THIANGHLIMNA LEH MEDIA
Media hi kan inbiakpawh tawnna a nih mai bakah, thu leh hla lama kan hmanrua pawimawh leh ṭangkai tak a ni. Mi tam takin a ruala kan dawn theih leh kan hman ṭangkai em em hi MASS MEDIA niin chungte chu :
Radio, Television, Lehkha/thuziak, Cinema, Telephone, Computer te a ni.
Keimahni ngeiin kan awka leh chetziaa thu awmze neia kan entir reng reng hi MEDIA chuan a huap tel vek a, hei hi Presentation Media tih a ni.
Khawvel ṭhang zelah hian MEDIA hian mihring nun hi a khawih danglam nasa ṭhin hle mai a, a ṭangkaina tam tak sawi tur a awm laiin a ṭha lo zawnga hman theih hi tam tak a awm bawk avangin, khawtlangah leh Kohhranah tun aia nasaa MEDIA kan hman ṭangkai zel theih nan kan infuih thar a, MEDIA fimkhur taka hman a nih zel theih nan Media lama kan mi thiamten mipuite hnenah zirtirna nasa tak inpek ṭhin hi a pawimawhin a ṭul tak zet a ni.
Kan hriat hauh loh laia min zirtir rengtu chu kan thil hmuh leh kan hriat ṭhin te hi niin, hengte hi MASS MEDIA hian a keng tel vek a ni. Tunlai sualna langsar zual ṭhenkhat mipat hmeichhiatna hman dik loh te, hlemhletna hrang hrang te, zu leh damdawi hman khawloh te, dan bawhchhiat te, tharum thawh leh tualthahna thleng hian eng emaw chen chu MASS MEDIA hian a keng tel a, thil ṭha lo tam tak karah hian mihringte thianghlimna hi a bo zo vek ṭhin a, heng thil hian a hranpain sual ti turin min fuih hauh lo a, kan rilru lamah erawh nasa takin min kai peng ṭhin a. Lehkhabu chhiar leh film en aṭangte hian kan khaw hawi kan tih zau theih viau laiin, a ṭha lo lamah pawh min zirtir a hlauhawm khawp mai. A tira sual anga lang lem lo pawmzam hian keimahniah sualin hmun a khuar zui duh viau ṭhin.
Tunlaia hmanraw ṭangkai taka kan hman mek; COMPUTER-te pawh hi eng line line emaw hmanga thlun zawmin kan hriat duh engkim mai hi awlsam takin a hmeh chhuah zung zung theih a, he thil hi hmang ṭangkai duh tan chuan thil ṭha tak niin, heng aṭangte hian sakhaw duk dak lo thil tam tak an inzirtir mek zel bawk a. Sakhaw kal sual pakhat HEAVEN'S GATE an tih ho pawh hian MEDIA hmanrua pakhata hmangin an thurin an vawrh darh ṭhin niin an sawi a. Hman deuh khan hetiang thil ṭha lo tam tak hi hmuh tur leh hriat tur a tam ṭhin a ni awm e.
MEDIA lama kan hmasawn meknate hian kan nun a tibawlhhlawh thei em? Thianghlimna kawng ata min hruai peng em? tia inzawt chunga fimkhur tak leh uluk taka MEDIA hi kan kalpui a ṭul tak zet a ni.
- George L.Ralte, Vaivakawn