Sorkar ṭha siam turin mipui kan pawimawh

Sorkar ṭha siam tur hian vote thlaktu mipui nge pawimawh ang, sorkarna siamtu political party? tih hi inzawt ta ila, kan chhanna neih chu a inang lo furin ka ring. A enga pawh chu nise, sorkar ṭha siam tur chuan, mipui kan pawimawh angin sorkarna chelhtute pawh an pawimawh khawp mai.

Sorkar ṭha siam turin mipuite hian pawimawhna tam tak kan nei a, Political party-te sorkarna siam tir theitu chu mipui kan ni. Kan thlantlinte an chak a, an ṭhat viau chuan kan vannei a ni mai a. Duh taka kan thlantlinte an ṭhat tawk loh chuan, a mawhphurtu chu vote petu mipuite kan ni tlat.

Mizoram MLA inthlanpui pawh a kumah chuan 2018 daih niin hre mah ila, tun aṭang hian party hrang hrangin boruak an nei chho ṭan leh ta a. Sorkar laiin a zawna term thum sorkarna siam ngei tumin ṭan an khawh a, Opposition party lian ber lah sorkar inbeisei takin hma an la ve mek bawk a. Chutiangin party lian vak lo te pawhin, party mala sorkarna siam inbeisei lo mah se, sorkarna siamtute zinga tel ve ngei tumin hma an la bawk. Tun dinhmuna party hrang hrang hmalak dan en hi chuan, ram siamṭhatna lam ai mahin, engti kawng pawha sorkar tum hrim hrimna lam hi a kawk deuh ber.

Congress hian an MLA neih sa, senior deuh tawh te an thlak kual thiam viau chuan sorkarleh ngei tura rin an ni. Chutihrual chuan, MNF lam pawh hian, party mi ni em em lo, mithiam leh mi hmingtha an khawnkhawm peih chuan sorkar theihna chu nei lo an ni bik lo. Chutihrual chuan, mipui hnawl tawh, tute mahin kan it rawn ni chuang lo te, an ngir khup a nih chuan an sorkar lovang tih hi mi tam tak rin dan a ni. ZNP lam pawh hi MLA nei ve thei dinhmunah an ding a, MPC pawh nil ngawt tura rin chu an har.

Tlang hrang hranga mite hian, khawilai bial a mi M.L.A che tha deuh te kan fak emaw, che chhe deuh te kan sel hian kawngro a su tam lo hle. A bial neituten engtin nge an hmuh tih hi a pawimawh zawk. Chutiangin, keini pawhin kan bial theuha M.L.A nilai te hi chik takin zir peih ila. An hmalak dan leh, an bial tan engnge an thawh tih te hi ngun takin ngaihtuah ang u. M.L.A nih tum opposition lam pawh lo chik peih ila, kan neih sa aia an ṭhatna tur chuang kan hmuh loh phei chuan, bialtu M.L.A thlak loh hi a him ber. Kan biala M.L.A nilai aia ṭha tur nia kan hriat erawh, sum leh pai pawh hnawl thak ngama kan vote erawh a tul hle si ang. A ṭul chuan, an tlin theihna tura campaign pui pawh kan tih ngei ngei tur niin a lang.

Tuna MLA nilaiah pawh hian thlak ngei ngei ngai, thli tleh fuh vanga sorkarna siamtute zinga tel ve hi chu an awm. Chutihrual chuan, congress pawh hi tla dawn mah se, tlingleh ngei ngei tlak pawh an awm nuk. Opposition lamah erawh sorkarna siam inbeiseia MLA nih tum, mipui it leh awh pawh ni lem lo, an inhawr tuau tuau reng a, hengho hian ram kalphung hi an ti chhe tak zet a ni.

Ram rorelna khawl din tur hian, mipuite hian mawhphurna sang tak kan nei. Vote kan thlak hma aṭanga kan biala ding tur te, kan lo zir chian hmasak hi a ṭul hle ang. Tute emaw tih vang te, sum leh pai vang mai maia vote thlak lovin, kan duh tak leh, tha ber nia kan hriat ṭheuhah kan hlutna lantir thiam ila, chuta ṭang chuan sorkar ṭha chuan bul a rawn tan der tawh dawn a ni. Sorkar tha chu nangmah leh keimah aṭanga bul tan tur a ni a. Chutiang taka, mitinin kan pawimawhna leh hlutna kan hriata, kan lantir thiam chuan sorkar ṭha chu kan nei em em ang.