HOME MINISTER THUTLÛKNA

Indian Administration ziaktute chuan, Sawrkar Laipuia ministry leh department zawng zawnga an chhuan tawlawl ber chu Home Ministry hi a ni. Kum 1843-a Sawrkar (company's govt) inrelbawlna siam ṭhat a nih hnua department upa ber pali zinga pakhat chu home ministry hi a ni; chu bakah, sipai lam kaihhnawih, pawisa lam leh ram pawn lam (foreign affairs) kaihhnawih tih loh, thil zawng zawng tih mai tur hi Home Ministry chuan a kuahkhawm a ni, tiin an sawi (Avasthi & Avasthi, Indian administration, Lakshmi Narain Agarwal, Agra-3, pp.171). Tichuan, Sawrkar laipuiah chuan, Department zingah department ropui ber a nihzia leh he ministry enkawltu tur atan pawh minister zinga senior lam, thluak ṭha, rem hria, thil hria, huaisen leh rorum an thlang deuh ṭhin a ni.

A chipchiar zawnga hisap leh thu neih tam lamah danglamna chin awm mah se, Union Home Ministry kal phung ang hi State Sawrkarah te pawh kan kalpui dan tlangpui a ni ṭhin.

A thui lutuk loh nan, Mizoram Sawrkara Home Minister lo awm tawhte chu sawi (comment) lovin chhiartute comment pek atan dah mai ila; tun Sawrkar thara Home Minister, Pu K.Sapdanga hi tawi tein lo thlur bing ta ila:

Mi chak, tum ruh, huaisen (lion's heart), viak ṭha, dikna ngaina leh corruption haw tak a ni tih chu, he State Home Ministry office a luah aṭanga thla khat em pawh a ral hmaa hnam tana a chet chhuahna hrang hrang chu sawi loh, kuhva ro smuggling a hmachhawn dan aṭang ringawt pawh hian a chiang hle awm e. Zofate/Kristiante dam khaw chhuah nana tihmakmawh leh a tel lova hmasawnna 'development' engmah awm thei lo – dan lalna (rule of law) a ngai pawimawh em em hi a hlut bikna chu a ni awm e. Dan leh hrai zawmna hrang hranga a bul ṭanna, lungphum leh a zirtirtu chu, ama sawi dan takin, Home Deptt hi a ni rêng lah tak a; chuvangin, mahni inphatin, ama chan Home Deptt aṭanga bul aṭan ngam hi a huaisen danglam nghal a, he ṭhut hmun ṭanga ṭan chho zelin, eirûkna leh hlemhletnate chu huai takin a rawn su chho pawp pawp a. Dik taka sumdawn duhtute leh mipuite lu tihaitu leh tilungngaitu, hun rei tak aṭanga smuggling-a sumdawnna nia ngaih ṭhin 'kuhva ro tawlh' pawhin tunah zet chuan a kimkit phah mai ni lovin, a tawp ṭhak phah niin a lang ta hi a lawmawm tak zet a ni.

Khawvela Sawrkar ropui ber USA President pathumna leh USA hmu chhuaktu pate zinga pakhat Thomas Jefferson chuan, "Sawrkar awm lo Chanchinbu awm nge i thlan ang? Chanchinbu awm loa Sawrkar awm, tihah hian han inzawt dawn ta ila, i hé lovin Sawrkar awm lo (...neih loh), chanchinbu awm (...neih) ka thlang ang," a ti a, kum 1787-a a lo sawi chuan khawvel a deng chhuak a nih kha.

Hei hi eng vanga sawi lang nge kan nih? Eng pawh ti dawn ila thutlûkna siam a ngai a, thutlukna chu fing leh ṭha, belh chian dawl, dik tak leh mamawhnain a phut anga rang/muang taka siam a ngai a ni. College/University-a sawrkar inrelbawlna (public administration) subject la chuan kan hria ang chu, Thutlûkna ṭha reng reng siam tur chuan a chaw leh thutlukna siàmpuitu 'factors' duhthlan tur tam tak hotupa chuan a neih a ngai ṭhin a (Herbert A. Simon-Administrative Behaviour), chu bungrua chu chanchin thar te, thu ziah (articles/commentaries) ṭha tak takte kum tam tak lo chhiara thlit fim hna thawk bawk chuan thil dik leh dik lo, dik teuh, ram leh hnam hmasawnna atana pawimawh leh, budget tam tak hmanna ṭangkai si lo angte thliar a, thu tih tluk nan chuan chanchinbu editor chuan chakna a nei ṭeuh mai ni lovin, amah (editor) aia thil hria emaw, chutiang finnaa thuam ṭhat emaw chu tu mah dang an awm theiin a rinawm lo hial ang. Editorial phei hi chu, thil thleng thar (current affairs) theh darha rem leh (critical analysis, etc), mi tin ṭhatna tura thil thleng thar sawi zau leh faksel (comments & criticise) te hi chanchinbu chhuahtu (editor) mihrinna tiṭhang a, hnam hmasawn nana finna pek belhchhahtu leh hma lam pantirtu a ni. Editor-ina kum tam tak thupui thuhmun chungchang ziahna article ṭha tak tak chi tam tak thlan/thlit ( screeing/sorting) fimnaa a thluak a hmante chu, a taka mipui rawngbawltu hna chi hrang hrang thawk chhuak tura training leh chakna lo petu a ni ngei ang.

Khawvela Dramatist ropui bera ngaih, William Shakeapear-a kut chhuak (works) chu a ropuiin a tam si a, mihring pakhat khawih atan chuan a tamin a quality a ṭha bawk si a, ama tih a ni seng em em lo vang a, tia mi thiamte zingah ngaih dan nei an awm angin, Vanglaini Mizo Daily, Mizoram chhunga chanchinbu lian ber, ṭha ber leh darh zau ber editorial pawh hi a fing si, ni tin kum 40 chhung zet current affairs comment thar fing zet mai a rawn chhuak thei zel ta mai chu, amah editor bik kut chhuak vek a ni seng lo vang à, tia ngaih dan siam pawh lo awm se, thil mak lutuk a ni êm lo vang chu.

Amah Pu K. Sapdanga hi a taksa len loh anga zuam ngawt chi a ni lo; mi huaisen, rin tlâk, thudik ṭan tlat, kristian dik tak, Mizo pa tak, tlawmngai, taima tak leh hna thawk rim tak mi a ni; hman deuhva khuallian a nih ṭuma a thu sawi ka la hriat reng chu — Chanchinbu a chhuah tirh chhoh vel khan, thawh hai hlauvin zing lama chanchinbu semtu turten awlsam taka an sem tur an lak theih nan kawngka bul chhung lama ṭhutthleng sei (YMA ṭhutthleng ang chi deuh) ah a mu mai zel a; tichuan thawh hai emaw chanchinbu semten an kaih thawh zawh loh khawpa muthilh ngheh emaw, thawh tlai emaw hi a awm ngai reng reng lo a ni.

Sawi tawh angin, Mizorama chanchinbu ropui ber, lian ber, darh zau ber leh rin tlak bera ngaih, Vanglaini Daily kum 40 zet lo enkawl tawhtu a nih avangin Mizoram ṭhatna (development) chi hrang hrang atan, kum 40 zet a ngaihtuahna a lo seng tawh tihna a ni a, chu chu ama hna bik (portfolios) thawh chhuah nan mai ni lo, a Pu, Mizoram hmasawn nana kum 40 zet lo vahvaihpuitu, Mizoramin Chief Minister atana Kohhan Upa a neih hmasak ber a ṭawiawmna (Sawrkar kalpuina kawng bikah) hmanrua atan hlei hlei lunghlu ai pawha hlu a ni ngei ang.

Hetiang khawpa ram rawng bawl tura harsatna hrang hrang su tlanga training chipchiar leh rei, Mizoram mipui rawngbawlsak nana a lo nei hi a ram mipuite kan vannei tak zet a; Indepentdent India-a ram pumin a chhuan em em Union Home Minister hmasa ber, chak, rem hria leh huaisen Sardar Vallabhai Patel ai mahin Zofate tan chuan, kan HM hi a danglamin a hlu chho dawn chauh a ni. Zoram tan tluang taka a hna a ṭhawh chhoh zel theih nan ṭawngṭaisak zel ila, Pathianin finna leh hriselnain thuam zel se la, tiin duhsakna kan hlan a. India ram pum thlir pawha duai bik lo tur thawhpui officer leh staff fel tak takte a nei bawk nen, Home Minister thutlukna hi Zofate tana thutlukna fing, dik leh ṭha, Pathianin Zofate tana Govt of Mizoram Home Ministry hmanga min pek a ni tih hi ringin i ṭawiawm tlat zel ang u.

Pathian lehkha thu chuan, "Tunlaia tuarnate hi nakina kan chunga ropuina tih lan tûr nên chuan tehkhin thamah ka ruat si lo," a ti (Rom 8:18).

- Dr J.T.Vanlalngheta.