Aizawl thenfai hmasak a ngai

Hmanni chu YouTube channel-ah Michelle Varte music video pakhat Millennium Centre kawta shooting a neihna kha ka en fuh hlauh mai a, a artist piah lamah khan a chhehvela mipui awm dan ka en kual a, chumi karah chuan Millenium Centre bang bal khák tak mai chu ka hmu ta a, ka rilru a khawih khawp mai. Kan zaithiamten an video uluk takin han siam ṭhin mah se, anmahni chei mawi zualtu tur kan ram erawh a fai tawk lo hle mai. India ram faina lamah kan dinhmun chu kan hrechiang ṭheuh a, Aizawl bik hi Mizoram khawpui a nihna angin fai taka kan enkawl hi a ngai takzet mai. Khawpui lun laia waiting shed-ah bawlhhlawh duh tawkin kan paihkhawm nasa hle a, kan bawlhhlawh hi mi chhar fai tur emaw ti tlat hi kan la tam khawp mai.

Pawl hrang hrang leh zirlaiten a huhova Aizawl hmun hrang hrang thenfai hna an bei fo ṭhin, mahse, mi tam zawkin faina an ngaih pawimawh miah loh avangin a hnu lawkah a bal leh mai ṭhin. Mimal tinin kan bawlhhlawh ṭheuh hi thianin paih fai mai ila, tu pawl mah hnathlang vak hi a ngai miah lo vang. Aizawlah ngat phei chuan bawlhhlawh bawm hi hmun tinah kan hung nasa hle a, mahse bawhhlawh a bawma paih nachang hre lo kan la tam hle mai. Hmun khata bawlhhlawh kan paih tawh chuan khami hmunah bawk khan mi dangin an rawn paih ve zel a, a hnu lawkah chuan khawpui timawi lo taktu, hnawmhnawk lian takah a lo chang mai ṭhin. Khawpui fai tak nei tur chuan khaw mite rilru put dan leh chet danin a hril ber a, fai hi changkanna a ni tih hi kan hriat thar leh a pawimawh hle mai.

Mizoten hma kan sawn chho zel a, in leh lo fai tak leh nalh tak neiha khawpui bal taka kal hi a inhmeh lo hle a ni. Mizote incheinaa kan san ang hian faina lamah kan san a ngai takzet tawh. Hetiang chuan ralkhat aṭangin mi nuihzat kan ni palh hlauh ang e. Kan khawpui awm danin a zir lo tih chu kan hre ṭheuh a, kawngpui ana awmte tuichhia hi khawpui lun laia langsar taka paih a ni ṭhin a. Heng bakah hian vantlang inthiarna tam zawk hi a fai lo em em a, syringe hman hnu te, meizial bung, kuhva chhahna hnuhmate chu ngaiah kan nei hial tawk zawk a. Sorkar ṭha kan duh e, kan ti a, roreltute sawisel tur chuan kan inring reng hlawm a, mahse ram kan hmangaihna lantir theihna vantlang thil mahni ta anga enkawl a, uluk leh faina kawngah chuan kan muang leh lawi si. Inenfiah a ṭha khawp mai.

Sorkar office, sikul, damdawi in hrang hrang han en leh ila, inthiarna hman theih loh, tui herh hawna chhia siam ṭhat miah lova dah a tam em em mai a, office ṭhenkhatah chuan tui kan nei lo tih hi a ri zing hle bawk. Damdawi ina inthiarna fai leh thianghlim tak, tui hnianghnar tak phei hi chu a nih dan tur dik tak a ni, damlote hian tui awm lo tihte hi an hre ngai lo tur a ni. Tin, hmeichhe tan ngat phei chuan thla tin hunbi avangin a buaithlak em em ṭhin. Kan sorkar thar hian heng sorkar office mai ni lo vantlang zunina tui herh hawna chhia te, kawngka kalh theih loh te... heng zawng zawng hi siam ṭha vek se ka ti takzet a ni. Tin, hemi piah lamah a hmangtu mipuite pawhin kan ta anga ngaiin heng vantlang inthiarnate hi kan hman pawhin fai taka hman hi kan tih makmawh a ni.

Mizote ngaihsan S. Korea ram hi a fai em em a, khawlaiah hian bawlhhlawh bawm hmuh tur hi a vang khawp mai a, mahse, bawlhhlawh paihna hmunte a nih ngawt loh chuan hmuh tur a vang hle thung. Vantlang zunin a ṭha em em hlawm a, khaw kar kawnga zunin te hi an thianghlimin a ṭha em em hlawm vek mai. Heng hi a nih theih chhan chu mipuite chet fel vang leh sorkarin tui leh a kaihhnawih a ngaihtuah ṭhat vang a ni. Tin, sorkarin faina a ngaih pawimawh em avangin a tifai rengtu tur hi hlawh ṭha thawkhat tak pein an ruai hnem hle bawk, hei hi kan entawn atan ka duh takzet a ni.

Ram a fai chuan a chhunga mipuite kan zahawm a, tin, hriselna atan a pawimawh hle a, faina kawngah hian sorkar hian sum hi a ṭul phawt chuan a sen hreh loh ngei ka beisei. Meizuk chungchangah hian sorkar hmasa tawh hote hmalaknain vantlang hmuna meizu kan tlem tial tial a, hei hi nasa lehzualin chhunzawm zel ila. Khapna kan siam rual hian mei zukna hmun bik hi office leh khawpui remchang laiah siam ila, chumi hmunah chuan meizial bung paihna tur bik siam ila, waiting shed te kan siam ang deuh hian ṭhut hahdamna turte dah tel ila, mei zute pawhin hahchawlh pahin mei an zu thei dawn a ni. Sabji bazar te hi a fai lai ber ni awm tak si a fai tak tak thei meuh lo va, chawhmeh ṭhutpuiten kan chawhmeh zawrhna hnukhawi ṭheuh hi thianfai deuh deuh ang u.

Tin, Mizo thingpui dawr tam zawk hi a fai tawk lo hle a, thil eina hmunah tho thlawk mup mup hmuh tur a tam hle ṭhin hle. Mizo thingpui dawra eiturte hi a tui thei khawp mai a, chuvang chuan hei aia a lun theihnan a neituten kan customer te tan hmun fai taka thil an ei theih nan kan thingpui dawrte fai takin enkawl ṭheuh ila, thianghlimna leh hriselna hi thil kalkawp tlat a ni. Faina hi chu mimal kutah a innghah len em avangin ṭhalaiten ram kan vei nasa tawh a, kan bawhhlawh ṭheuh thenfai hi ram kan hmangaihna lantirna hmasa ber a ni tih hre thar leh mawlh mawlh ang u.

S.Korea hi entirna pe leh ta ila, anni ramah chuan Company-a Manager pawhin chhuata bawlhhlawh tla a hmuh chuan a chhar fai a, bawlhlawh bawmah a paih mai ṭhin. Heng ang deuh hian office lama ṭhute pawhin kan bulah bawlhhlawh kan hmuh chu kan peon te ko buai kher lovin chhar fai mai ila, hengte hi hniam phahna emaw zahawm lohna a ni lo tih rilru pu thar leh ang u. Ram hmasawnna hi kum khat chhunga hmuh duak duak theih a ni hauh lo va, mahse faina erawh chu ni hnih khat chhung lekin a lang nghal zung zung mai a. MLA sawmli rual ringawt hian ram hi an siam ṭha nghal duak duak dawn lo va, chutih laiin mipui sing chuang chet felna leh taimakna rah erawh chu a lang zung zung thei thung a ni. Chuvang chuan, kan hnathawh hmun ṭheuh fai leh fai loh hi kan chanpualah dah ṭheuh ila, ram dang kan awhna fainate hi chu kan nei thei em em a ni. Mi tin kan bawlhhlawh paih danah te vantlang thil kan enkawl danah te kan ta angin en ila, faina kawngah hmasawn turin i ṭangrual thar leh ang u. Khawpui fai tak neih hi kan hnam min tizahawmtu tur zel tur a ni.

- Zothansangi Hmar