Raltlan chu raltlan ni se
Raltlan kan tih hi chi hrang hrang a awm ve thei a, inhumhimna zawng, awmna tur nei lo, sakhua emaw poltics thil avanga ram danga sahimna zawng leh a dang pawh a la awm zel thei awm e. Raltlan chungchanga Mizoram dinhmun en hian, indona avanga himna zawng, mahni rama awmna tur nei lote an ni thei ang a, heng raltlan kan tihte hi khawvel hmun danga raltlan kan tihte aia an danglamna awm thei deuh ber chu thlahtute aṭanga kan chipui, kan unaute tia kan sawi theihna hi a ni awm e.
Myanmar ram chu sipai thuneihna hneh chhuha Democracy sorkar a paihthlak avanga buaina chhuakah sipai lalna hnuaia mipui awm duh lo leh hlau tam tak chu Mizoramah an lo raltlan a. Heng Myanmar aṭanga raltlan kan tihte hi unau, chhul khat kual niin kan inchhal a, ramri leh ram inawmpnain min dai dan avang chauha awm hrang, lan dan leh ṭawngahah erawh inhlat lo tak kan ni a tih theih.
Hetih lai hian raltlan kan tihte hian harsatna min thlen mek niin a lang a, pawisa an ngah avanga in hmun an lei to leh, in an luah to ngamna te avangin khawpuia mi rethei (urban poor)- te khawsak a tiharsa tihte hriat tur a awm a, anmahni kan lo buaipui leh dawnsawn chungchangah pawh central sorkar chuan ti lo turin min hriattir a, tun hnai maiah pawh Siaha-a tualthahnaah an inhnamhnawih thawm kan hre leh a ni. Raltlan buaipui hi thil namai a ni lo a, keini chauh hi raltlan buaipuitu kan ni hek lo.
Mizoram pawh hian kuangkuahtu dinhmun kan chelh mek a, chutih rual erawh chuan raltlan kan lo buaipui dan hi chu a tir aṭanga mi thiamte sawi kha kan zawm a hun tawh khawp mai. Tun dinhmunah, Aizawl chauh lo ni, district dangah pawh raltlan hi sang chuang an awm a, raltlan awmna tur (refugee camp) kan siam mumal loh chu thuhran, chutiangah pawh awm ta lo chuan an duhna veng leh khuaah a ṭhenin ram an lei a, in an luah a, inhlawhna awm thei apiangah an inhlawh ve zel bawk a, kan hnathawh ai an thawk a ni. Hetia zalen taka an awm hi kan unaute tih rilru putna zawn aṭang chuan thil nih dan tur ni awm reng a ni. Amaherawhchu raltlan chu raltlan a ni a, dai dangtu kan nei a, chu dai danna chu harsatna avangin su chhe rih mah ila dai danna lehlam ve veah, dan hran hnuaia awm kan ni a, he lam tualah hi chuan raltlan ni mai se. Lainat eng ang mah ila dan hi kan himna leh ṭhatna tur zawk a nih hi pawm ila, zalen taka an rawn luh zel a, an teihawi zel theih chuan kan nunphung inan lohna avang hian harsatna kan tawk fo anga, khua leh tui nihna dik tak nei si loin kan ram min la chuhpui lo ang tih lah a sawi theih hek loh.
Khawvel huapa raltlan tamna ber chu Syria a ni mek a, civil war avangin Syria mipuite chu ṭhenawm ram, Lebanon, Egypt leh hmun dangah te an raltlan ṭhin a ni. Germany khuan hman aṭang tawhin raltlante hi khawngaihin an ramah a la lut ṭhin a, a lo tuamhlawm ṭhin a ni. Syria aṭanga raltlan hi Germany-ah hian an tam ber niin an sawi. Rraltlante enkawlna tur atan sum tam tak a sen chu thu hran, a ram mite'n eizawnna tur an van phah a, raltlanin a ram mite tana harsatna an siam nasat avangin raltlan la lut tawh lo tura nawrhna hial a thleng tawh a ni.
- Lalrinfela