TOURISM HMASAWNNA’N SERLUI B HYDEL PROJECT CHEIHNUM A NGAI E

Kumthar tir hunawl hmangin Serlui ‘B’ Hydel Project lamah Aizawl khawpui ri luih luih kalsanin kan liam thla ve a. Tourist Lodge-ah innghah a hahdamthlakin a fai nuam em em a, a nghaktuten ei leh in siam an thiam em vangin a manhla hle bawk. Tourist Lodge ṭha tak kan neih pawh cheihnum a ni a, hmuh pawh a hahdam hle.

Amaherawhchu ti teh ang, Tourist Lodge-a chawlh zu hman ngawr ngawr khu enjoyment a ni lo a, hun hlimawm taka hman ralna tur enjoyment kan mamawh tel ṭhin. Hemi kawngah erawh duhthu a sam lo hle mai a, tuikhuah zuk en leh mimal Taikuang lawnga man to taka chuan bak chu tihtur reng a awm lo a, a tuikhuah ber lah chuan a mawina a lo hloh nasa hle tawh bawk.

Serlui B hi khualzin hip tura cheihnuma tuaithar leh hi a chakawm em em a, Foreign leh State dang aṭangte pawhin an lo pan ve vang vang ṭhin a, mahse an beisei a phak loh lutuk vangin rilru na taka haw chang an nei fo nia sawi a awm. Keimahni ram chhung ṭhalai, nu leh pa, nunaute pawhin chawlh an hman theihna tur atana thlakhlelhawmin kan Sawrkar thar hian han thuam ṭha leh se, sum tlem te senga cheihnum leh theih a nih vang hian theihtawp han chhuah leh se, a duhawm takzet a ni.

Tourism hmasawnna atan kan sawrkar hian ke han pen thar leh se, Khualzin hip lamah theihtawp han chhuah leh se, chu mi atana rawtna tlem te han zep ve ila:

1. TOURIST LODGE KALKAWNG SIAM ṬHAT A NGAI: Bilkhawthlir aṭanga tlan luhna kawng chu a zim deuh nain, Rigid pavement vek a nih vangin tun dinhmunah chuan a la ṭha a, Hydel Project/Tourist lodge peng thleng chu thawm ṭhat tur pawh a tlem hle. Kawng pangngai aṭanga Lodge panna kawng (approach road) erawh blacktop a nih loh bakah a ṭha lo hle a, a chhe zual lai khu Km 1 awrh chauh a ni a, siam ṭhat a harsa lo hle ang. Khu khuan lirtheia pante tan tlan a tihrehawm hle.

2. TUIPAR (WATER LILY) THENFAI A NGAI: Serlui ‘B’ HP hawn hlim khan khualzin a hip em em a, tlawhtu an ṭhahnemin a tuia pawh a thianghlimin bawhtu pawh a nei lo a, a mawi ṭhin hle. Amaherawhchu, tun dinhmunah chuan Tuipar khuan a bawh khat hring vek tawh a, a lang tenawm tawh hle a, tuikhuah ni si khu hnai tea thlir pawhin leilet záwl, dûm hmun a ang em em tawh mai a ni. Tuipar khu thenfai a nih loh chuan kum 2/1 chhung hian tuikhuah pumpui khu a bawhkhat zo tawh dawn a, mawina a nei tawh lo ang a, lawnga kal theih pawh a ni tawh lo ang. He’ng Tuipar thenfai hna project te hi kalpui se a duhawm hle.

3. A HMUNHMA CHEIHNNUM A AWM LO: Tourist Lodge aṭanga chhukna Step chhuk deuhah kalin Tuikhuah kiang kan zu thleng a, a kama Waiting Shed te chu hnimin a bawh khat vek a, kalpawh theih pawh a ni tawh lo. Tuikhuah kianga huan neiten a kam tuak hmun ṭhenkhat tifai lo phei se chu tuikhuah panna kawng pawh a kaw lo hial ang. Tuikhuah zu pawhna lai, hmun zau lem lo te khu chu lawilen nuam takin han chei hnum ve se a duhawm hle.

4. ISLAND NGAIHTHAH A NI: Serlui B Tuikhuaha mipui tlawh chak pakhat chu Island khu a ni a, mahse tunah chuah khaw ram ang maiin a chul rup a, a hmunhma leh a chhehvelte a hnim chhup a, tlawh a chakawm loh hle. Rest House leh Cottage awmte chu ngaihthah tih hriat rengin tlawh pawh a chakawm loh hle bawk. Island khu Power & Electricity Department enkawl a ni thung a, Tourism hnena hlan theih ni se a duhawm hle.

5. ENJOYMENT INFRASTRUCTURE SIAM BELH NI SE: Tuna Serlui B tlawhtute chuan Taikuang lawnga chuan bak tih tur an nei lo. Tourism Department hian Lawng pakhat tal dah ve se a duhawm hle. Hei bakah hian lawng te, nghakuai chiahna atana hire mai theih te awm se la. Nghakuai leh Life Jacket thlengin hire tur awm se, Sky Diving thlengin tun lai ṭhalaite hip thei turin cheibawl ni se, Tourist kan hip thar leh ngeiin a rinawm. Hei bakah Island panna turin Forest Rest House tlang aṭangin Rope Way te siam phei theih ni se, a duhawm hle bawk.

6. SANGHA KHAWI LEH ILA: Tunah chuan Fishery Department ten Sangha an khawite titawp tawhin an lo rauhsan ṭhap tawh a. He’ngte pawh hi Khualzinte man awlsam theih tur Sanghate khawi leh ni se, Nghakuai chiah man thlengin ruahmanna siam se a duhawm hle.

Tuna kan dinhmun ber chu Serlui B Tourist Lodge ṭha tak leh thianghlim tak, tlawhtu awm mang lo kan nei lurh mai a, kan sawrkar hian revenue a nei thei dawn lo tih a lang chiang hle. Tourism hmasawnna kan ngaihtuah zingah Serlui B Tuikhuah, Mizoram State ta ngei hi duh thala cheibawl theih a nih vangin han tuaihnum leh thei ila, a duhawm tak zet a ni.

A chunga ruahmanna tlem te pawh khi tihlawhtling thei ila, Serlui B Tuikhuah hi Revenue hmuhna atan kan hmang leh ngeiin a rinawm a, Aizawl khawpui aṭangin a hla lo hle a, khawpui tawt lutuk kalsana hahchawlhna hmanna hmun nuam takin han cheihnum leh thei ila, a duhawm takzet a ni. Kan sawrkar thar hian ngaihtuahna fim tak nen hma han la thar leh se a duhawm tak zet e.

- Lalnunmawia Pachuau