NPA ah sorkar a ngáwi em ni?

Hmanniah Social media lamah Doctor-hoin an practice loh hlawh bik, Non-Practicing Allowances lak chungchang RTI-ah an dah a chhuah a, Doctor khati zatah khan Doctor pakhat chiahin a lak loh thu pawh tarlan a ni. Khami chungchangah khan kan sorkar thar hian thuthar eng emaw a neih ngei beisei kan chang ṭhuap a, Health Minister in, “Kan ngaihtuah mek,” emaw, “Kan zir chiang mek,” tih emaw an sawi kan rin laiin thuthar engmah a awm lo va (a lo sawi a, ka lo hre lo zawk emaw ni ?). Chief Minister pawhin a enghelh ve deuh dawn emaw tih naka laiin, a ka aṭangin thuthar engmah kan nei ta miah lo niin a lang a (hei pawh ka hre sual emaw ni dawn ni), a mak hle mai. Kan sorkar thar hian eirukna nuaibo turin theihtawp chhuah an tih mek lai a ni a. Kuhva smuggling te phei chu thla khat chhungin kan titawp ang ti hial an ni a, Check gate-a pawisa khawn pawh tihtawp tuma ṭan lak a nih laiin, Doctor-ho Practice reng chunga NPA lak chungchanga sorkar thar a ngawi tlat mai hi hriatthiam a har khawp mai.

A hming pawh Non Practicing Allowance tih a ni a, chu chu mimawl hriatthiam theih dan chuan - Doctor-in sorkar hnuaia a practice bak practice loh man a ni mai a. Sorkar Doctor, a practice leh practice lo zingah, Upa leh zu in mi zawng zawng zingah khan pakhat chiah in a la lo a ni awm e. Hemi avang hian sorkar hian thla khatah cheng tam tak a seng an ti. Sorkar doctor zawng zawng hian an practice loh avang hian an vai hian sorkar sum an eiru kan ti thei hauh lo. Mahse, heng zinga tam tak hi chu private hospital pakhat chauh pawh ni lo; pahnih vel laia thawkte pawhin an lak lai a, kan sorkar thar a ngawi tlat mai te, Doctor lam pawh an ngawi tlat maite hi eng nge a chhan ni ang le? Opposition party lam lahin an hun laia an tih tawp ngam loh thil a nih avang hian an ngawi hmak mai bawk si a. Heti hian Doctor an ngawi ang a, sorkar lam hi an ngawi ve ang a, mipui hriat mang loh hian sorkar sum hi a luang ral zel mai dawn em ni ang le?

Heti hian ka ngaihtuah ta a, tuna sorkar lam leh doctor lam an ngawih mai mai danah hian a nawlpuiin NPA kan hriat dan hi a dik lo zawk nge maw ni le aw ka ti? Kan hre dik lo a nih chuan Doctor lamte pawh hian han sawifiah awm tak a ni a. Tin, mak deuh chu, Doctor khati zat hming ziah tlarah khan eng ngati nge pakhat chauh khan a lak loh? Doctor zingah khan kohhran upa leh rawngbawltu pawimawh tak takte pawhin an lak laia mi pakhat chauhin a la lo kha, a la ve duh lo kha dem zawk tur em ni? Lak pawh pawi lo, lak loh pawh pawi lo thil mai mai a nih chuan, sorkar hian he dan hi hlip fel law law ta se, a dik zawng ang em le aw? ka ti.

An sawi dan chuan hmanah sorkar hian NPA chungchang a sawi neuh neuh a awm a, sorkar doctor lam hian private-in an practice duh lo a, mipui lam kan buai a, chumi avang chuan doctor pawh hian NPA hi vai lak vek ni se, tiin an sawi ta a ni awm e. Mahse, pakhat chuan a la duh lo va, chu pawh chu doctor family-ah chuan an lawm viau lo emaw ni. A nih leh NPA an vai lak avang khan dan bawhchhiatna a ni lo em ni? Ni e, an vai pawhin la se la, practice loh man hi practice chunga an lak miau chuan dan bawhchhiatna (eirukna) zawng a ni. Thil tisualtu hi an tam leh tlem vanga dan bawhchhe lo an ni ngawt lo, kohhran upa te, rawngbawltute an tel ve avang hian thil sual a ni lo ngawt hek lo. Sorkar hnuaia practice loh man a ni a, practice chunga la zawng zawng hian dan an bawhchhia a ni. Hei hi kan hriat dan a ni a, kan hriat dan hi a dik loh chuan sorkar lam emaw, doctor lam emawte'n thuchhuah an rawn nei mai turah ngai ang.

Tin, tun hma lam chuan an practice loh avangin mipui kan buai a, tunah chuan sorkar damdawi ina thawkte hi private-in an practice lo a nih pawhin kan buai viau tawh lo vang a. Chuvangin he dan hi khauh zawka lekkawh ni tawh se la. Tin, sorkar hian action a la ngam dawn lo a nih chuan, NPA hi titawp vek law law se (anmahni doctor ṭawngkamah chuan an duh chuan NPA hi an duh leh titawp law law se la tihte pawh a awm a ni awm e). Dan zawm hlawh lo leh lekkawh theih loh tur chu hlih fel mai emaw, tih tawp emaw hi a finthlak zawk mah a ni.

He NPA chungchanga sorkar ngawi tlat hian eirukna donaah hian tih ngam bik, vei bik a nei dawn tihna em ni ang le? NPA avanga nuai tam tak senralna hi tihtawp a nih loh chuan nakin zelah pawh sorkar hian eirukna a dona kawngah hian ngam loh, tih bik a nei chho zel ang em le? Doctor te tihsual pawh titawp ngam lo; Health Minister hi kan nei zel dawn a nih chuan kalphung thar sorkar kan tih hi eng nge a hmaa mite nen a danglamna ni ang? Hemi chungchangah hian kan sorkar hi a ngawi zel dawn nge hma a la dawn, i lo thlir zui zel ang.

- L Vanchiau, Aizawl, Mizoram