Zu zawrh thu-ah Kohhran rawn lo se

Chief Minister Pu Lalduhoma chuan media a kawmnaah zu zawrh chungchangah chuan hmachhawp hmasa tur a ni a, ràwn tur ang ang kan rawn ang, a ti a. Eng hunah nge hemi chungchangah hian ràwn ngai a ràwn dawn tih chu a sawi lo a, media lama mi chuan kohhran hruaitute rawn ve lo tura a duh thu a sawi lang a; kha khan awmzia thui tak a nei a ni.

Mizoramah sorkar azirin zu zawrh a ni a, sorkar dangin an rawn ṭhiat leh mai a. Zu hi zuarin lei luih luih ila ka ti lem lo; mahse, Mizoram sorkar tan chhiah eng emaw chen a lo hmuh ve phah dawn a ni. Chawmhlawm ringawt maia state heti ve riang ruang kan kal a, Delhi drip khai ringawta nun reng pawh hi a dik bik tawh lo.

Ram leilungin a zir si lo a, lung chang ṭha nei ve ngat ila, Bangladesh sorkar pawhin a lei duh, mahse kan lung a no ropui si; hralh chhuah tlak a ni mawlh si lo. Balu ni se, Bagha balu aiin kan balu a chhe fe bawk si, lungalhthei lamah laihchhuah tur a awm lo emaw ni? Oil lah chu laihchhuah tumin lei an verh tluk tluk a, hlawhtlinna a awm rih mawlh si lo.

Heti khawpa state pachhia ni si, Congress sorkarin zu a zuar a, sum pawh a lut ve nial ang. Chu ai ber chuan Mizo mipui pawhin zu zawrh kha an hmang thiam dawn chauh a, phaia zin ṭhinho pawh zu dawr zàwna an kalin an hawi hu hu tawh lo hman hial a ni. Mahse inti fel fahranin MNF a rawn sorkar a, a rang a rangin zu zawrh an titawp hmiah mai a. Sum nei si lo, sorkar hnathawk a hun takah hlawh pawh an pek theih tak loh kha.

Chuvangin heti khawpa state pachhe si hian kan sum lakluh ve theihna tur zu zawrh chungchangah hian a ràwn theih ang ang ráwn se, a duh lo tur sa leh a do tur sa Kohhran (MKHC) lam chu ráwn mawlh suh se. Anni chuan an kohhran mite thlarau nun tihchak nan thawk mawlh mawlh rawh se. MKHC anga 'Aw' an lo neih ve chhen hi a khamawm zozai ta e.

- Lalkhirhvela