Lirthei khalhtute polite zelin
Tunhnai khan traffic SP chuan thuchhuah siamin, lirthei khalhtute polite taka khalh turin a ngen a, double overtaking phei chu ti reng reng lo turin thu a chhuah. Aizawl khawpui zim leh tawt lutukah hian lirthei a maka makin a pung mek zel a, chu'ng lirthei khalhtute chu kan fimkhur a, lirthei dang khalhtu leh kea kal tan pawh kan fimkhur viau a ngai a ni.
A bikin ke hnih nei, two wheelers khalhtute hi fimkhur lehzual a ngai khawp mai. Lirthei ke li nei sirah kan tlan fo a, a pelh rem laiah kan pel mai a. Mahse traffic jam-ah chuan din ve mai tur a ni a, kan zawm thawkhat viau. Mahse polite lo an awm ta fo mai. Two wheelers intlar tuarh an awm laia a sirah zak miah loa rawn tlan pel (double overtaking) zar zar ching an awm fo. Heng mite hian lirthei dang leh kea kalte tan hlauhawm tak a siam tih hriat a ṭha.
Aizawlah two wheelers taxi sang hnih chuang a service mek a, chu'ng zingah chuan polite lo ngial ngial an tam hle a ni. Lirthei tlan dan hre map lo emaw tih turin ṭhenkhat chu an sapatal a ni ber mai.
Two wheelers taxi khalhtu zingah hma lama lirthei tlan mek ding lama tlan pel lo a, veilamah; wrongside zawnga tlan pel pawh an tam bik tih hi hriat leh hmuh tur a tam khawp mai. Taxi chang an ni lo, two wheelers tam tak hian polite an zir a ngai hle.
Kawngsira kan park duh dante hi mi dang tan a hnawk hma viau a ni. Lirthei dang tlanna dal ngar maia park chingte hian thluak han vaivir deuh se, mi tan awlsam takin hnawk loin a awm theih a ni.
Amaherawhchu, Aizawl leh Mizoramah chuan lirthei horn hmeh rik kan ching lo. Hei hi tu ma'n horn hmeh an khap lo a, kan inzirtir ngai hek lo. Mahse kan kalphung a ni ve tlat. Hetiang horn kan hmet ri ngai zen zen lote hi a mawi a, a zahawm em em a ni. Jam hun laia horn hmet ri vak vak ṭhin an awm palh pawhin mak tiin kan en hu hu mai a ni. Chutiang chiah chuan State dang aṭanga lo kalte hian min fak viau lai hian, kan sawi ang hian polite zual zel teh ang u.
Traffic flow a muanna pakhat chu city bus ten an timing an adjust vang hi a ni pakhat bawk. Stand leh stand inkara an hun hman tur an hmang zo hma lutuk ang a, stand hmasa berah din rei a ngai ang tih an hlauh vang a ni ber. Chu'ng City bus-te chuan lirthei tlan ṭha lai an pawt muang em em a, traffic jam a siam fo ṭhin. Chuvangin, city bus tlan dan phung pawh hi State Transport Authority (STA) lam pawh hian enfiah fo se, a lawmawm ngawt ang.
Kan khawpui zim leh chep takah hian four wheelers taxi ho stand kan pek dan pawh hi ennawn a ṭha khawp mai. Veng tina hmun ṭha lai laiah stand sei tak tak an nei a, an stand te hi an hauh na em em lehnghal nen; a bul lawk dawra thil lei tura han din ve zawk pawh an phal ngai meuh lo. An keipui sa hauh hlur mai ṭhin.
Chuvangin kan taxi stand te hi tihbo vek emaw, an hmun neih hi vantlang tan laksak ṭhen den den a ṭul ta viau mai.
- Lal Rinmawia