Aizawl thenfai hmasak a ngai

Hmanni chu YouTube channel-ah Michelle Varte music video pakhat Millennium Centre kawta shooting a neihna kha ka en fuh hlauh maia, a artist piah lamah khan a chhehvela mipui awmdan ka en kuala, chumi karah chuan Millenium Centre bang bal khak tak mai chu ka hmu taa, ka rilru a khawih khawp mai. Kan ziathiam ten an video uluk takin an siam ṭhin mah se an mahni cheimawi zualtu tur kan ram erawh a fai tawk lo hle mai. India ram faina lamah kan dinhmun chu kan hrechiang ṭheuh a, Aizawl bik hi Mizoram khawpui a nihna angin fai taka kan enkawl hi a ngai takzet mai. Khawpui lun laia waiting shed-ah bawlhhlawh duh tawkin kan paih khawm nasa hle a, kan bawlhhlawh hi mi chhar fai tur amaw ti tlat hi kan la tam khawp mai. Pawl hrang hrang leh zirlaiten a huhova Aizawl hmun hrang hrang thenfai hna an bei fo ṭhin mahse mi tam zawkin faina an ngaih pawimawh miah loh avangin a hnu lawkah a bal leh mai ṭhin. Mi tinin kan bawlhhlawh ṭheuh hi thianfaiin, paih fai mai ila tu pawl mah hnathlang vak hi a ngai miah lovang. Aizawlah ngat phei chuan bawlhhlawh bawm hi hmun tinah kan hung nasa hle a, mahse bawhhlawh a bawma paih nachang hre lo kan la tam hle mai. Hmun khata bawlhlawh kan paih tawh chuan khami hmunah bawk khan midangin an rawn paih ve zel a, a hnu lawkah chuan khawpui ti mawi lo tak tu hnawmhnawk lian takah a lo chang mai ṭhin. Khawpui fai tak nei tur chuan khaw mite rilru put dan leh chet danin a hril ber a, fai hi changkanna a ni tih hi kan hriat thar leh a pawimawh hle mai. Mizoten hma kan sawn chho zela, kan in leh lo phei chu a mawiin a fai thei em em tawh, kan in leh lo kan uluk ang bawk hian vantlang thil hian kan uluk a mamawh takzet. Fiamthua an sawi ṭhin, nalh taka inchei in chhung bal tak si chu a rukin miin an ngaisang lova, chutiang bawkin in leh lo fai tak leh nalh tak neiha khawpui bal taka kal hi a inhmeh lo hle a ni. Mizote incheinaa kan san ang hian faina lamah kan san a ngai takzet tawh. Hetiang chuan ralkhat aṭangin mi nuihzat kan ni palh hlauh ange. AR Lammual pheia Assam Rifles ho in zawna kawngpuia an tuichhe paihna rawn haw thla ṭhin te hi a mawi lo em em a. Two wheeler a kal phei chuan chuan a changin an tuichhia chu a rawn per thin hial a ni. Kan khawpui awm danin a zir lo tih chu kan hre ṭheuh a, kawngpui an a awmte tuichhia hi khawpui lun laia langsar taka paih a ni ṭhin a. Khaw chhiat lai phei chuan a zawna kal te a chakawm loh ṭhin hle. Heng bakah hian vantlang inthiarna tam zawk hi a fai lo em em a, ruihhlo tihna hnu syringe te, meizial bung, kuhva chhakna hnu hma te chu ngaiah kan nei hial tawk zawka. Sorkar ṭha kan duh e, kan ti a, roreltute sawisel tur chuan kan in ring reng hlawma mah se ram kan hmangaihna lantir theihna vantlang thil mahni ta anga enkawla uluk leh faina kawngah chuan kan muang leh lawi si. Inenfiah a ṭha khawp mai. Sorkar office, sikul, damdawin hrang hrang han en leh ila, inthiarna hman theihloh, tui herh haw na chhia siamthat miah lova dah a tam em em maia, office thenkhatah chuan tui kan neilo tih hi a ri zing hle bawk. Damdawi ina inthiarna fai leh thianghlim tak, tui hnianghnar tak phei hi chu a nih dan tur dik tak a ni, damlote hian tui awmlo tihte hi an hre ngai lo tur a ni. Tin, hmeichhe tan ngat phei chuan thla tin thil avangin a buaithlak em em ṭhin. Kan sorkar thar hian heng sorkar office mai nilo vantlang zunin a tui herhawna chhia te, kawngka kalh theih loh te heng zawng zawng hi siam tha vek se ka ti takzet a ni. Tin, hemi piah lamah a hmangtu mipuite pawhin kan ta anga ngaiin heng vantlang inthiarna te hi kan hman pawhin fai takin hmang ila, tui herh haw hnua nghet lova kalsan te, kuhva tui chhak leh tih bawlhhlawh loh hi kan tih mak mawh ani.

Ram hmel lanna pawimawh tak pakhat chu a fai em tih hi a ni a. Vantlang zunin te hi kan siam belh zel dawn chuan tha tak hi siam mai ila, kan inchhung awm atana kan duh tur ang hi kan siam a ngai a ni. Hei hi ram hmangaihna leh mipuite zahna lantirna a ni. Mizote ngaihsan S.Korea ram hi a fai em em a, khawilaiah hian bawlhhlawm bawm hmuh tur hi a vang khawp mai a; mahse, bawlhhlawh a paihna hmun te a nih ngawt loh chuan hmuh tur a vang hle thung. Vantlang zunin a ṭha em em hlawma, khaw kar kawnga zunin te hi an thianghlim in a ṭha em em hlawm vek mai. Heng hi a nih theih chhan chu mipuite chetfel vang leh sorkarin tui leh a kaihhnawih a ngaihtuah that vang a ni. Tin, sorkarin faina a ngaih pawimawh em avangin a tifai reng tu tur hi hlawh tha thawkhat tak pe in an ruai hnem hle bawk, hei hi kan entawn atan ka duh takzet a ni. Ram a fai chuan a chhunga mipuite kan zahawma, tin hriselna atan a pawimawh hle a, faina kawngah hian sorkar hian sum hi a tul phawt chuan a sen hrehloh ngei ka beisei. Meizuk chungchangah hian sorkar hmasa tawh ho te hmalaknain vantlang hmuna meizu kan tlem tial tiala, hei hi nasa lehzualin chhunzawm zel ila. Khapna kan siam rual hian kan thil khapin a nghawng tak te ngaihtuah tel zel a ngaia, meizukna hmun bik hi office leh khawpui remchang laiah siam ila, chumi hmunah chuan meizial bung paihna tur bik hi mawi hnai tak siam ila, khawpui lai anih chuan waiting shed te kan siam ang deuh hian thut hahdamna turte dah tel ila, meizu te pawhin hahchawlh nana hmang pahin mei an zu thei dawn a ni. Sobji bazar te hi a fai lai ber ni awm tak hi a fai tak tak thei meuh lova, chawhmeh thutpuiten kan chawhmeh zawrhna hnukawi theuh hi thianfai ṭheuh ila kan ram that zel nana kan tih theih ṭha tak a ni dawn. Tin, Mizo thingpuidawr tam zawk hi a fai tawk lo hle a, thil eina hmunah tho thlawk mup mup hmuhtur a tam hle thin hle, Mizo thingpui dawra eitur te hi a tui thei khawp maia, chuvang chuan hei aia a lun theihnan a neituten kan customer te tan hmun fai taka thil an ei theih nan kan thingpui dawr te fai takin enkawl ṭheuh ang u, thianghlimna leh hriselna hi thil kalkawp tlat a ni. Faina hi chu mimal kutah a innghah len em avangin ṭhalaiten ram kan vei nasa tawha, kan bawhhlawh ṭheuh thenfai hi ram kan hmangaihna lantirna hmasa ber a ni tih hre thar leh mawlh mawlh ang u. Tin, S.Korea entirna pe leh ta ila, an ni ramah chuan Company-a Manager pawhin chhuata bawlhhlawh tla a hmuh chuan a chhar faia bawlhlawh bawmah a paih mai ṭhin. Heng ang deuh hian office lama thu te pawhin kan bulah bawlhhlawh kan hmuh chu kan peon te ko buai kher lovin chhar fai mai ila hengte hi hniam phahna emaw zahawm lohna a ni lo tih rilru pu thar leh ang u. Ram hmasawnna hi kum khat chhunga hmuh duak duak theih a ni hauh lova mahse faina erawh chu ni hnih khat chhung lekin a lang nghal zung zung mai a. MLA sawm li rual ringawt hian ram hi an siam ṭha nghal duak duak dawn lova, chutihlaiin mipui sing chuang chet felna leh taimakna rah erawh chu a lang zung zung thei thung a ni. Chuvang, chuan kan hnathawh hmun ṭheuh fai leh fai loh hi kan chanpualah dah theuh ila, ram dang kan awhna faina te hi chu kan nei thei em em a ni. Mitin kan bawlhhlawh paih danah te vantlang thil kan enkawl danah te kan ta angin en ila, faina kawngah hmasawn turin i ṭangrual thar leh ang u. Khawpui fai tak neih hi kan hnam min ti zahawm tu tur zel tur a ni.

- Zothansangi Hmar