IPS Manoj Kumar Sharma - 12th Fail

India lemchan khawvela mikhual lo tak, khawvel huap pawha Hindi film ṭha chhawpchuak thei Vindhu Vinod Chopra film siam thar ber, ni 27 October 2023-a tihchhuah '12th Fail' chuan vawiin khawvel a run mek a. India ram mai ni lo, khawvel hmun zau zawkah pawh he lemchan hian mite thinlung a hneh hle a nih hi.

Manoj Kumar Sharma, Pawl 12 fail, Hindi subject tih loh chu fail vekin beidawng duh loin pawl 12 chu zir nawnin, 3rd Division-ah pass-in Union Public Service Commission/UPSC kaltlanga Indian Police Service/IPS a nih dan kawng chhuk chho (biographical film) chanchin hi mi hlawhchham mek, hlawhtlin tuma hmabak hlen ngaite min cho chhuaktu lo ni mawlh teh se.

Tu nge Manoj Kumar Sharma?

Tuna IPS ni mek Manoj Kumar Sharma hi kum 1977 khan Bilgaon, Morena District, Madhya Pradesh-ah a piang a. A pa chu Agriculture Department-ah thawkin sum leh pai harsatna chuan nang leh kei ang thoin an chhungkua hi a chamchilh hneh hle a, a tibuai hle bawk. Zirlai thiam thei a ni lo a, pawl 12 a zir thlengin 'Third Division' hi a marksheet luahlumtu a ni.

Pawl 12 a beih nawn hnuah hian a kahpahin Gwalior-ah Tempo Driver te a han ni lawp lawp a, mi hausa ui enkawla kea kapuiin lehkha zirna tur pawisa a tuak a. Delhi-ah Lehkhabuzem/Library Peon-ah te ṭangin UPSC exam hmachhawn turin a inbuatsaih pah a. Mahse, awlsam takin a hlawhtling nghal hauh lo. Vawi li ngawt UPSC exam hi a bei a, a tawpah kum 2005 khan India ram pumah 121-na a ni phak ta a ni. Tunah hian Maharashtra cadre, Mumbai-ah Additional Commissioner -in a awm mek a ni.

Hmangaihna zinkawng

IPS Manosh Kumar Sharma hian Shraddha Joshi Sharma, Indian Revenue Service/IRS chu ngaihzawngah neiin a bialnu hian nasa taka fuihin, India rama exam hautak ber hmachhawn tur hian a theihna zawng zawngin a pui a. He film entute chuan kan hriat vek kha – mittui tlakna tur a tam hle! Hun harsa leh thim ber an hmachhawn lai te, mi hlawhchham leh engmah lo a nih lai te pawhin an pahnih chuan an ṭang dun tlat a, an sual chhuak dun tih kan hre vek awm e.

Thawnthu lo pianchhuah dan

Manosh Kumar Sharma ṭhianṭha tak leh thuziak thiam ni bawk, Anurag Pathak hian kum 2021 khan a ṭhianpa Manosh Kumar Shrarma chanchin hi lehkhabu '12th Fail' -ah siamin a hlawhtling hle a. Chu chu India rama film siamtu lar, 3 Idiots, PK te leh film hmuhnawm tak tak lo buaipui tawh ṭhin, Vindhu Vinod Chopra chuan film-ah siamin vawiin hi a lo thleng ta a ni. He lehkhabu ziaktu Anurag Pathak chuan, "India rama ṭhalaite leh hlawhchham hlaua exam hmachhawn hrehte tan he lehkhabu hi ka ziak a ni," tiin a ṭhianpa chanchin hi chhuang takin a sawi. Sachin Tendulkar chuan he lehkhabu hi a fak hle a, ṭhalai maktaduai tam takte cho phurtu a ni ang tiin a lo sawi tawh a nih kha.

A bul aṭang bawkin aw

He lemchan hmuhnawm taka kan hmuh chu – hlawhchham mah ila, bul ṭan ṭha zel ang/restart tih kha a ni awm e. Damna leh hriselna ṭha kan neiha kan kum leh kan theihnain a la tlin a, a la phak a nih chuan bul ṭan ṭhat zel mai kha hlawhthlinna a nihzia kan hmu chiang hle. Thil ṭhenkhat erawh hi chu a bul aṭanga tan leh theih tawh loh, vawikhat chauh tih theih a awm ṭhin. Mahse, kan hlawhchhamna tam zawk hi chu bul ṭan nawn theih, a bul aṭanga a thar hlaka inbuatsaih theih hi a tam zawk a ni. Chuvangin, hlawhchhamna tihlawhchham ṭhak khawpa beih nawn ngar ngar mai hi hlawhtlinna chu a ni.

Retheihna hi chhuanlam a tling lo

Mi zawng zawngah chuan a dik vek lo a nih pawhin a tam zawkah hi chuan kan retheihna hi kan hlawhchham chhan a ni lo. Sum leh pai harsatna tawk lo tak tak hi an awm lo a; mi hausa tak nia kan hriatte pawh hian hian hausak belh zel an tum a nih hi. Kan hma lam hun atana hlawhtlinna kan chan theihna turah hian sum leh pai hian hmun pawimawh tak chu a luah ngei mai. Mahse, chu ai chuan tumruhna leh beidawng loa beih ṭang ṭang hi hlawhtlinna a ni zawk. Sum hi mihring vang chauha awma hlutna nei a ni a; a hlu hmasa zawk leh a hmangtu keini hi kan awm chhung chuan sum leh pai hi kan nei ngei ngei ang. Chuvangin, retheihna hi hlawhchhamna a ni lo. Chu chu he lemchanah hian chiang takin kan hmu awm e.

Dikna leh rinawmna

A tawpa tlo ber leh innghahna tlak chu dikna leh rinawmna a ni tih he lemchan aṭang pawh hian kan hmu chiang hle awm e. Khawvela mi hlawhtling leh chanchin ngaihnawm neite hi mi rinawm leh mi dik tak an ni deuh zel ang. Dik lo leh rinawm lo taka hlawhtlinna chang te chu lo awm mah se, chu'ng mite chu en dan tawk leh teh dan tawk kan thiam ṭhin. Chutianga mi rinawm leh dikte chu Pathian pawh hian a hre reng a; malsawmnain a vur ngei ngei bawk.

Vawikhatnaa mi hlawhtling ni nghal hi khawvel awm chhungin an awm reng dawn a; vawi tam tak hlawhchham pawh hi kan awm reng dawn bawk. Mahse, hlawhchhamna hi kan tihlawhchham thei tih hre renga beidawng duh loa bei ṭang ṭangtute hi mi hlawhtling an ni. Chutiang mi chu Pathianin a en kân reng thei lo a, hlawhtlinna a pe nge nge zel tih hriain beidawng loin i bei zel ang u.

- Rinfela Zadeng