Party worker-te la insum rawh se

Sorkar thar a piang a, ZPM-in sorkarna siamin Minister leh a kaihhnawihten office luahin an inbun fel ta. Hetihlai hian sorkarna siamtu party worker-te pawh an rilṭam tawh viau mai thei. Mahse lo insum hram hram teh se.

Sorkar hmasa kan hrawn tawhte aṭang khan zir tur tam tak a awm. Party mi induhsakna a nasa em em a, hna lak chungchangah pawh anmahni mi an thun zar zar a, contract ni se, an inpe mawlh mawlh mai a nih kha.

MNF sorkarah phei kha chuan Minister-te khan contract thawk tur bik an nei vek a, an duhsak zawngte hna an inpe nghek nghek a, contractor-in tender a chhàn ták reng reng awm loin restricted tender-in hna an inpe a nih kha.

An hotu ber Chief Minister khan hleihluak takin a duhsak zawng hna a pe char char a, sorkar hnathawk pawn a hun taka hlawh an lak theih loh laiin a duhsak zawngte bill a tang thei tlat lote kha mipuiin kan tuar em em a ni.

Tunah sorkar thar a piang a, Kohhran Upa fel takin a ho a, a enkawlna hnuaiah kan kal chho ve dawn chu a nia. A lakah rinna pawh kan nghat thui viau niin a lang.

Khatiang em ema induhsakna ang kha kan sorkar tharah chuan awm lo se, dik takin ro han rel teh se. Party mi leh sate pawhin huamhap bik lo se, hna lakah pawh fair takin kal se tih hi mipui au aw a ni e.

- Hmingliana