MALTA, AW MALTA, MAK AN LA TI ANG

1998, tuna Stein's Memorial High School hming put chhan tak, Sap missionary Graham Stuart Stein's te pafa thum Manoharpur (Odisha)-a car chhunga hal hnan an nih kha, khatih hun laia Middle School kai chin chuan kan la hre reng awm e. Mizoram khawpui ber Aizawl ah pawh Sawrkarin chawlh puang meuha kawng kan zawh ve a. Kohhran pawl hrang hrang hruaitute thutluknain Sipai lammuala intawhkhawm a nih a. Naupang tê kan la ni, kawng ka zawh ve. Kha mi ṭum kha alawm, a hma kum lawka an cassette aṭanga ka lo hmelhriat ve, Pu Hmangaiha (MALTA) kha a taka ka hmuh ve chu.

Chhim lam aṭanga kawng zawh kha kan tam khawp a, Republic, College veng, chuanhnuai lam zawng zawng kha an rawn chhuak chho a. Lammual pana kal Sikulpuikawnah kan han intawkkhawm chiah kha chu pui tak a ni. Min karchehtute ve ve khan mual an liam ta. Pakhat zawk chu chanchin sawi tham fe nei ve tho ka pu Zohminga, Tlangnuam (L)J.L cinema hall gate keeper ṭhin kha a ni a, pakhat chu amah Pu Hmangaiha hi a ni. Kuhva a heh si, kawng tluan khan fiamthu a thawh a, mi chhiattawh karah kan ri leh dar dar ṭhin. A ṭawngkam mawi deuh, kan kawngzawh chhan nen inhmeh ka tih ka la hriat reng chu, fiamthu titak a, "Kristian kan nih hi, nek chep kan duh lo," tih kha. Upper Khatla kawng pheiah khan kan chêp reng lah tak a.

Kum 2007 vel aṭanga ka kawm hual, ka vuaicha em vanga tun thlenga ka la kawm tak loh chu, kan Sande Sikul inkhawm bang ka phone kan keu mai chu Pu Chhana thih thu zualko a lo awm vàng mai a, a pawi ka ti thuah hnih tak zet.

Amah hi kan hriat ṭheuh angin fiamthu hla sa ṭhin, mi tihlim ṭhin tak, tam tak nuih liampui puat a ni. Amaherawhchu, hei tak hi a nia, ka kâwm hman lo a ka ui ka tih. A hlaah hian thuchah tam tak a inphan chiât a, a hla hnuhnung lam, 'Bal an chhum Kel a bê' tih ngat phei kha chu ka la fuh ngang mai. Mizoram hi a vei ve tih pawh a chiang. "Pu te u, hmui chauha ram vei lo hian, in hmangaih Zoram tan hian thawk r'u.Rorelnaa in au rawlte hian, awmzia a nei lo. Vai Kel be a iang thlawn e," tih te.

Sawi tur a tam mai. Hre tur phei chu ka ni chuang lo a, a damlo tih ka lo hre miah lo a. A boral ka hriat leh a natna ka hriat chu a inrual a chha a nih chu. Ka ui ngei mai. Zoram Arsi Lian, Muangin chawl se.

Malta, aw, Malta. Mak kan la tizel dawn chu a nih hi.

- Kima Tuallawt