POLITICIAN “Mi dik vs Mi fel”

Kum 2014-a PM Modi-a sorkar lâkluh a nih hnu lawk khan India rama sorkar hnathawk lian ber pakhat, Foreign Secretary, Pi Sujatha Singh-i chu sorkarin a bân thut mai a, a aiah Dr. Jai Shankar-a a dah nghal a. Pi Sujatha-i tan chuan a tlâwmthlakin a hrehawm ve ngawt ang. Chumi hnua NDTV-in a kawmnaa hmêl hlim taka a thusawite kha a ropui a, India mipuite tan hriat reng tlak a hnutchhiah a, a ṭhen lai chauh lo thai lang lawk teh ang.

“IFS officer hna, kum 38 chuang ka thawh chhûngin ka tih theih sâng ber ka ti. Sorkar thar a lo piang a, Foreign Secretary thar an duh a nih chuan sawi theih ka nei lo. Min bân nî khán kan Minister, Pi Sushma Swaraj-i’n dar 2:00pm-ah min rawn bia a, ‘PM-in Jai Shankar hi Foreign Secretary atan a duh a,’ a rawn ti a, ka chiang nghal mai,".

"Min thlâktu tán file pending hnutchhiah ka duh loh avangin ka chawlh hmain ka dawhkana file ka ching fel vek. Thla 18 chhûng, Foreign Secretary ka ni a, India ram tan ka tih theih sâng ber ka ti. Ni nawn leh mah ila a aia ṭhaa tih dan ka hre chuang lo. Chu chu ka thawhpuiten min hriatpui. Ka vui lo. Sorkarin a duh chu a ti tur a ni. Tu mah ka tlawn ngai lo a, ka haw hek lo. Ka tih tawhah khan ka lungawi a, keimâ chungah hian ka lawm a ni. IFS tana hna lian ber ka chelh theih chhan pawh hi ka senior vang mai a ni lo, min dah loh theih lohna khawpa record ṭha ka neih vang a ni ve bawk,” a ti.

Mi fate hi an ropui ṭhin mang e. Thil ṭul lo, amah la vuak lêt theihna tur reng reng engmah Pi Sujatha-i hian a hnutchhiat hauh lo hi a ropuina leh a finna lai chu a ni. Kan hnathawh tui lai tak leh chelh mêk, kan vawn laite kalsan a ṭul châng a awm ṭhin. Kan la ui ngawih ngawih a nih chuan inenfiahna tur kan nei tihna a ni thei ang.

Politician, mi fel tak tak kan kawl tawh ṭhin a, mi fel, dik si lote hian thil tam tak an ṭhâm hnawk ṭhin. An tih tawh lama zei-hawi lutuk, fel mah mahte hian thawhhona an tichhe duh châwk a! Chutih rualin anmahni ngei pawh chu, fel hlê mah se, an fel leh lutuk a, an fel ral der mai a ni. Hetiang mite hi ram leh hnam hmelma an ni a, a ṭha zawngin mipui hriat zui leh sawi zui an hlawh ngai tawh lo. Politician, ‘Mi dik’ nihna chuan rinawmna a keng tel a. A hun laiin fak leh chawimawina kotlângah hûn chhuah ni lo mah se, a dikna leh rinawmna chu hriat reng a ni tawh ṭhin.

Pi Sujatha-i’n “Ram tân ka tih theih sâng ber ka ti. Ni nawn leh mah ila a aia ṭhaa tih dan ka hre chuang lo. Chu chu ka thawhpuite’n min hriatpui,” a tih tluk hian Mizo Politician te hian sûlhnu ṭha kan hnutchhiah ve ang em le?

Dik tak chuan Rel chêtsual avanga Railway Minister-in banna a thehluh mai na ang chi, ‘moral responsibility’ te hi kan ramah hian kan sawi phâk ve meuh lo chu a ni ber a. Mipui rawngbawl duh anga lang chung hian party-a nihna leh, sorkara thuneihna chelh hi chu eng ang pawhin hmingchhiain hlawhchham mah ila, uai tân ngar ngar hi kan tum a ni ber mai! Kan tum ber chu, ‘tlin leh a, duhtâwka chawm bawk a, hâwp bawk’ hi a ni leh ṭhin.

“Ka hna chelh ngai ang kha, chelh nawn leh mah ila a aia ṭhaa tih dan ka hre chuang lo,” ti thei khawpa sûlhnu pawr nei lote chu mipui lam zâwk hian an ko chhuak leh em em ang. Chuvangin, ‘mi fel’ ringawt ni lo, ‘mi dik’ hi Mizo mipuite hian kan zawng a, kan duh fír tulh tulh dâwn ni pawhin a lang.

- Zobiakvela (Masena)