CHHIAH PETU BE DUH LO, PEK ZEL TLAK AN NI EM?

Tun Assembly Session-ah Commer-cial Vehicle (lirtheia eizawng) te chuan kum 2011 - 2016 thleng sorkara chhiah an chhun luh tawh (Tax Revenue) chu Rs. 41,19,41,487 lai a nih thu kan hmu a. Commercial Vehicle te avanga Sorkarin sum a hmuh ṭhat thu tarlan a ni bawk.

Heti chung hian Commercial Vehicle-te chu an harsatna leh buaina tawhah sorkarin ching fel tura a la be duh lo hi chhiah petu tan chuan a va na dawn em, in hmuhsitna bak a ni lo.

Hei hi kan Sorkar chet duh dan a nih dawn chuan nakin lawkah sumdawngho (merchant) emaw chhiah petu dangte pawhin harsatna tawk se Commercial Vehicle-te chunga thil thleng bawk hi an chan tur tho a nih hmel hle mai. Hmun dangah chuan chhiah petu (tax payer) te ngaih pawimawh leh ngaihsak an nih laiin keini ramah chuan biak duh loh leh deusawh khum an ni zawk ta a ni.

Tuna Commercial Vehicle Joint Action Committee (CVJAC) ten an lungawi lohna neih pawh hi thil tih awm tak a ni. Chhiah tihsanah an phun lo, harsatna siam zul sak an ni erawh an duh lo mai a ni. Tu chungah pawh hetiang hi thleng thei a nih avangin mipui pawhin lirthei pute (driver) hi dem mai loh a ṭha; kan chungah a thlen ve loh nan support pek hial zawk chi an ni.

Khua leh tuite chhiah pe ṭha tura duh si a, an harsatna tawh leh buaina neih ngaihsak duh lotu Minister chu bang hial tlak a ni. Kan pipu te hunah pawh hetiang lal sual takin chhiah chauh a duh a, khaw mipuite harsatna a ngaihsak duh lo leh chin fel sak ngai lo chu an pem bo san vek zel a nih kha, zahthlak tak a ni.

Chhiah pek tling khawm hi thil ṭul lo intih zahawmna hmanrau atana lei emaw nawm chenna atana hman chi a ni love. A petu zawkte hi zah phu an ni a, an harsatna tawhte phei chu chin fel sak mawlh tur a ni. Mizoten chhiah pek kan hreh hauh lo a, hmanna dik lo leh harsatna insiamsak erawh a ṭul kher lo e.

- Lalduhawma