KUM THAR AṬANGIN MI HUAN/RAMAH

Zo fate hi pi leh pute hun lai aṭanga mi rinawm, a neitute phalna lo chuan mi huan/loa luta thlai ilote khawih mai ngai lo tia hriat ṭhin kan ni tih chu an thu sawi lar tak "Mai leng an ûm ngai lo," tih aṭang hian a hriat mai àwm e. Mahni rí pela mahni maian zám leh a rahte chu um zuia lak tur a ni lo tih ngaih dan nei an ni. Hemiin a entir chu ramrí, huan rí leh lo rí-te hi an zah hle tihna a ni.

India hmarchhaka cheng, kan tribal-pui Naga-ho hi chu heti lamah hian kan la tluk lo hle tho niin a lang. Anni hi tun hma, an pi leh pute hun lai aṭanga mi lo/huan/ram an inzahsak ang chi kha tun thleng hian an la vawng nung reng niin an sawi; mahni tuhrah/chin/phun/theh ni lo lak/lawh/seng ringawt hi an duh lo tawp; hetia an tih chhan hi – rin dan pakhatah chuan, a neitute hriat loha mi huan rama luta an thlai chin ilote lo laksak ringawt hi phuba inlak tawn hlauh vang a ni awm e. A chhan hi thil dang pawh a ni zawk maithei bawk. A enga pawh chu lo ni se, anni chuan huan hung lovin thlai an ching a, thei an phun a, a rah tiar tuar a, kawng bul maiah te pawh a rah kur ngiai nguai a, a hmin tep tup a, han ban phak leh lawh awlsam tak maia rah mai awlsam leh, pangpar parte pawh han thliah mai awl tak turahte an par a; mahse, an inkhawihsak ngai lo va, an inlaksak ngai hek lo. Heti lamah hi chuan, an va entawntlak êm.

Mizoramah hian eng kan ti nge ni ta, a neitute phalna la si loa mi huana luh a, duh duh lak mai hreh lo hi kan kat ta nuk mai niin a lang. Huan chu hung pawh ni se a him kim seng chuang lo. A mak a ni. Kan Kristiannain min hneh kim lo deuh a nih pawhin, hetiang tih ching mi tlem tête mana dan anga hrem tur hian YMA Branch tin inthurualin kum tir aṭang hian ṭang ta ila, kan ti rèm thei mai ang em tia inràwnho a ṭha hle mai. Kum a lo thar a, Zo faten Sawrkar Thar neiin, a hming atana 'Kut hna thawktute pa' (Father of the workers/farmers/jhoom cultivators) tia saka mawi CM kan nei ta bawk a; intodelh tumte leh retheihna lak ata chhuah tuma thlan tui luanga theih tawpa hna thawktute thawhrah, lo seng khalh duh mai mi tlem tê an awm palh chuan a pawi dawn em mai a, eng emawti tia huan/lo neitute an awm loh hlan pawh a, an thawhrah him taka a awm theih nana hmalak hi a hun hle tawh niin a lang.

Kum 2024 hi chu hetiang lam hawi 'kampein' nan emaw dan siam nan emaw hmang ta ila, a ṭul angin mi huana mi thlai seng, mi thlama luta duh duha che ta mai leh bungbel te laa mi nungcha humhalh leh, thing leh mau humhalh dim baksak lova chet lak duh ta mai hnial lo ang chi, mi tlem tète man chhuah a awlsam nana report-na tur police info/ portal ang chi siam ni ta se. Phuba inlak tawn aṭanga hetiang nun dan ṭha lo tih rem ai chuan KRISTA NUN MAWI + dan leh hrai lek lamna hmang ngeia tih rèm/ûm bo chu a ṭha zawk em em ang chu. Thil danga kan fel teh lul nen, a neitute hriat lohva mi huana luha zalen taka chet mai duhna thinlung pu hi kan la awm leh zauh nia lang hi kan hnam mualphona chi khat a ni a, a lo reh theihna tur kawng eng emaw ṭha tak hmuh chhuah hi; mutmawh hnàrmawha neih a hun ta hle mai.

Hna thawktu chu a hlawh hmu tlak a ni (1 Tim. 5:18b).

- Dr J.T.Vanlalngheta