RD minister chhannna kha!

March 31,2016 (Ningani) Vanglaini chhuakah khan "Rural Development minister R Lalzirliana chuan MNF member Lalrinawma zawhna chhangin, sorkar kum kal mek, 2015-16 chhungin MGNREGA hnuaiah chawhrualin 35 inhlawhna siam a nih tawh thu House a hrilh a, 'Ni 72 inhlawhna siam theih kan beisei,' a ti" tih thu a lo lang a.

He thila mak deuh chu MGNREGA hi sorkar kum (Financial Year) anga kalpui/ hna thawh a ni lo em ni? Nge calendar Year in thawh a lo ni reng zawk ṭhin tih hi zawhna awm thei a ni. A chhan chu hei, April thla kan thleng a, sorkar kum thar (2016-17) a lo ni ta si. Ni 72 tal mipui tana inhlawhna siam theih beiseiah, ni 37 la bang hi a thamral dawn tihna em ni? Engvangin nge a hun chhunga ni 72 ni loin ni 100 tal inhlawhna a siam theih loh?

State Matching Share pek hma theih loh ṭhin vang em ni inhlawhna hi siam tam theih a nih loh le. Tak takah chuan MGNREGA hi thingtlang mite tan chuan a ṭangkaiin, a ṭha thlawt a. Tlangram lo neih tlahniam zel pawh hi MGNREGA kalpui vang a ni pakhat ti ila kan sawisual lo ang.

NLUP kalpui a nih hma kum 2007-11 ah khan tlangram lo neih hi a kum telin a tlahniam hrim hrim tawh a. Hei hi a chhan ber chu rim taka hnathawh bansanin, huan nghet nei a hnathawh te, chem hum ngailo chi hnathawh kalpui vang a ni ber a. Chutiang hnathawh karlaka inhlawhna tur (MGNREGA) lo awm hian mipui harsatna a chhawk em em a ni.

Thingtlang lamah chuan ni 100 inhlawhna hi ration buhfai lakna, hmuihmer leina leh chiseh ilo lei nan bera kan rin a ni. A hranpain ṭanpuina dawng lo mah ila MGNREGA kaltlanga inhlawhna hi
ṭanpui-na angah a ngaih theih awm e.

Chuvang chuan hna thawh loh kar rei lutuk ṭhin hi a awm tawh loh nan sorkarin hma min laksak se kan ti hle a ni. Ni 72 hi a tlem lem lo, amaherawh chu kuthnathawktute min ngaipawimawh tak tak a nih chuan ni 100 tal min siamsak thei lawm ni?

- Zoramsaia