Vai velh hnatlang rawtna ka thlawp

Pi Vanramchhuangi (Ruatfela Nu) chuan social media hrang hrangah Mizorama vai sumdawng an tam thu leh, sorkar lamin en uluk se tia a duhna a tarlang a; vai velh hnatlang neih a rawt hial a. Kha a thil rawt kha chi leh chi, hnam leh hnam ang zawnga ngaihtuah chuan tihpuitlin chi a ni miah lo a, mahse a thlawpawm khawp mai.

Nikum kum tir lam aṭang khan Aizawl khawpuiah lang tham vak loa hnam dang (a bikin vai kan tihho hi) hmuh tur an awm nual tawh a, heng ho hian Mizo thurualpui an nei ngei ang tih a lang. Mizoram registration scooty, bike leh car an hmang nasa a, an document han check ngat ila chu Mizo hminga register a tam ngawt ang.

Chu mai a la ni lo, Mizo hmeichhe hminga register an nih nawk a rinawm.

Hmanni deuh khan Silchar kan kal haw, bike-a plastic chair phur ka hmu nual a, hengho hian sumdawn nana hmangin Silchar kawng tlangdunga Mizo mipuite an zawrh ṭhin a, dawr aiin an titlawm bawk si a, an hralh thei phian a nih hmel. Aizawlah pawh chutianga bike-a sang tak taka phur ka la hmu zui a, ke ten an zuar leh ṭhin. Hengho hian sumdawnna permit an nei lo a, vai pakhat ka zawh chuan ILP ka nei a lawm, zu ti hmiah a.

Kan sawi tak ang khan a ruka vai sumdawng an tam hle ang tih a rin theih a. Assam registration car hmanga rawn lut an tam ta hle mai. Hengho hian eng ber nge an rawn tih ka chhui lem lo na a, sumdawnna eng emaw ber an ti a nih loh chuan vai phakar tak takte hian a lo thlawna rawn kal chiam chiam thu awm suh. Chu'ngho chu Aizawlah ngawt an tei kual lo a, district hrang hrangah an kal ṭhin tih chiang taka hmuh an ni ṭhin.

Heng a ruka sumdawngho hi an thurualpui zawnchhuah a, hmalak vat vat a ngai. Central YMA leh Branch YMA-te an chet a hun ta viau mai. Kan zirlai pawl ṭha tak tak pahnih, MZP leh MSU-te hi hengho chhui tur pawh hian an rintlak ang a, an ṭha ber bawk ang. Hnam dang Assam emaw, Mizoram registration car/tow wheelers khan te hi han check na deuh teh se. An thurualpui nen lam han lipse ngat se, thawk ṭha takah kan ngai ang.

Ruatfela Nu rawtna hi a pawmawm a, chu'ng hun a thlen hma hian sorkar lama thuneitute pawh hian an mit han lèn teh se. Chuti a nih loh chuan hnam leh hnam, chi leh chi buaina a chhuah a hlauhawm e. Heng mai bakah vai motor-a bungraw sem kual thleng hian enfiah a ṭha ang. Sumdawn phalna nei si loa sumdawng an tam ta lutuk e.

- Lal Rinmawia