Kumtharah Sawrkar Thar

Kum thar lawmawm tak kan thleng a, sawrkar thar lawmawm tak kan nei tel bawk. La piang lote leh mualliam tawh te kan va hlep nasa em, han ti ila, em em a, kan ti em lo vang chu maw?Kan hriat ṭheuh angin kan ram chu a rethei, khaichhuah tumin nasa takin an lo bei hlawm tawh ṭhin a. Mahse, a hlawhtling hlei thei lo a ni deuh ber mai e. Tun ṭumah erawh beiseina sang tak kan nei, India rama state intodelh ber kan lo ni tawh ang a, kan lo ni thei ta lo a nih pawhin kan tlàkna chu a sang ve hle tawh turah ngai ang. Intodelh loh hrehawmzia chu Silchar kawng a pin hlek hian kan hre tlang awm e, a hman hmanin an lo dang ve chhen bawk nen.Kan vannei e, inthlang ram kan ni a, mipuiten kan duh zawng kan thlang thei, an lo ṭha lo a nih chuan kan paih leh mai thei bawk. Hetih lai hian mi ṭha tak tak heti zozai zingah thlan tlin han nih chu a ropuiin, an lawmpuiawm hle bawkin ka hria.

Kohhran Hote – Mizote chu Kristian vek kan ni a, vawiinah phei chuan kohhran a ṭhang nasa, biak in pawh veng tinah 3/4 chuang lai te pawh a awm. Hengah te hian inhmang tak tak bakah inkhawm ngaina mi, Bible ngaisangtu, an awm ṭeuh a ni. A tlangpui thuin kohhrante hian inkhawm pangngai bakah ṭawngṭai inkhawm urhsun tak, karkhat chhung hian kan nei nual hlawm. Rawngbawlna leh sawrkar hna lam hi chu a inang chiah lo a, mahse, a inhlat lem lo a ni. Sawrkar a ṭhat loh a, a mualpho fo chuan keini ringtute pawh hi kan lo tel ve reng tlat mai, a ram neitute kan ni a, thlang tlingtute kan ni. Heng kan ram hruaitute hi keimahni ang tho, mihring ve bawk, thlemna nasa tak tawk tur leh mawhphurhna sang tak, ngaihtuahna fim leh ṭha tak mamawh em em an ni. Chuvang chuan, kohhran leh mimal ang pawhin an tan Pathian hnenah kan thiam ang ang leh hriat danin I dilpui fo ṭhin ang u. An mawhphurhna leh hnathawh hi thil namai a ni lo a nia.

Opposition-te – Engpawhnise, kan dilna, ṭawngṭaina, kan duh danin chhànin a awm lo a nih hmel hle mai. Ruling lam ka nih loh chuan hna, supply, contract etc. chu ka hmu pha tawh dawn hrih lo. Bank account lam pawh a phai tual tual dawn, huphurhawm hle mai.Hetiang vangte pawh hi a ni ang, tam tak chuan an party vawn lai an phatsan chur chur ṭhin. Opposition lam hi chu MLA-te thleng pawh hian tu mah hian kan chuti teh chiam ngai lo. A awm zia ber chu power engmah an nei lo, sum pawh an nei lo, kan ti a ni deuh ber mai e. Hetih lai hian tihtheih ropui tak kan nei, kan dama kan thawh theih phawt chuan kan nghei lo vang. Kan tihtheih leh tih tur pawimawh tak chu sawrkar khalh ngil a ni. Rorelna khawl leh hmunah chuan opposition an ṭhat mang loh chuan thil pawi a thleng thei zawk a ni. Hetih lai hian kan pawngpaw bengchhen vak vak ringawt erawh chuan awmzia a awm thei lo vang. Awmze nei takin, fim takin an thil tih dan, kalpui dan dik lo leh ṭha lo lai te chu mipuite hriat ngei turin kan hailang fak fak ṭhin tur a ni.

Ruling Party-te – Vawiinah chuan kan inang ta lo, exam-naa pass leh fail ang deuh hian hawiher pawh a zang ta vah mai. Hmun pawimawha kan kalna reng rengah pawh hnung lam aṭangin, "Anni hi chu... an nih hi,” min ti ang a, tute emaw kal mai mai nen kha chuan kan inang lo khawp ang.Hetih lai hian zu nen, hmeichhia nen kan tih erawh chuan rei lo teah mi'n min nuihzat ang a, vai thirchhe zawng pawh kan tluk lo palh mai ang tih a hlauhawm. Lalna leh thuneihna kan han chan meuh hi chuan rei lo teah khaw hmuh a tawi a, sum bawihah tangin mi dikte, rinawmte kan haider mai tṭhin. Hei hi chu thil dik tak ve a ni, Solomon-a meuh pawh khan a tawpah chuan a nupuite pathian, mi lem hnenah inthawina hlanin a siamtu, finna petu Pathian kha a theihnghilh ve der mai a nih kha.

Mahse, keini chu khatiang kha kan thleng ve dawn lo, tawnhriat kan lo nei tawh a, mi hmingthang, huaisen, sum tam tak aia hmingthan lo thlang tawhtute hnung kan zui ve tlat zawk dawn a ni. Sum leh pai, thuneihnate hi chu a zo leh mai ang, hmingṭhatna, dikna, rinawmnate erawh hi chu mi thinlungah a cham reng tawh ṭhin a ni.

Thu ṭha tak tak ziah, sawite hi chu kan thiam tlang viau hlawmin ka ring, a zawm leh nunpui lam erawh thil hautak tak a ni ve ang. Kei phei hi chu lehkhathiam vak lo, politics leh sawrkar hna lamah pawh sawi tur nei lem lo ka ni. Chuvang chuan, ka thu han tarlan te pawh hi a ṭhen lai chu mark pek tur ni ta se, pass-mark pawh hmu pha mang lo tur a awm ka ring. Bible hi theih ang tawkin ka chhiar ve ṭhin a, tin, Sunday school zirlai (Puitling) pawh hi ka dam chuan kum tluan hian ka bih ve bawk ṭhin. Chutiang ang dinhmun, Mizo pa dan takah tapchhakzawl aṭanga ngun tak leh uluk taka rawn buatsaih chu a ni ve a ni.

Aw le, sawrkar thar leh a behbawm chungchang ka rawn sawinaah hian chhiartuten hlawkna, thlir dan tur, beiseina ṭha tak kan neih theih ka beisei.Sawrkar chu mipuite sawrkar a ni a, a chhiat leh ṭhatah hian mite mawhpuh tur zawng mai lovin, kei pawh ka tel ve reng a ni, tih hi I hre reng ang u.

- Lalchhandama Colney, Ph - 9862982321