Awhna Leh Itna Dik Lo
Thil kan la neih loh leh kan la nihpui loh awhna avangin Eden huanah mihring hmasate bawhchhiatna a lo thleng a, chuta ṭang chuan mihringte thinlungah hian awhna leh itna sual chuan ni tin zan tin min chenchilh ta reng a ni. Chumi avang chuan duhamnate, mahni hmasialnate, mi ta leh mi chan tur dik lo taka laksaknate a rawn thlen a.
Mi dik lote thil tih rah chhuah an va awt a, hmu ṭha riautuin a tih ve chuan, chu chuan thil ṭha lo bawk a thlentir ṭhin.
Nimahsela, rinawm tak leh rim taka thawktu thawh rah chu a thianghlimin a mawi a, chutiang chu miin a awh a, a tihhlawhtlin ve chuan Lalpa'n mal a sawmsak a, ama tan, khawtlang tan leh ram tan thil ṭha a thlen ṭhin.
Ruihtheihthil titu nunzia chu miin a awh a, a va tih ve chuan a tawpah zu leh damdawi ngawlveiah an lo inchantir ṭhin.
Kawngpui dipdal zawnga chet lakna, thiltih reng rengte chu a tituin ama tana ṭha tur a ni tih a hriat avangin, mi dangte a dipdalna chu a va ngaihtuah duh tawh ṭhin lo. Chutiang ang thil tih ṭha lo chu mi dangten an rawn awt a, an ti ve ta zel a, chumi avang chuan Zofate Jerusalem kan Aizawl khawpui hi a lo ṭawp zo ta a ni.
Ram hmangaihna vang ni lova sum leh therhlo semna vanga mahni dinhmun chawikangtute thil tih dik lo chu va awt a, lo ti ve ngeitute thiltih ṭha lo chuan kan ram hi a hruai chhe zo a. Anmahni hnungzuitute thinlung leh ngaihdan chu kawng dik loah a hruai a. Demo-
cracy kalkawng an tihnawk a, rorelna khawl thianghlim an tibal ṭhin.
Ṭhenawmte thil tih dik lo chu lo awt lo ila,"Kei chuan thil ṭha lo tih hi ka duh ve lo," tia thinlunga Lalpa ṭihna neiin i intiam ang u. Hetiangahte hian kan ram siam ṭhat nan bul kan ṭan a va hun ta em!
Tunlai hun media chak takah hian mi ṭha lote thiltih ṭha lo an pholang nasa ta a. Chu chu ṭhenkhatin tih ve chakna an lo nei a, an tih ve tàk zel avangin chu chuan kan ram ṭhalaite nun a tichhe zo ta a nih hi.
Kan pi leh pute nun hlu leh mawi tak, awhna leh ítna reng reng an neih lohna kha kai tho leh ila, chu nun ropui leh thlakhlelhawm tak hmang chuan kan thinlung leh ngaihtuahnate hi kan ram tan i din thar leh ang u.
H. Neihchungnunga,
Durtlang North