MIZO ṬAWNG

Tun lai hian ṭhangtharten Mizo ṭawng hman dan dik an rawn vei ṭan a, a lawmawm hle. Mi thiamten an sawi angin, ṭawng a bo chuan hnam a bo an ti a, Mizo ṭawng pawh hi bo ta se, Mizo hnam chhui tur a awm lo mai thei a ni. 

An chhinchhiah dan chuan, India ramah 1961 khan ṭawng hrang 1652 a awm a, 1971-ah chuan ṭawng hrang 108 chauh a awm tawh. (Aizawl Post 10.8.2013) kum sawm chhungin ṭawng hrang 1544 a ral hman tihna a ni. Tichuan, Mizo ṭawng pawh hi ṭawng ral mai thei zingah an telh ve niin an sawi. Chuti a nih chuan, Mizo Subject pawh hi zirlaibuah kan uar zel a ngai ta a, 8th Schedule-ah pawh hian tel ve tura nawr mek a ni a; mahse, kum sawm zet a liam hnu pawhin engmah a thawm hriat a la awm lo a ni. Mizote hian kan ṭawng hi 8th Schedule-a kan telh ve a ṭul ta hle a, chumi ti hlawhtling tur chuan Mizo hnahthlak kan thurual a ngai a ni. 

Population thuah chuan kan aia tlem zawk 8th Schedule-a telh tawhte chu Kashmiri, Dogri leh  Santali te hi an ni. 8th Schedule-a tel ve hi Mizo ṭawng ral loh nan leh Mizo hnam bo loh nan a ṭul hle a ni. 

Mizoram hi ram zim te mah ni ila chi peng hrang kan tam ve hle a, Mizo hnahthlak chi peng hrangte hi eng chi pawh ni se, Mizo vek kan ni tih hi kan hriat a ngai ang. Pu Zatluanga'n Mizo Chanchin tih a ziaknaah chuan Mizo chi peng hrang hrangte chu hetiang hi an ni. 

Hmar chi peng - 89, Lusei - 79, Ralte - 45, Paihte - 29, Fanai - 13, Pawi - 12, Chawhte - 10, Chawngthu - 9, Khawlhring - 8, Renthei - 8, Rawite - 7, Khiangte - 7, Fahlam - 7, Ngente - 6, Tlau - 4, Vangchhia - 3. A vaiin 336 vel a ni. Hei hi a dik famkim lo deuh mai thei. Entir nan, Ralte pawh hi Siakeng - 20, Kawlni - 24, Khelte - 12, Lelhchhun - 9, an vaiin 45 ni lovin 65 an ni. 

Hetiang hi Mizo hnam vek kan nih dan chu a ni a, chi peng hrang hrangte hi mahni pian leh murna hmun leh chi bil bik awmna hmunah chuan Mizo ṭawng hi a danglam thei hle tih kan hriat a ṭha. Ram bial bik ṭawng hman dan pawh a inang vek thei lo. Entir nan ṭhenkhat chauh han sawi ila. Mizoram khawchhak lamah chuan Chimlim  tih hi mi harhvang tak, bai dai baw harh sawi nan an hmang a, khawthlang lamah chuan mi invawng fel, mi chengvawng tak sawi nan an hmang ve thung. Chhim lamah chuan Palang an tih hi Hmar lamah chuan Saidawium an ti ve thung. Hetiang hian a bial bikah chuan Regional Variation an tih hi a awm thei a ni. 

Tichuan, Mizo ṭawng kan hman tlanglawn atan ṭawng in hman tlan Common Language kan neih hi a ṭul khawp mai. A chhan chu, zirlaibuah Mizo subject te kan zir tel lo thei lo va, Mizoram chhim leh hmar, chhak leh thlangin kan hman tlan theih hi a tehna atan a pawimawh fo ṭhin. Chuta tan chuan kan mi hmasaten min kaihhruaina a pawimawh a, a bik takin lehkhathiam hmasaten zirlaibuah leh kan sakhawbupui Bible-ah an ziak dan leh ṭawng an hman dan hi vawiin thleng pawha min kaihruaitu tlangpui tak chu a ni ber fo ṭhin. 

Mizo ṭawng ziak dan an uluk a, Mizo ṭawng hman dan pawh an fimkhur a, chu chuan vawiin thleng pawha min kaihruaitu a ni lo thei lo. Amaherawhchu, zaa za chuan a dik famkim vek tihna a ni bik lo va, Bible lehlin ṭawngkam pawh an hruaitu ber pawhin "Bible hi kum 50 chuan lehlin ṭhat a ngai zel," a ti a. Tunah pawh hian Bible dik lo thei lova kan ngaihah hian mipain fa an hrintir zel hi chu siam ṭhat ngai zingah a tel ve phawt ang. (Matt. 1: 2-11& etc) A tlangpui thuin, Bible chhim leh hmara kan mi thiamten an lehlinna ṭawngkam leh Mizo ṭawng ziak dan an hman hi chu a la rintlak ber fo a ni. 

Mizo ṭawng ziak dan hi han sawi leh ila. 

1) Ziak tih hi : Mizo ṭawngah hian verb emaw, Adjective emaw pawh ni se kan modify vek lo tih hi hriat a ṭha. Chung zinga pakhat chu ziak tih hi a ni. Tun laiah hian mi ṭhenkhat, ziak mi ve takte pawhin an modify a, ziah tih hi an hmang fo ta. Pilata ṭawngkam Bible-a ziak a nih dan chu "Ka ziak kha ka ziak zo tawh" (Joh. 19: 22) tiin ziak a ni. Ṭhenkhat chuan "Ka ziah kha ka ziak zo tawh" an ti mai thei. 'Ziah' modify-na chu 'ziat' tih hi a ni. "Zawngṭah ziat la, i ziah zawh hunah ei rawh," ti ila, hetah hian ziah hmanna chu a ni. 

2) Gender chung changah : Mizo ṭawngah chuan hmeichhia leh mipa kan lam kawp dawn chuan hmeichhia kan lam hmasa zel ṭhin. Entir nan : Nu leh pa, pi leh pu, hmeichhia leh mipa, nula tlangval, tleirawl leh rawlthar, a hmei a pa kan ti ṭhin a, pakhat chiah mipat hmeichhiatna tihah chauh hian mipa kan hmasaktir ṭhin. Hei hi hman thiam a ṭha. 

3) A ngiala ngana hrilhfiah tum hi: Mi ṭhenkhat, Mizo ṭawng tih dik tum lutuk hian a ngiala ngan (literal meaning) - a sawi ching an awm ṭhin. Zunchhuak, ekchhuak, luakchhuak tihte hi a chhuah hmain 'chhuak' kan ti vek. Tapchhak pawh tap aia chhak sawina a ni lo. Chutiang bawkin chhuatthlang pawh chhuat aia thlang sawina a ni lo. Khanchhuk pawh a phei thei ang bera kham a ni. Ketaminu pawh Ketamipa a awm lo a, Chingpirinu pawh Chingpiripa a awm lo a, Chepa pawh Chenu a awm lo. Mipaah pawh Minu an ti ngai lo. Heng hi ṭawng a ni tih hi hriat mai tur. 

Sawi tur tam tak a awm a, tun atan chuan heti chin hi ni mai se a ṭha ang e.