Mizo Ṭawng hman dan chungchang

Vanglaini Chanchinbu January ni 7&8 2024 chhuakah khan Dr. Lalzuia Colney rawn ziah kha ka lo chhiar ve a, a thusawi hi a dik lo ka ti lam pawh a ni lo va; amaherawhchu, hemi chungchang hi sawi duh ka nei ve tlat mai.

"Ziak tih hi eng mood-ah mah ziah a ni ngai lo. Bible-ah ziak tih hi vawi 34 a awm a, khawiah mah ziah tihna a awm lo," a ti kher hi chu a en kim lo deuh a nih ka ring. Chanchin Ṭha Luka ziak 16:2 hi lo en leh se la, “I sum enkawl chanchin mi ziah vek rawh; tun achinah sum enkawltuah i ṭang thei tawh lo vang,” tih a awm tlat mai.

Tin, "Ziak chu eng mood-ah pawh Ziak tih a ni ngar ngar mai," a ti a. Mahse MIZO ṬAWNG ZIAH DAN tih lehkhabu, Mizoram Board of School Education (MBSE) 2008 chhuakah leh Rivised & Enlarged 2013 chhuakah chuan, a bu hmingah pawh, MIZO ṬAWNG ZIAH DAN tih niin, Ziak dan, a ti lo. He lehkhabu, Bung 4, 5, 6 & 7 zawng zawngah pawh ziak zawm ti lovin ZIAH ZAWM tih hlir a hmang.

Tin, MIZO ṬAWNG ZIAN DAN bu Mizo Language Committee lehkhabu pakhatna, MBSE in a publish (Fourth edition 2022)-ah pawh Mizo ṭawng ziak dan ti lovin, Mizo ṭawng ziah dan, a ti tlat mai. He lehkhabuah pawh hian bung 4, 5 & 6-naah pawh Ziak zawm ti lovin ‘Ziah zawm’ tih vek bawk a ni. A khawi hi nge dik ta ber?

He lehkahbu MBSE chhuah ang hian lehkha ziak ta ila, Pu Lalzuia hian min endiksak ta se, mark hmuh san a harsa viau ang a, MBSE lam hotuten min endiksak ta ni se, mark kan hmu sang leh mai thei si a. A dik ber rawn sawi teh u lem!

- V.L. Hruaia, Tuikual South.