niin kal a harsa hle. Kawngpui lung phah, kal harsa em em chu pumpelh kan hmuh apiangah kan pênsan zel a, chho záwnga kal a ni bawk si a, a hahthlak hle.

Pumpelh vawi thumna kan chho chu rin aiin kawngpui kan pawh har ta riau mai a. Kan láwn kan láwn a, kawngpui hmêl a vâng tual tual a, rei tâwk fang kan kal hnu leh thlasik khaw vâwt pawh a lum huam huam, thawk pawh a har ṭalh hnu chuan tlang chhip kan chhuak hlawl mai! Mahse, mi tin sawi Reiek tlang erawh a ni si lo (Tlang chu a ni a, Reiekah pawh a awm ngei chu a ni).

Chawlh ngei ngei a ngai a, kan châwl hahdam, kan han hawi kual chuan kan awmna leh Reiek tlang (tak tak) inkarah chuan tlang dang pakhat a lo la awm a. Kan ti ta sa sa tiin kawng chhuk chho leh khâm leh suar nasa tak kaltlangin, darkar khata thlen inring khan darkar hnih dawn kan kal hnuah Reiek tlang chhip chu kan thleng ve ta a ni. Kal chhung a rei a, a hmun pawh a nawm nen, awm rei vakna hun a awm lawi si lo. Rilrua, 'Ka kal vawi khatna leh kal hnuhnun ber tur' ti rilru chungin khûp zawi hnawk hnawkin khuain min thim chilh nasat lutuk hmain kan chhuk leh ta a ni.

Kan kal lam hian kan bo tih kan inhriat hnu deuh khan ka fapa hian, "Nu, article ṭha deuh i ziah leh nan inspiration tur a nih hi aw," a ti roh a. Kei chuan, "Ka lo ngaihtuah mek tawh asin," ka ti! Amah hian kan kal ṭan dawn a, "Reiek tlang hi chu lâwn ve leh hrim hrim ka duh, a chhan chu kawmthlang lawka awm zawka lâwn lo hian Hmuifang, Sakawrhmuituai tih angreng hla fe fea mi kan pan a, a ropui bik pawh a ni miah si lo a," a tih khan ka rilru a lo kai tho tawh réng tih a hre hauh lo.

Mi tam zawk hian kan bul hnai maia thil awm hi ngaihhlut nachang hre lo hian a hla zawk leh harsa zawka awm hi kan pan fo a lo ni awm asin. Mahni pasal/nupuite aia mi pasal/nupuite felna leh ṭhatna hmu thei riau hian, keimahni puala kan ta hi a(n) mawina leh hlutna kan lo hmuh ṭhelh zawk fo âwm e. Mahni fate theihna lai leh thiamna hre lo lêk hian ‘mi fate’ theihna leh thiamnate hi ṭha zawk emaw tiin kan sawi kan sawi ṭhin em?

Kawng awlsam leh pumpelh kan zawn chhan hi kan taimak tâwk loh vang a nih deuh ber hmel a. Harsatna tawh pawha chhel inzirtir aiin harsatna tawh loh theih dan kan inzirtir uar ta lutuk em a? Kan pumpelh zawnna (harsa pehhêl kan tumna) lamah hian kan tum loh zawkah kan zuang lut a, kan tum ram thleng lovin kan chau hman fo hi a lo ni em? Pumpelh zawnga tlang lâwn; keini nufa pawh kha hmun thengthaw deuh pakhat chu kan thleng ve mai, mahse, kan tum tak erawh a ni si lo!

Khatia hahthikûla chho nawr zawnga muang fahrana ka kal bek bek lai, kawng dik lo zawh tih inhre deuh tawha ka rilru a chauh (rûk) riau lai khan, kan nau chuan tiang hawl tur min siamsak a, hah a chhâwk khawp mai. Chho zawnga kal lai leh hah taka kal laia tiang hawlin mi a chhawk thei ang hian, mi dang tan tiang kan zawnsak ve tawh em? Kawng dik lo zawh leh chau tih kan hriatte hi hnung lam aṭanga an chau kal petek hi nuih mai lovin, an invawn ngheha hma lam an kal theih nan an tan tiang kan ni thei lo a nih pawhin, an tiang hawl tur ngaihtuahsak ila, a va hlu dawn em!

Kan tum tak ni chiah lo, ṭha ve leh nuam ve tho aṭanga kan tum tak thleng tura insan mar hi a bik takin ṭhalaite hian kan mamawh mang e! Nih ve hmel deuh, belhchiana lo ni si lo hi duh tâwk mai lo ang u aw. Tlemin han ṭang leh ila, tlemin han tuar leh hlek ila, kan tum leh kan duh ber hi kan ban phâkah a awm tih theihnghilh lo ang u. Beidawng lova tih hrâm hrâmna hi hlawhtlinna bul a lo ni.

Reiek tlang aṭang chuan kan chhuk leh ta a. Ka tiang hawl chu mi dang mamawh an awm tâkin tiin motor hûnna bulah chuan ka hnutchhiah a. Pên 14,000 chuang hret leh km. 9 kan tei vel tih ka phone-in min hrilh a. In kan thlen chuan nachhâwkna ka ei hial a!

- Dikteii Hnamte