ZPM Sawrkar hnuaiah Accountability kan hmu ṭan ta !
MNF leh Congress rorêlna hnuaia lungchhiatthlâk reng fo chu, tu mahin Accountability an nei ngai lo kha a ni. Accountability kan tih chu, kan thiltih man kan sengna hi a ni. MNF leh Congress rorêlna hnuaiah khân, vawi tam thiltih sualna a thleng chamchi a. Eirûkna leh dawngdahna avanga sawrkar hmalakna fel lo vanga miin nunna hial an chân pawhin, tu mahin mawh an phur ngai lo a nih kha. Kha khân sual nasa takin a ngampattir a, sawrkar hnathawk leh a thei fate’n hlauhthawnna nei miah lovin pawi an khawih phah ta ṭhin a nih kha.
Lei dawh a chim a, lungrem a chim rem rum bawk. Sawrkar building sak mêk chhe lutuk vanga hna tihtawp a nih a, kawng siam hna chhe lutuk vanga khawtlâng lungawi lovin hnathawktute an dodal hial pawhin, tu mahin mawh an phur ngai lo! Chu achhapah nunna hlu tak hlohin a’n la awm zui bawk. Mahse, pawikhawihna thleng chungah hremna reng lekkawh a nih ngai loh avangin, mi suaksualte thinlung a ngampat phah a. Pawi khawih turin an ngal a chak zual phah sauh ta zawk ṭhin.
Heng pawikhawihna avanga tuartute erawh rilru nâ takin an awm a. Engtikah nge Kristian ramah hian rorêlna dik chu luipui angin a luan ang a, engtikah nge khua a var dâwn tiin beidawnna nen dar insi rialin an lêngdun ṭhin. Pawikhawihtute lahin zah nachâng hre map lovin khawlai an mawi a. An pawikhawih rah an sengnate chu, an in leh lo, an ei leh in, khawvel thila nawmsakna bungrua an lei khawmahte hmuh theihin a awm ta zawk hlauh a! Chutih mêk laiin chhantu nei lo leh mi hnuaihnung zawkte erawh fun tê ilo vangin man an tâwk a. Tan in lamah hrem tuarin an inzui duah duah thung lawi si!
Tichuan, neutral mipui inthurualin ZPM an han thlang tling ta a. An sawrkar phat aṭangin hma an la char char tih hai rual a ni lo. Dân lama kan hotupa Home Minister chuan, thla khat chhûnga dân bawhchhiatna tihtawp tum a nih thute a tlângaupui a. Thusawi maiah tawp lovin Vairengte lama check gate duty, dân lova lirthei khalhtute hnena pawisa khawn ṭhin an man chhuahte chungah, rorêlna kut thlak a ni ta a nih hi! Pawikhawihnain lukhawng a nei ta tih han hmuh hian, lawm avangin mi tam tak biangah mittui a luang ngei ang tih a rinawm êm êm a ni.
Kum 37 chhûng lai maiin kan ramah dânin kori a tu tak tak thei lo a. Thuneitute lam an inthurual miau ṭhin avangin pawikhawihna lian tham thleng zut ṭhin mah se, tan in meuha lut thla ta sawi tur an vâng ṭhin êm êm a nih hi. Dânin thiam loh a han chantirte pawh, daktawr tu emaw lehkha hmangin an hrisel lo thut thut a! Tan in pumpelh zawngin mi thil tithei fate chu an inchhuah zalen leh mai ṭhin. Mahse, MNF sawrkar tawp lamah kan Magistrate pakhat chuan mi lian pawikhawihtute chungah thiam loh chantirna thlentir ṭhinin, an chungah hremna a lekkawh ta nghauh nghauh a nih kha!
Kawng dik kan zawh ṭan mêk laiin, sawrkar berin hnu a rawn chhui zawm ta hi a lawmawm êm avangin fak loh an har ta hial a nih hi! Ram changkang leh ram ropui kan tih apiangah dân a lal a, mipuiin dân an pawisa ṭhin. India ram erawh khawvel huap pawha dân lal loh berna ram pakhat a ni thung a. Chu chuan min kang kai a, kan ram ngeiah zung a rawn kaih ta. Isarel fate, a bikin an ram rorêltute chunga Pathian thinur chhan, an chunga hremna nâ tak a lekkawh ṭhinna chhan chu, rorêlna dik lo, thlei bik neia ro an rêl ṭhin vang a nih kha. Kristian ramah ve lem chuan dân a lalin, mipui pawhin dân kan pawisa zawk tur niawm tak a ni a. Nimahsela, a letling thâwkin kan nung tlat lawi si!
Dân hrula han kal a, awlsam zawka thil han tih maite hi kan hreh lo tlâng êm êm a. Kan biak Pathian mizia hi keimahniah hmuh tur a vâng ṭhin hle a nih hi. Rorêltute leh thuneitute lahin Pathian ṭihna chu biak inah an hnutchhiah sauh sauh a. Thawhṭanni aṭanga zirtawpni chhûng zawng, an thiam ang angin, theihtawp chhuahin mahni hamṭhatna tur ngaihtuah reng rengin dân an pawngsual ta ṭhin a nih hi. Heng thilte hi ZPM sawrkar chuan tihtawp tumin hma a rawn la ta chat a. Chuti chungin an hmalakna sawisel duh kan la awm zu nia! Kan chhûngril nun (moral) lo tlakchhiat tawhzia hi a namailo hle a lo ni. Dikna ngai thei miah lo, fel taka rorêlna thlawp thei lo mite’n, ualau taka rorêlna dik leh fel an han sawisel ngam ta zawk hlauhte hi mak tak a ni!
Pu Duhoma sawrkar hian thla thlah lul suh se. Eirûkna, pawikhawihna, thikl sual tihna thleng apiang hmachhawnin, an chungah rorêlna dik lantir mawlh rawh se. Kan ram leh mipuite hi siam ṭhat theih kan la ni a, kan la tlai hauh lo e. Mi dik leh fel tam tak Zoramah hian an la awm a, zam hauh lovin ZPM hian ke pen ngam zel rawh se. In lamah mipui kan ṭang tlat tih hriain, vawi khat na reng reng chu kan ramah hian dân hi lo lal ber mawlh rawh se. Kha leh chen dân bawhchhetute zalenna ramah kan lo cheng tawh a. A tâwk zozai tawh kan ti a ni e.
- Lalremliana Pachuau