THLASIK KRISMAS

"Zing takah han tho ila - thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui hle..."

Thlasik khaw vawt han vinzia leh van sanzia chu sawiin a siak mawlh lo va. Ni a la tlang sang lo va, ka zing tho ka khup vawt ti chu a sai der der a, pawnlum sinin ka insangmar leh vel a, aw, thlasik tih mai ka nap ṭhin.

Pawltlâk thla a nih tawh hian chuan, kawngpui kamah leh tuikhur kam velah Lailen leh Pitte te'n varṭianah an mawng an rawn su det det a, hmuh an nuam a ni. Han hawi vel ila, chiang taka hmuh mai theih turin 'krismas par' ka in bul maiah hmuh tur a lo awm bawk nen; suihlung hi a leng vawng vawng ṭhin lah tak a. 

Han zin chhuak ila, kawngpui kamah japanhlo pâr, tlangsam pâr, builukham pâr leh tlaizawng pârte hmuh tur a tam hle mai a. Mit ina a tlin tawk vel leka thlawhhma huan siamte ina an thlai chin 'Anthur pâr' te lamin hmuh an va nuam em. Kan thlira kan thlir leh ṭhin a nih ber hi maw...

Hmun khawi emaw lunlai leh bazar hmunah te chuan, a khát mawi tawkin a pianna lam hla an rawn zaitir lehin, hetiang hlate hian min rawn awi nung leh a.

"Kan nghah krismas lâwmna ni kâwl a êng ṭan ta, 

Rinna mit in van lal naupiang kan thlir..."

A khát mawi tawkin Siampuii Sailo, Lalsangzuali Sailo (L) leh T. Lalengzaua hlate an play chhawk hi a ni ber a. Aw! hunpui a ni miau a, engkim mai hian masi boruak hi a ti masi bik hi a ni dah roh va. Khawi emaw laiah Krismas Pâr hmuh tur a awm fur mai bawk a, thlir nin a har ṭhin ngawt mai.

Ni e. Masi a ni miau a, Kristiante hunpui a nih tákah chuan, fam ngaih lusún khawhar chhúngte tan takte hian nia tawrh har zual dawn chu ni. Nikum maia ú-ama an fakpuite, chhungkuaa inhmangaih leh inthlahlel tak maia cheng/leng dún ṭhinte an kim tawh ngai lohna tur leiah hian, ṭahna hian bu a va khuar hnem ngai em ve aw, tih vawng vawng chang ka va ngah em! Kan ṭahna mittui tal hian min chhandamtu lunglai fan se la, vân khawpui aṭang hian min rawn hnem se, tih hi mal tin sawmtu chung Pathian hnena ka ṭawngṭaina a ni fo va.

Hunpui a nih ang ngeiin Krismas-ah hian zawng, chhúngtinte kan engkim leh kan theihna sang ber ṭheuhin kan inbuatsaih a, kan phak tawk ṭheuhvin masi hi zawng chhungkaw tinte hian kan hmuak a ni ber a, kan hma lam hun kal zel tur kan thlir dan erawh a inchen loin a inang mawlh si lo, a thlir fuh leh fuh lo kan awm bawk a. Chu chu a ni hunpui masi chu...

"Lal pian hun pangpâr a vul leh ta, 

Thinlai mu hnu lunglen a kai tho ve;

Vân hnuai mi hril Bethlehem tlang chungah,

Rinin thlain mi an thlâwk kai..." 

He hunpuiah hian zawng lunglên, khawharna leh ṭahnate hian chhúngtinte min vel ṭapin, kan hmangaih kaltate ngaih a nâ vawng vawng ṭhin. Ral khat, ram hla taka bethlehem tlàngpui rinna mita han thlir changte hian, tlaini tla lenkâwl a êng no riai a, lung tileng tawk chauhin boruak thlifim thaw heuh heuh leh chhum lei bawk vak vel cham delte chuan lunghnur takin, saron pâr tlâna chhûngkim tea kan lendún hun tur min va ngaihzualtir em...

"Lung duh an liam ta a,

An sulhnu lei awm harah hian;

Fam ngaih tin kim dawnin,

Ṭapin tlai ni ka leng, ka riang lua e - Lalpa.

Vanduai min awmpui la, 

I ram thianghlim thleng ni mah se;

Lei mihring chhung hianin, ka ngai thiam lo,

Ka lal lung hnem tuar har min dawn pui rawh."

Favang boruak nuam a lo ral a, zing ni chhuak a lo êng sen phút a, lailen leh pitte te an lo ṭum a - builukham pâr, midum pâr, tlaizawng pâr, janpanhlo pâr leh tlangsâm pârte an lo lang a, zing takah han tho ila - thlasik, sikpui rim a rawn nam a, hnar lenin han hawi vel ila, thlasik boruak nuam tak rim a tui hle mai a, tlâng tinah mit tlin tawk turin buh a vu tuk mai a, buh seng turin nu leh pate chuan lo lam an kan a, an hlim teh a sin.

Heng hunah te hlei hlei hian, bethlehem rim te hi a nâ zual bik hian a hriat a, kan hlimpui-in kan tleipui zawk zaw mah a. Aw! thlasik khel lova kan ngah, krismas hun hlimawm herchhuahpuitu - Thlasik Krismas!