Aikal tihbo vek a theih loh
ZPM sorkar thara CM Pu Lalduhoma chuan lakluh an nih ni la la khan press a hmachhawn a, a sawi zinga pakhat, sorkar hnathawk aikal la tihbo tum a nih thu a sawi rualin, loh theih loha aikal la ngaihhnathiam an nih tur thu a sawi.
Sorkar hna an dil a, harsa taka lak an ni a; thingtlang hmun kilkhawrah te post an ni ṭhin. A bikin zirtirtu aikal la an tam lawr lak a rinawm. Aikal zawng zawng tihbo a harsa viau ang.
January 6 khan CM Delhi zin haw khan press conference a nei leh nghal a. Ka hunah khan Aikal chungchang hmalak dan ka zawh pawhin, "Chak taka hmalak a ni a, mahse a hmaa ka sawi ang khan natna khirh leh loh theih loha aikal late chu hriatthiamna a awm ang," ti angin min chhang leh bawk.
Ni e, CM Pu Duha sawi ang hian aikal la zawng zawngte an post-ah an awm kim ṭhap tur a ni, a ti lo a; natna khirh leh natna benvawn neite tan erawh thupek khauh tak a ni lo tih a chiang.
Aikal la zingah zirtirtu an tam viau tih chu tlang hriat a ni. Heng aikal late aiawh hian a khaw mi, ṭhalai lehkha thiam tak tak an hmang deuh ber a; khawtlang hruaitute'n an remtihna ngeia aikal chhawrte pawh an awm a ni.
Aikal la zawng zawng tih rêm erawh a theih loh hul hual ang. Entir nan, khaw pakhatah zirtirtu pakhatin a khaw mi aikal la, kha a aia kal kha khawtlang pawhin an mi duh a nih a, a aikalsaka aia ṭangkai leh zirtir thiam a nih bawk si chuan tihtawp rup a harsa ve deuh ang.
Aikal late hi a tlangpuiin thingtlanga an awm peih loh vang a ni a, genuine tak taka aikal la erawh an awm bawk. Genuine tak takte chu CM pawhin ngaihhnathiam a nih tur thu a sawi tawh kha.
Aikal lak hi khawtlang hruaitute remtihna te, a aikalsak aia a thiam a, a fit bawk chuan employment generate-na ṭha tak a nihna chin a awm ve a. Hlawh an inpek ṭhat tho bawk si chuan hnualsuat vel a harsa ve viau ang.
Aikal la zawng zawng hi an dik vek lo tih chu a chiang. Sorkar hna harsa taka dil a, an post-na hmuna awm ṭha peih lo, khawtlang (VC/YMA) mit pawh tikham an awm ve nawk thei. Hengho hi chu sorkar thar hian hrawm deuh mah se a pawina a awm miah lo. Sawi tawh angin VC/YMA ten an khuaa thawk tura an duh zawk; a khaw mi ngei mi ai a kal an phalsak erawh chu uluk zawka en ni se, a ṭha khawp ang.
- Lal Rinmawia