TRAFFIC MANAGEMENT CHUNGCHANG

Traffic Management lama kan buaina hi kan Traffic S.P leh a hote chin feltir kan tum hi thil inhmeh lo tak a ni. An thuneihna chung lamah AMC lamin an duhna hmun remchang lai apiangah Parking allotment an pe hmiah hmiah ṭhin si a. A chingfeltu turin Traffic Police te kutah an dah leh si a, kawngpui hi lirthei neituten him taka kan tlan nan Road tax kum 5 chhung 2.4 % kan chawi ṭheuhna a nih laiin, Road Tax kan pek tawhna kawngpuiah ngei chuan Parking Place hran siam belh si lovin; kawng dung tluanin lirthei an park khat ṭhup mai si a, hei hian Traffic Flow a tikhaihlak nasa em em a ni.

Lirthei khalhtu tam tak ten dan an hre lo va, a hriaten an zawm ṭha bawk hek lo, in sakna bungrua zuartute Iron Rod, Cement, Balu, Thingzai etc. zuarte nen lam, a bik takin hnam dang vaiten Rules & Regulation hi pawisakna chhete mah an nei lo va, an dawr kawtah nileng ṭhakin an Motor an hung hnawk ngam ṭhin a ni. Workshop leh a chhehvela lirthei hlui tawh tak tak, a kum tela dah tawhte paw'n mipui tan an hnawksak tih pawh an inhre tawh lo.

Motor leituten Garage an nei ngei em tih enfiah turin Aizawl DTO Office-ah MVI pahnih chiah an nei a, enforcement lah an indaih lo em em a, Post - 10 lai hnawh khah lovin a ruak reng a ni. Office Work a tam si a, Garage verification ti turin hun an nei lo va, chutih laiin Motor zuartuten Registration thar tur an hralh chur chur mai si a, kawng dang awm ta lo chu Local Council leh VC te recommend-na kha an pawm a lo ṭul ta a. Technical rules ang chuan a dik lo hrim hrim.

Enforcement post ruak - 10 lai hnawh khat tur hian sum neih loh chhuanlama kan hmang reng hi a pawi tak zet a ni. Kan Home Minister chak takin Rules of Law hi a nih dan ang taka hman tur a tih hian huam tel hram se a va lawmawm dawn em! Chinfel vat a nih loh chuan ni tin dan bawhchhetu tur leh kawngpuia ding hnawk tur kan register belh chur chur tihna a ni ang.

Traffic Police-te hi chak zawka thawk tura kan duh chuan thuam ṭhat an ngai hle mai. Traffic SP hian Office attach Building pawh nei lovin Aizawl SP Office Building a ṭawm ve mai te hi kan sawrkar hian ngaihtuahsak theih ni se. Tin, dan bawhchhia lirthei an man pawhin Custody an neih loh vangin dan bawhchhia lirthei an mante pawh a hun hmaa chhuahtir an ngai ṭhin. An Office Motor tak ngial pawh dahna an neih loh avangin ngaihtuahsak a ṭul hle.

Tin, tunlai Technology sang tawh takah Drone hmanga Traffic Jam Survey & visit thawh a ṭul tawh hle mai, Transport Department leh Traffic Branch thuam ṭhata tihchangtlun nan sum tam tak chu ram danga puk belh ngai lovin, kan State sawrkar ngei hian a manage thei vek a ni.

Khawi atangin nge sum kan hmuh tak ang le?

A chhanna chu: Road Tax life Time (15yrs) lak hi Congress sawrkar lai khan All Indian Transport Minister kalkhawmin an passed tawh kha a ni a, kum 5 chhung kan enchhin ve nghe nghe a nih kha, chu chuan revenue tam tak Finance-ah a chhunglut nghe nghe. Kha tih lai khan Transport Minister chak tak, Pu John Rotluangliana kha a fakawm hlein ka hria, Road Tax life Time (15yrs) lak hi Revenue duhthawh vangah mi tam takin an ngai ṭhin a, mi rethei tan phurrit min siamsak tiin an sel luai luai ṭhin. Ngun taka kan ngaihtuah chuan mi retheite harsatna thlentu Tax lak sanna te chu, Tui Bill, Electric Bill leh Revenue Tax tihsante hian a nghawng na zawk fe a ni. Road Tax life Time (15yrs) erawh chuan mi retheite nghawng ve lovin, MOTOR leitute chauh chawi tur a nih bakah, Traffic Jam turu lutuk control nan a ṭangkai dawn a ni. Tin, Public Transport vehicles-ten an chawi ve dawn lo bawk a ni.

Road Tax life Time (15yrs) lak a nih loh vangin lirthei neitu tam tak; a bik takin thingtlang kilkhawra tawmbopui rengte'n kum nga bak tax an pe lo va, kum 10 Road Tax pe lovin an service reng si a, chu mite leiba va ṭhing turin Department Staff te tan tihngaihna a awm si lo va, Central lam Auditor te an lo kal changin engkim an rawn hmu nghal vek si a, Department enkawltu leh sawrkar tan harsatna lian tak a thleng ṭhin a ni. Dan anga Road Tax life Time (15yrs) kan lak chuan a hlawkna teltu chu State sawrkar tho a ni a, mipuite hi phun ṭhin mah ila, kan tana ṭha tur zawk a nih zia hi kan zir chian a ṭul hle. Naupang vaccine an pek dawna an duh lova an ṭap ang deuh hian nakin zelah, an tana ṭha tur a nihzia kan hriat chian ang tho hi a ni.

Road Tax life Time (15yrs) hi State dangte aiin Mizoram hian kan la hniam bik a, kum 5 ah 2.4 % kum 10 ah 4.2% kum 15 ah 6% a ni. State dangte entawnin 8% vel Life time-in la ve ngam ta ila, (section 50-nain a phal angin) Traffic zam vanga ni tin 50 lakh vel kan lost ziah ṭhinte tih tawp nan leh, a profit 80 crore vel lo tlingkhawm tur nen Traffic Branch leh Transport Department Staff te leh Equipment an indaih lo hi kan chingfel thei ngeiin a rinawm.

Kum 2022 chhung khan Mizorama Lirthei Register zat Transport Department IT Cell Record angin 27165 a ni a, chu'ng zinga 19347 chu Aizawl DTO hnuaia mi an ni. Motor neih hi kan chak ṭheuh si a, hetiang zel a nih chuan kum 5 a vei meuh chuan 27165 x 5 = 135825 in a pung hman dawn tihna a ni a, Aizawl khawpui chhunga ni 1 (15hour) chhunga lirthei vei zat Traffic police Record ah chuan 70000 vel a ni a, a enkawltute lam dinhmun ngaihtuahpui chuan a luhaithlak hle a ni. Intlan chhawk hmanga solution kan zawn hi a fuh lo hle a ni.

Engtin nge kan chin fel tak ang?

1. Traffic Management Committee ai hian Home Minister chairman-na hnuaiah Traffic management Authority din ni se. A concern Department hrang hrang Transport, PWD, Revenue, LAD, Education & Health Department te bakah Political Party aṭanga vei leh tuichilh tak taktu Idea nei ṭha tak tel bawk se.

2. Public Transport hman ṭangkai : Public Transport Worker te hian Traffic Rules an zàwm ṭha tawh viau a, Private Car lo tam ta lutuk hian khawpui chu an tichep tawh zawk a, Parking-ah Problems kan nei leh si a, rem leh rem lovin kan in-park khat tuar mai ṭhin a, Traffic Police ten chin fel ngaihna an hre lo a ni. Public Transport kan hman tam chuan Private car chhuak tam lutuk Park-na awm mumal si lo hi a lo ziaawm ang a, chutih rualin Public Transport upgrade hmasak a ṭul hle ang. Taxi Fare pawh dan anga kalpui a ṭul tawh ang. Chu chuan mipui phurrit nasa takin a chhawk zangkhai dawn a ni. Tin, Taxi-ten ni danga an hlawh aia tam an hlawh thei bawk ang.

Heng zawng zawngah hian a takin hma la dawn mah ila tih tur ṭul hmasa ber chu Public awareness hneh taka kan pek a ngai dawn a, Technical Staff eng emaw zat lak a ṭul dawn. Tin, NGO-te phungbawmah sawmin chak takin hma kan la thei tawh ang. Kohhran ṭhalai inkhawmnaahte hian sawi tam ni se, kei phei chuan ṭum hnih zet ṭhalai inkhawmah Rules & Regulation briefing ka pe tawh nghe nghe.

Directive Principle of State Policy hi kan hman thiam chuan, Central Motor Vehicle Rules in state Government to make rules-a thuneihna min pek angin a dah pawimawh ber chu - Public safety hi a nih vangin Mipui vantlang himna leh Traffic jam tih reh hi State sawrkar leh mipute mawhphurhna a ni.

- Lalṭhachungnunga Tlau, Ph : 9774410287