Thla thar velah up to date bill pek

Electric bill thla thara kan hmuh hi thla kal ta chiaha electric hman man a ni lova, thla khat kal ta hma lama kan hman kha a ni ṭhin. Hetiangin- April thla tira bill consumer-in an hmuh hi February thla chhunga an lo hman tawhna bill a ni zawk a, March thla chhunga an hman kha a ni lo.

A chhan ni awma lang chu tun hma chuan meter reader-ten thla thar veleh meter reading an la a, chu chu office-ah an siam thuai thuai a, consumer-te hnenah pe leh turin an chhuak leh nghal ṭhin. Mi fel tam tak zingah hnathawk duhdah deuhte an lo awm avangin meter reader ṭhenkhatten kar hnih chhung leka consumer hnena kal chhuah leh vek an peih loh avangin bill sem lovin an lo paih bo ta ṭhin a. Chuvangin, consumer tam takin bill an hmuh loh phah ṭhin a ni awm e.

Chuti a nih avangin department lam chuan thla thar veleh a bill lak a, office a theh luh a, office a bill siamsa dah a, thla thar veleha meter reading lak ruala bill sem hian consumer-ten bill an hmu ṭha zawka rin dan an nei ta a ni awm e. Chutihlai chuan computerised billing a la ni lo a, engkim kha mihring thawh (manual works) a la ni a, an thiamawm tho mai.

Tunah chuan com-puter hmanga bill siam theih a lo ni ta a. Meter Reading Instrument (MRI) te a lo awm takah chuan thil thar hi hmang ṭangkaiin State tam takah chuan consumer-ten thla thar veleh up to date bill an hmu ta ṭhin a ni.

He MRI-ah hian consumer data zawng zawng computer aṭangin thun luh theih a ni. Category te, bill-na tur rate te, thil pawimawh tam tak a dah luh sa theih vek a. Meter aṭangin hrui (wire) hmangin zawm (connect) theih a ni bawk. Hetianga zawm a nih chuan MRI khan meter reading zawng zawng kha la lutin a chawk nghal a, tichuan hmun leh hmunah bill siam nghal theih a ni. Hetiang khawl hman hi chuan bill siamtu leh consumer-te lo in remsiam theih pawh a ni lo. Reading lak sual luih/ palh theih pawh a ni lo bawk.

Chutianga meter reading leh bill te an tih zawh chuan MRI khawl hi office-ah keng letin computer-ah lakluh (download) leh vek tur a ni. Department tan pawh engmah hloh tur a awm lo.

Hetiang khawl hi hman ve ni ta ila, consumer tam zawk hian bill ba loin, thla hlui liam ta chiah bill thlengin, an pe fai thei dawn a ni. In luah neite tan phei chuan in luahtu an chhuahin an hman tawhna bill in luah tharte pek tir emaw in neitu in pek sak emaw a ngai tawh dawn lo a ni.

State tam takah, prepaid meter hman lohna hmunah hetiang system hi an hmang a. Department lam tan pawh bill rate (Tariff) lo sang ang khan pawisa an dawng tam zawk thei a. Kum khat chhunga dawng tura an inchhut (Aannual Reveneu Requirement = ARR) pawh an hmu dik thei zawk ang. Hei hi Mizoramah pawh hman ve a hun tawh viau lo maw?