Hausak thut leh Mizoram

Kan naupanlaia kan zirtirtupa thusawi ka hriatthiam theih loh chu, "Hausak thut hi a hlauhawm," tih kha a ni a. Keini kha chuan hausak thut kha kan chak em em a ni si a, kan zirtirtupa khan a hlauhawm a ti bawk si! Kum a lo tam tak deuh hnu hian hausak thut awmzia leh a hlauhawm dan hi kan man ve ṭan dawn chauh a lo nih hi maw.

Aizawlah hian, "Saw saw tu in nge?" ti ila a veng neitu pawhin an chhan hleih theih loh in hi a ding thluah tawh an ti a, an chhanna neih chu, "Hmanah chuan chumi in hmun chu a ni a, a hralh tawh a, chumi hnuah tuin emaw a lei a, a lei tukah in hmun a laia a sa nghal a, a nei chur chur asin," tih hi a ni an tia. I rilru lamah Chiahpuam leh Khehpuam a lo lang nghal chuai chuai em? Hausa thut hrim hrimho hi rinhlelh nghal mai tur em ni dawn aw?

Tichuan hausak thut dan dang chu compentation lak a ni. Chief Minister berin compentation hnamah min chhuah tawh a, anni chhung pawh hian compensation hi an lo tel ve nual tawh a ni awm asin.

Compensation hi chi hnih a la awm leh a, pakhat chu pi leh pu, nu leh pate hun aṭanga kan ram neiha sorkarin kut a thlak dawn avangin kan ram an neih manah pawisa kan dawng a, hei hi chu an vanneihnaah ngaih mai a ṭha.

Compensation chhe chi a awm a, chu chu sorkarin project a nei dawn tih hriat avanga mi ram man tlawma lei khawma sum siamnaa hman hi a ni. Hetah hian Mizorama officer tam tak hming sawi tur a awm a ni. Compensation phuah-chawp siam ṭhinte hi Chiahpuam leh Khehpuam ti duhtute nen tlar khata ṭhu tur an ni.

Contractor emaw, supplier emaw, con-sultancy firm emaw emaw pawh ni se an hausak thut chuan rinhlelh tho tho tur. Dik taka thil tih chuan hausak thut theih a ni lo. Miin hna a hmuh theih riau chuan an hotu lam nen an insawirem a ni deuh zel. Hna inchuh luih luihna khawvel, kan thiam ang miin an thiam ve ṭhinna khawvelah hian hman ni lawka mi naran kha a lo hausak tawh chuan tute emaw kha sum hmangin emaw, share hmangin emaw a tilungawi a nih loh chuan a ṭawngṭaina a powerful over bik a ni mai tih hi keini ang mi mawl thlir ve thiam dan a ni.

Hausak thutna ram Mizoramah hian smuggler, black money khawihtu, contractor duham, mi tlawn thiam leh sum vawmna tur hre chi supplier leh firm hrang hrang enkawltute hi an va han lian chak thur thur em! Thil ṭha lo titute hi ka awt ve zeuh zeuh alawm, hlobet angin ah thluk an ni har tawh ka tih vang a ni.

- Lalremmawia