CM BANGLA A RUAK EM NI?
Nikum 2023 December ni 4-ah Mizoram MLA inthlanpui result puan a ni a, rorel lai MNF Party chuan sawrkarna an siam zawh tak loh avangin an hotupa Pu Zoramthanga, Chief Minister pawhin Governor hnenah banna a thehlut ta a nih kha. Pu Zoramthanga te chhungkua hian CM Bangla hi ni tam ral hmain an chhuahsan niin sawi a ni a, mahse an chhuahsan danah kum 2008 ang bawka sawi sep sep a awm leh ta hi a pawi hle a ni.
Chief Minister thar Pu Lalduhoma chuan CM Bangla chhuahsan takah hian thil fel lo tam tak a awm niin Assembly House-ah meuh a sawi ta mai a, mipui titi a ni zui leh ta a nih kha. CM Pu Duhoma chuan khum leh Dunlop an hnutchhiah pawh mutna tlak loh leh rimchhe tak, TV pawh a chhia hlir hnutchhiah niin a sawi a, a zahthlak hle a ni. Social Media lama tute emawin an sawifiahnaah chuan TV te kha ṭekin a den chhiat niin an sawi a, ṭekin CM Bangla-a TV khati zat a lo deng chhe bik kha a mak dangdai viau mai.
CM chhuak ta Pu Zoramthanga te chhungkua kha a mawhphurtu ber an ni ang em? Nge ni a, Pu Zoramthanga te chhuah hnu hian CM Bangla enkawltu Department lama mi ṭhenkhatte hian an lo suasam zawk le? Mipuiten thu dik ber hre lovin a liam leh mai dawn em ni? Sawrkar bungrua leh an mimal bungruate hi list fel tak an siam lo em ni le? Siam ni se hetia tlak tawh hnua hmingchhiat belh leh ai chuan mipui hnenahte puangzar ve se. Tin, CM Bangla enkawltu Department lam pawh hian langtlang takin kalpui se a duhawm hle a ni.
Tin, mi tam takin tuna Sawrkar thar hotute hi Bangla luah luh hmanhlel lutuk leh, a awm mekte hnawtchhuak ang dawn dawnin thu an vawrh darh a, a zia lo hle. Insiamrem nan hun rei lo te chu an mamawh ang tih a rin theih rualin chhuahsan duh lo luite pawh lo awm ve theih a ni. MLA/Minister/Official te nih tawh lem loh a, entitlement kan neih tawh lem loh chuan rang taka chhuahsan hi kan tih tur zawk a ni. Chuvangin, Pu Zoramthanga te chhungkua pawhin rang taka CM Bangla an chhuahsan hi an tih tur dik tak a ni.
CM Bangla suasam leh nia lang hi tun Ministry-ah hi chuan awm ve lo se, eng Bangla pawh an chhuahsan dawn a nih chuan, an chhuahsan Sawrkar bungruate list fel tak siamin dah se, ṭul lova hmingchhiatna an pumpelh dawn zu nia.
- Lalnunmawia