Mi hnuaihnung ni tura inthawn chhuah hi

Tunlai hian Mizoram Youth Commi-ssion hmalaknain Mizo ṭhalai engemaw zah chu Mizoram pawn, Vairamah thla ruk thla sarih te eizawnna ngelnghet zawk nei thei turin training nei tura tirh chhuah an ni tawh a. Ṭhalai tam takin an hmang ṭangkaiin an hlawkpui ngei a rinawm.

Mizoram Youth Commission hian ṭhalaite eizawnna tur hmakhua ngaiin Vairama company hrang hrangte nen hian thawkho turin Memorandum of Understanding te pawh an ziak hial reng a ni. Chung company-te chu - Emporium Training & Consultancy Pvt. Ltd., Chanakya IAS Coaching Academy te leh a dang te pawh a ni zel mahna. Tunah hian chak taka hma lain Civil Services Coaching Centre chungchangah pawh hmalak mek a ni a, a lawmawm hle.

Hemi piah lamah hian Vairamah spa (malis), Aviation & Hospitality, Travel & Tourism Management, Retail Manage-ment,BPO leh a dangte training tir turin company thurualpui a nei bawk a. Mi ramah chuan heng certificate course reilote chhung zir tur pawhin sum leh pai tam tak sen a ngai tih kan hre ṭheuh awm e. MYC hnuaia ṭhalai eizawnna kawng zira vairam lama kalte hi an kalna leh zirna senso hi MYC-in a tum sak vek rualin ṭawng mawi lo ni lo se, thiamna sang tak nei an ni lem lova. Tu huatthu cheng lo se, Certificate Course/ Foundation course kan tih ang lek chauh an ni hlawm.

Mizoram a zau taka hetiang kawnga hmalakna la awm ngai loah MYC-in hma a rawn la ta hi a lawmawm viau rual hian thil ngaihtuah chian ngai a tam hmel khawp mai. Kan Mizoram Sawrkarin ṭhahnem ngai taka Mizo ṭhalaite tan hma a lak ve mek lai hian kan hmalak mek dan hi kan ram leh hnam damna tur leh ṭhalaite mamawh ber a ni chiah em tih kan thlir thiam a ṭul hle awm e.

Ram pawna thil zir tura Youth Commi-ssion hmalakna a tirhchhuah te hi an training centre thleng thlenga vil zui an ngai khawp mai. A chhan chu training lo pe a, kan sawrkar leh ṭhalaite kut aṭanga sum tam tak lo latu hnamdangte hian kan ṭhalai tirhchhuahte hi an ngaihven tawk tak tak lo niin a lang. Sum siamna hmanruaah chauh an hmang niin a lang. Youth Commission lama sawrkar hotu lute pawh hian hei hi hria se - an nin hmingṭhat laa vairama eng eng emaw hna beitham te te (ka han tilui ngat teh ang) training tura an nawr liam ve ngawt zinga mi ṭhenkhat hi an thil training an tih tak tak theih loh avang te, an nungchang an thunun theih hlawl loh avang te leh sum leh paiah harsatna an neih avangte in Vairama Mizo lo awm hlun deuh tawhte hian an buaipui a ngai ve ta fo mai.

Thil chiang tak mai chu tuna kan sawi Youth Commission hmalak mekna hnuaia Mizo ṭhalaite vairama training tura kan tirhchhuahna ang training tir tur hian Mizoram chhungah ngei tih ve vek theih a ni. Vairamah kalna man ringawt pawh a hautak a. Chumi piah lamah Hostel fee sum tam tak chawi a la ngai bawk. Mizoram chhungah, mahni in leh lo aṭanga kan tih ve theih hi eng vangin nge vai ramah kher kan tih? Tin, hetiang institution ho te te hi chu Mizoram chhungah din ve mai ila, kan ṭhalai training tura fehchhuakte zinna senso leh an hostel awmna man ringawt pawh hian heng institution te hi chu a din theih thawthang ang chu. Ṭhalaite tan hnathawh tur siamna ṭha tak a ni nghal thei ang a.

Ṭhalai lehkhathiam tam tak hi heng zirna ina zirtirtu an ni nghal thei a ni. Eng vangin nge kan tapchhap zawlah ngei kan mamawh ngawih ngawih eizawnna/ employment hi hnamdangte tan kan vawrh chhuah luih fo ṭhin le? Heng zirna inte hi kan ramah ngei din ve ta mai ila. Training pe tur bik atan zirtirtu/ trainer tur hi duh leh zuk training tir ve chauh zawk ila. Kan tapchhak zawl aṭanga Post Graduate kan zir theih ve meuh tawh hnuah pawh zirna tenau lutuk zawk; spa vel leh Tourism Management vela certificate course vel lek zuk zir tura sum tam tak senga ram/ state pawn a inthawn la tum tlat mai hi tlakranna kawng pawi tak a la ni thei a ni.

Sum tamtak sengin kan thalaite hi hna sang tak ni lem lo zuk zir tur hian kan tirh chhunzawm zel theiin a phal pawh kan phal reng thei dawn em le? Mizo ngei trainer tur in chherchhuah a, Mizoram chhungah ngei training na tur zirna in din ve mai ila, hun lo kal zel tur atan kan daih rei zawk em em ang. A zirchhuakte hna hmuh awlsam nan sawrkar/ mimal sum seng lem lova vairama Placement Agency te nena thawhho lek chauh hi a tawk thawkhat viau hmel tlat a ni.

Heng ṭhalai fehchhuak tate zingah hian an training na aṭanga tal chhuak a, an hna zuk zir ai pawha hniam fe zawk thawk tura mahni lei rah chhan chhuih pelh lui ngat hi an awm ṭan der a ni. Thla ruk bawr vel lek Vairam changkang zawk leh mi hausa zawkte khawsaknaa hna zuk zir hi hlawkpui fe fe an awm theih laiin mi lehkhathiam sang lutuk lem lo leh rilru paukhauh takte tan lo chuan thil ṭha tak a ni lem lo tlat. Hah taka lehkha lo zir ṭhinte leh ṭhahnemngai taka hna lo thawk tawh ṭhinte hlawhtlinna an zuk hmu a. An lo thawhrim tawhna aiin tuna an nawmchenna leh khawsak changkang tak te chu a awt leh itsik tawk lekin an awm thei tlat a ni. Chu chuan hmanhmawh taka sum awlsam siam duhnaah a thlemthlu
ṭan ve mek hlawm zawng a nih hi.

Youth Commission-in a tirh chhuah Mizo ṭhalaite zingah a tirtute'n an zir tur an ruahman sak zir ta lem lova mahni a talchhuak a, tlema hna hnuaihnung zawk thawk ta daih pawh an awm. Hetiang zela ram leh hnam, mahni ngei pawh inhmangaih tak takna tel lova kan kal chhoh zel chuan, tuna kan sawi hmalak mekna hi chu mi hnuaihnung zawk ni tura in thawnchhuahna tih mai a la awl ngei ang.

- PC Lalnghinglova

Chhingchhip; Camp: Delhi; 08375838676