Supply Minister hian a hna a tlin lo reng em ni?

Kan thupui hi chhan thiam har tak, chhanna chi hrang hrang awm thei a ni. Political Party zingah pawh Ruling Party chuan kan Supply Minister zahawm tak hian a hna a tlin hle a ni an ti ang.

Eptu lam erawh chuan Minister chak lo leh hna tlingl o tiin an sawisel hle bawk ang a. Tun hnaia Food Security kalpuinaa thil dik lo eng emaw zat awm avangin Party ṭhenkhat phei chuan nasa takin an sawiselin Supply Minister chu hna tlin lo tiin bang turin an nawr nghe nghe a nih kha. Hengte hi Party inbeihna satliah mai ni lovin, mipui hmakhua ngaia ti niin an insawi. Mahse, Party hrang hrangte hian an Ministry hunlaia thil awm dan te an thlir kir duh chuan indem thei an ni em tih an inngaihtuah chu thil finthlak tak a ni ve.

Consumer thlirna aṭang chuan tunlaia kan supply dinhmun hi a ṭha thawkhatin a lang. Thil fel lo leh dik lo tam tak karah eibarah hi chuan kan zia viau mai. LP Gas ngat phei chu kum dang, hun dang zawng aiin kan ziaawm. Gas hi kan hmu ṭha viau a, chutih laiin subsidy erawh chu consumer-te account-ah a lut ṭha lo viau tih report ka dawng nual mai. Heng gas buk tling lo te, hman theih loh te, gas leak chungchangah te hian harsatna chu a awm reng tho mai a. Heng thilte hi awm ve reng thei leh thleng thei reng a ni.

Supply Department hmalakna piah lamah Local Authority te mawhphurhna a ni tel a. Chuvangin, mipui leh Sorkar ṭanrualna leh thawhhona aṭanga sut kian theih a ni a, nasa taka mipui kan inzirtir a, kan in hrilh hriat a ṭul. Local Council leh tlawmngai pawlte hengah hian an ṭanrual hle a ngai. Chumi atan chuan Gas Rules and Regulation te, Consumer Protection Act and Rules te an zir peih ve a ngai a ni.

Tun hnaiah mithiam ṭhenkhat, consu-mer-te hmakhua lam rawn au chhuah pui an awm ṭan ta a, a lawmawm takzet a ni. Kum 1995 aṭanga kan lo ṭulpui tawh hi han buaipui ve mawlh teh se, sumdawng hausa leh dawrkai miliante kara mirethei inrawlh hi namenlo tak mai a ni. Vantlang mipui, nawlpui leh pawl lian pui puite hian chuti teh lua min lo phurpui loh phei chuan kan ho der thei a ni. Consumer pawl awmchhun lah chu Chhura chengkek lo tur ang mai kan ni a, kan ban phak chin a tawi em hlawm rih a nih hi.

Mizoramah hian mipuite dikna leh chanvo humhalhna lamah kan la hniam hle. Helam thu han sawi han sawi pawh hi zahthlak tihna lai ka nei fo mai. Mi tam zawk lah hian Consumer Forum leh Association te, Consumer cooperative te hi kan lam pawlh fo a, dan kan neihte lah hi kan hmang ṭangkai lo hle zel rih a. Roreltu leh thuneitu ek ek apiang dan emaw an inti cham chi mai bawk a, MLA ho tam zawk lah chuan dan siamtu an nih hre chang lek lovin Contract leh Supply hna petu emaw an inti deuh zel bawk a. Dan leh hrai emaw, dan leh dun te chu kan pal liam puat puat a, kan pawisa hek lo a nih ber hi maw!

Supply Minister hi viak ṭha tak a ni tih ka ziak tawh. Mahse tun hnaia Food Security a thil dik lo, thil tihsual engemaw avang khan sawisel an kai deuh a ni mai pawh a, thil dangah chuan ṭha ve thawkhata hriatna ka nei.

Tun ai hian Consumer Affairs leh Legal Metrology lam te hi ngaihven lehzual sela thil duhawm tak tur a ni. Ration Card chhuak thar berah hian pian kum leh ni te chu a inang ta put vek mai a, keini chhungkua pawh New Year-ah kan piang vek mai a, Birth Day lawm a hautak lo ngawt ang le!

Supply Department tih chakna kawng ṭha ber chu, Supply Department aṭanga Legal Metrology leh Consumer Affairs te indantir hi a ni. Heng Department te hi Supply Department nen hian inkungkaihna an nei lo; a rang a ranga Department hrang hlaka dah vat chi an ni. Food & Civil Supply Department tan pawh a thawven thlak zawk ngei ang.

Kan sawi bawl bawl ang a, Supply Department hotute hian Consumer Affairs leh Legal Metrology te hi an ngaihtuah vak hman lova, Zoram mipui hmun hrang hranga awmte ei bar hnianghnara pek hi an tum ber chu a ni mai. Chuvang chuan heng Department pahnih te hi lo ngaihthah deuh pawh nise an demawm lem love. Department chak leh hna thawk ṭha kan duh chuan Department ṭhen tet hi a ṭha ber chu a ni mai a, hneh taka enkawl theih pawh a ni. Legal Metrology leh Consumer Affairs te hi a hranin awm ta se, nasa takin hma kan sawn ngei ang. Minister pawh tun ai hian a chak lehzual bawk ang. State dang hmasawn ruala hma sawn kan duh chuan, heng Department pahnih te hi lak chhuah vat tur a ni mai. Engkim hian kalphung a nei a, zir peih a ni kan mamawh ber chu...

- Lallunghnema, Charity Lodge,

Ph: 9402321590