Mahni nihna anga lan ngam

Khawvel a chang-kang zel a, hausa leh rethei inkar pawh a zau tial tial. Mahni intihlum tam tak hi dinhmun hniam zawk leh harsa zawka ding an ni duh hle bawk.

College kan kal laia kan ṭhian pakhat final year kan zir kumin a chhungten a thil ngen an tih hlawhtlin sak mai theih loh avangin amah leh amah a inti-hlum a, rilru a tina hle.

Tunlai khawvelah chuan kan khawsak nunphung ti awlsam theitu tur a chhuak thar zel a. Chung ang thilte chu sum nei zawk leh hausa zawkten an duh duha an neih theih zel mai laiin rethei zawk leh pachhe zawkte tan chuan a neih ve zung zung theih loh a, rualawh a na duh hle ang.

Mahni nihna ang leh dinhmun anga lang chhuak ngam lo a, a dera nung a bikin ṭhalaite zingah kan pung chho mek zel niin a lang. Ṭhiante anga thawmhnaw neih ṭhat ve loh avang mai maia kohhran inkhawmpuina velah pawh kal ngam ta lo ṭhalaite zingah tam tak an awm tih thu hriat tur pawh a awm ta fo a nih hi.

A bikin khawpuia cheng nula tlangval tan chuan ṭhiante zinga thawmhnaw nei lo bik nih te, phone nei chhe bik nih te, lirthei nei lo bik nih te hi tunlai angah chuan a lo zahthlak ve tawh a. Chu chuan mahni chhungkaw dinhmun lo anga nun hmanna a hring mek a, a pawi hle. Chuvangin, mahni nihna ang anga lan ngam hi kan zir thar a pawimawh ta hle a ni.

Kan dinhmun leh nihnain a tlin lo tih kan hriat chuan kan dinhmunin a tlin tawk leh a phak tawk anga nun zir ila, mahni chhungkaw pawisa lakluh mil loa thawmhnaw neih
ṭhat te, mobile phone man to neih te, lirthei neih ve ringawtte hi a zahthlak tih hi hre thar ta ila.

Mahni nihna anga lan ngam lohna hian mihring nun a ti hrehawm a, beidawnna khur ruam a zawh tir fo a ni. Mihringin a nihna a zahpui miau chuan a nun chu a hrehawm lo thei lo. Kan chhungkaw dinhmun mil loa kan khawsak san hian mite nuihzat kan lo hlawh fo thin.

Politics-ah pawh mahni party ṭan luat avanga mahni party fak chiam chiamte pawh hi ching lo ila. Kan party nihna ang leh kan kalphung ang angin lang ngamin awm ngam mai ila, policy nei ṭha nia an hriat party chu mipuite hian an zawm mai ang.

Mahni nihna anga lan ngam loh tluka nun hrehawm hi a awm lo mai thei a ni. Chuvang chuan mahni nihna ang ang leh kan dinhmun ang anga mi zingah lan ngam a, nun hman ngam hi zir mai ta ila, mite mithmuhah leh beng hriata kan lo ngaihsan awm fo mai dawn a ni.

- Nawlchunga Chinjah, Siaha