ZPM SORKAR CHU A DANGLAMNA A LANG ṬAN E

Hun rei tak aṭanga kan lo nghahhlelh em em ṭhin, Sorkar pangngai tak Pathian tih tak tak ni tura ngaih Sorkar thar, chak leh huaisen kan nei niin a lang ṭan a, a thlamuanthlak ṭan nghal pang mai. An hotupa ber, Chief Minister Pu Lalduhoma hian a hote Minister leh MLA te hi a uap hneh hle mai. Home Minister Pu K.Sapdanga hi a pumrua en ang mai hi a lo ni lo. Hun reilote chhunga a huaisenzia Kuhva ro phurh leh Vairengte Gate-a duty te chunga action a lak rap nghal danah te hian, tun hun thla khat awrh an Sorkar chhung reiloteah pawh thil dik lo titute chunga a huaisenzia kha kan hre ṭheuh awm e. A thuhrimah amah Pu K.Sapdanga hi, corrupt miah lo Pathian ṭih mi, Kohhran mahni taa nei mi, Pathian ram thawhlawm pawh ngai pawimawha thawh tam em em reng a ni.

Chief Minister Pu Lalduhoma hi Minister tur a thlan dan leh, an Department chan tur a thlan danah hian a fakawm kher mai. Sorkar Finance Department hi MLA lo ni rei tawh tan lo chuan thiam a harsa a. Amah Pu Lalduhoma hi tun Sorkarah chuan MLA lo ni zing ber tawh a ni a. Chu bakah, Opposition Group Leader ni zing ber a ni bawk a, thil chik mi leh zir peih ber a ni bawk. Tin, Department tina an sum mamawh tur ṭheuh enpui tur leh en zuipui turin a hre chiang ber tur a ni a. Chu bakah, ani CM ber hian Works Department pakhat mah a inpe lo va, Department dang zawng zawng hnathawh hi a enpui hman vek reng dawn a. Chuvangin Finance a chang hi a dik chiah a ni.

Amah Pu Lalduhoma hi mi hleitling tak, hmel zahpuiawm loh tak, IPS Officer lo tling tawh a nih avangin India Sorkar hotute pawh hian an zah hle a ni tih chu tun ṭum Delhi a kal khan a lang chiang hle. Awlsam takin Prime Minister Pu Modi-a a hmuh mai dan leh, Foreign Minister IPS-a a batch-pui Pu S. Jaishankar hnena Mizoram leh Burma ram inrinaa ramri hung India Sorkarin a tum ṭhulh tura a ngennate kha thu pawimawh tak a ni. Home Minister Pu Amit Shah te leh Highway Minister Pu Nitin Gadkari hnena Aizawl Bypass road sanction tur a sawi pawh a tuk maiah Pu Gadkari hian a rawn sanction nghal mai a nih kha.

Department lian ber PWD Pu H. Vanlalhlana a chantirte hi a àwm hliah hliahin ka hria. Pu Hlana hi mi duhtui, corrupt ngai miah lo, mi inuluk chi a nih avangin PWD a chang hi a chang awm hliah hliah niin ka lo hria. Doctor Vanlalthlana’n Education Department pum pui a changte hi a chan awm ber niin ka lo hre bawk. A lawmawm ka ti hle. Minister dangte chan ṭheuh pawh hi CM hian a ngaihtuah thiam hlein ka hre bawk.

Thudang: ZPM Sorkarin thlai thar lei an tum meuh chuan sawhthing chi lei tum an tam lutuk a, lei tumtute an buai mur mur tawh mai a nih hi.

Kalphung thar Sorkar – Ka lungrualpui Zpm Sorkar.

- S.Lianhrima Hauhnar

Aizawl Venglai

8974267055