Mizo Hlakungpui Mual-ah ngei aw...

"Hnam lunglêng, Khuanu thil siam tin rengte'n an thinlungah thu a sawi ring bik em ni?" tih tur khawpa Hnam lunglêng Mizo hnam, (ṭhenkhat thinlungah a rik dan a dik zawk tâkin, "Zo Hnam") te thinlung hi Khuanu'n a hranpa chuan a duang bik êm lo ang a. Mahse lungleng hnam zawng kan ni na meuh mai. Ṭhal khaw ro ri re te hi nuam lo tih ahnêkin kan lung tilêngtu a ni fan a. Ṭhal khaw romei zâmin kan thinlung a zem tel a. 'Ṭuahpui leh Vau an vul leh ta' tih thu chauh pawh hian Zo lunglen a hril chhuak viau. 'Ṭhal favang kawl êng leh turnipui' aṭanga 'Khuang ruah chiar nghian' thlengin kan rilruin a ngai a, kan lung a kuai hle zel a ni.

Chhawrthlapui leh si-âr kan lam âwl lova. Phunchawng leh nauban te chu hnam dang pawhin a mawi an ti ve tho ang. Ainawn erawh pangpar mawia han sawi vul chuk tur ni mah suh se, Siamtu'n ainawn pâra a themthiamzia a thuhrûkte chu kan hmu fuh bik a ni mahna. Tlangvalin 'ka Aitenawn-i' tia a bialnu a koh chinah ngat chuan, nula tân lâwmna thinlung a pâr a, tlangvalin a rilru chhung ril sawifiah thiam phâk loh a leih bua a ni. Chutianga Zofate lunglenna kai chhuaktu chu kan thu leh hla hi a ni. Chutianga thu leh hla hlu tak tak min hnutchhiat a, min chawm sei liantute chu "kan hnam rohlu" kan ti lo thei lovang. Chawimawi an phu a, hnam angin min hui khawm a, min tung ding a, min chelh ding bawk.

Thu leh hlaa Zofate min chawm liantu, khaw thim hnuaia khâwnvâr min chhit sak a, khaw engah pawh kan kawng khalh ngiltute hi ṭhangtharte thinlunga an pawimawhna tarlan zel a nih theih nân kum 1986 aṭang khan anmahni chawimawina hmun 'Mizo Hlakungpui Mual' chu Khawbung daî-ah siam a ni a. Kum 10 dan zelah seng luh an ni. Heng seng luh turte thlan nan hian tehfung siam a ni a. Seng luh âwm tak seng luh loh pawh an la awm nuk ang. Hun inrial ngai deuh te, Mizo Hlakungpui Mual buaipuitute'n an buaipui zawh tawk seng luh tur an bithliah zâta an la len loh avangte'n tehfunga la mâm kim lo te, la mawi zo lo deuhte pawh an la awmin a rinawm.

Chutiang zawng zawng pawh chu hunin a la rawn hril chhuak zel turah ngai ila. April ni 7-8. 2016 hian mi 3 - Lalsangzuali Sailo, R.Vanlawma leh James Dokhuma te seng luh an ni dawn a ni. Mizo Hlakungpui Mual Committee chuan thu leh hlaa Zofate min chawi liantute hlut a, anmahni chawimawi duhna thinlung nei zawng zawng chu he hunah hian tel vek thei se an duh a, chumi tur chuan Mizoram chhunga cheng bâkah khawvel hmun hrang hranga awm Zofate an sawm a ni.

Zofate hi ram bung ṭhen hrang hrangah chêng mah ila, kan inunauna tikeh tur hian hêm chi hrang hrang thlâk ni ṭhin mah se, kan thu leh hla hian min phuar khawm a. Tal chhuah tumin er sa teh mah ila, hrui fân thei ang maiin min hnuh khawm hun a nei leh ṭhin.

Mizo Hlakungpui Mual awmna hi i hre lo palh hlauh a nih chuan, Zofate chenna hmun kawk kual zai zai la. A lai takah kawk chat la, chutah ngei chuan a ni Mizo Hlakungpui Mual hi a awm. A chheh vel i hawi kual ang a, pi pute lo khawsak tawhna hmun hlui leh sulhnu hlui chhiarsen loh (la hai chhuah kim loh avanga chhiarsen loh) i hmu ang a. 'Pi pu sulhnu, hnam tin lunglai kuaitu' tihte chu nangma ir-âwm aṭanga chhuak niawm fahranin i chham kur nguai ngei ang. April ni 7-8 ah Mizo Hlakungpui Mual-ah ngei aw...

- Mapuia Hnamte