EPF a thawkte an zawmthaw

India sorkarin private leh company-a thawk-tute hamṭhatna turin Employment Provident Fund (EPF) zawm ngei ngei turin a ti a, Mizoramah pawh zawm a hlawh viau laiin EPF office-a thawktute duh aiin an zawmthaw mah mah.

Sawi tawh angin sorkar laipui hian sorkar hnuaia thawk ni lo, private leh company-a thawktute an nakin hun tur a ngaihtuah a, hei vang hian mi 20 aia tam ruaitu chuan EPF an zawm ngei tur a ni a; an zawm lo a nih chuan hremna thlengin a lek thei a, hrem pawh a nei nual tawh a ni.

EPF-ah thla tin kan hlawh aṭang leh kan thawhna neituten an doletna kan dah a, kum 60 kan tlin chuan a vaiin an lakchhuah theih bakah thla tin pension kan la thei a, hetianga EPF zawm tan chuan a ṭha hle a ni.

Mahse Mizorama EPF office-a thawkte hi an zawmthaw a, an hna an tlin lo mah mah a ni. Chuvangin EPF kalphung hi chhui fo a ṭha a, a tawpa buai loh nan date of birth thlengin a dik tak tih tum tur a ni.

Kei ngei pawhin EPF ka zawm a, nikum hmasa lam daiha pension tawh tur leh pawisa pawh dah tawh lo tur kha thla eng emaw zat ka lo la dah a. A khawihtu lamin, "I pension a hun tawh a, rawn ngaihven la, pawisa pawh dah a ngai tawh lo," an rawn ti miah lo a; ti khan ka kal ve mawp mawp mai a ni.

Thawktu nih ve loh chuan a kalphung hriat a har a, a thawktute an inthlahdah tlat si chuan tih vak ngaihna a vang hle. Ka pension leh ka sum dah, a pung nen khan lak a hun daih tawh laiin ka khawtlai ta hle a ni.

Nikum kumtir aṭang khan EPF hmunpui lam aṭang correction siama thehlut turin min ti a, Shillong an hmunpuiah vawi khat mai ni lo, reminder pawh kan thawn fe a. Aizawla an office, Upper Republic-ah vawi duai lo ka kal a, a fel thei ta reng reng lo.

Consumer union lamah kal mai ka duh laiin, Consumer dikna hmachhawn fo tawh pa fel tak, Pu Thanglura, Venghlui chu ka pun ta ngawt a. Ani chuan Court thlenga kal a hreh loh thu nen vau titihin a dawr ta a. A ni pawh vawi hnih a kal hnuah a fel mai thei lo. A vawi thumna chu ka document kimchang nen kan kal dun ta a, Pu Lura khan theihtawpin min beihpui a, nikum November thla tawp khan a rawn fel ta hlawl mai a ni.

Chuvangin EPF zawmtu school emaw, private/company mite pawn a viltu bik neiin emaw, ngaihven kartu an neih a ṭha ber. Ka rin aiin EPF-a thawktute hi an zawmthaw tlat.

- Lal Rinmawia