Sorkar hian a thu zuk ṭhin lo se
Mizoram sorkar chuan dan a duang ṭhin a, mahse pawl anga nawrna avangin a thu a zuk fo mai hi a ṭha lo ngawt mai. Thu a zuk tawh loh nan ministry lam emaw, official lam emaw hian zirchiang hmasa phawt ṭhin se a ṭha ngawt ang.
Tunhnaiah Trans-port department-in dan thar a duang a, lirthei neitute tana harsatna thlen thei a ni a. Chu dan a duan chu sut leh turin lirthei neitu pawl hrang hrang intelkhawm chuan nawrh an huaihawt a, tunah pawh an in tintuah leh mek a. Mahse a tawpah chief minister an hmu a, inbe leh turin thu an dah a, nawrh huaihawt an tum pawh an ṭhulh leh ta rih a ni.
Commercial Vehicle Joint Action Committee (CVJAC)-te thil nawr hi a awm lo lutuk lo a, mahse heng an tana dan sakei hi awm lo lutukin a lang lo na a, mahse a hleihluak deuh ni ngei tur a ni. Transport minister pawh an hmu tawh ni awm tak a ni a, official lam pawh hmuin lehkha pawh an thehlut tawh bawk a ni. Chung zawng zawngah chuan an beidawn vangin ram pum huap nawrh huaihawt an tum kha a ni a. A tawpa tawpah chief minister an hmu a, beiseina sang tak nen an inbiak leh hun an nghak ta rih a ni.
Chief minister an hmuh a, dan duan sa
ṭhiah emaw, khirh lutuk loa siamṭhat theih a nih chuan eng vangin nge chief minister an hmuh hma pawha he dan thar hi na lutuk loa an duan mai loh le?
Dan duangtute hian a nghawng tur thlengin an zirchiang hmasa lo a ni thei em? Official-te lakah CVJAC an beidawng a, tansport minnister lakah an beidawn leh hnuah chief minister chuan dan thar duan chu lo ennawn a tiam ta a, an nuar rih dawn ta lo a ni.
Lirthei neitute tana phurrit siam hian mipuiah nasa takin nghawng a nei ṭhin tih hi sorkar hian a hre tur a ni a, a zirchiang hmasa bawk tur a ni. Dan an duan dawnah a nghawng hmasa ber tur lirthei neitu pawl hrang hrang hruaitute a kawm hmasa tura ngaih a ni a. Mahse, chutiang ni loa dan a duan a kalpui nghal ngawt ṭhin hi lirthei neitute mai ni lo, mipui zah lohna lian tak a ni. Hei hi official lam pawhin an sorkar hrawn mek an venpuina tur ni awm tak a ni.
Taxi intlanchhawk pawh he dan thar vang hian kalpui theih a ni ta rih lo a, a chhan chu transport department-in chhiah a lak dan leh commercial vehicle tana khuahkhirna dan a siam vang a ni a, sorkar dan siam reng reng uluk taka duan ṭhin tawh nise a duhawm khawp mai.
- Lalkhirhvela