AWHNA LEH ITNA DIK LO
Thil kan la neih loh leh kan la nihpui loh awhna avangin Eden huanah mihring hmasate bawhchhiatna a lo thleng a, chuta ṭang chuan mihringte thinlungah hian awhna leh itna sual chuan nitin zantin min chen chilh ta reng a ni. Chumi avang chuan duhamnate, mahni hmasialnate, mi ta leh mi chan tur diklo taka laksakna te a rawn thlen a.
Midiklote thil tih rah chhuah an va awt a, hmu tha riautu in a tih ve chuan, chu chuan thil thalo bawk a thlen tir thin.
Nimahsela, rinawm tak leh rim taka thawktu thawh rah chu a thianghlimin a mawia, chutiang chu miin a awh a, a tihhlawhtlin ve chuan Lalpan mal a sawmsak a, ama tan, khawtlang tan leh ram tan thil ṭha a thlen ṭhin.
Ruihtheih thil titu nunzia chu miin a awh a, a va tih ve chuan a tawpah zu leh damdawi ngawlveiah an lo in chantir ṭhin.
Kawngpui dip dal zawnga chet lakna, thiltih reng reng te chu a tituin ama tana ṭha tur a ni tih a hriat a vangin midangte a dip dalna chu ava ngaihtuah duh tawh ṭhin lo. Chutiang ang thil tih ṭha lo chu midangten an rawn awt a, an ti ve ta zel a, chumi avang chuan zofate Jerusalem kan Aizawl khawpui hi alo ṭawp zo ta a ni.
Ram hmangaihna avang ni lova, sum leh therhlo semna avanga mahni dinhmun chawikang tute thiltih dik lo chu va awt a, lo ti ve ngeitute thiltih ṭha lo chuan kan ram hi a hruai chhe zo a. Anmahni hnungzuitute thinlung leh ngaihdan chu kawng dik loah a hruai a. Democracy kalkawng an ti hnawk a, rorelna khawl thianghlim an tibal ṭhin.
Thenawmte thil tih diklo chu lo awt lo ila,"Kei chuan thil ṭha lo tih hi ka duh ve lo" tiin thinlunga Lalpa tihna neiin i intiam ang u. Hetiangahte hian kan ram siam ṭhat nan bul kan tan ava hun ta em!
Tunlai hun media chak takah hian mi ṭha lo te thiltih tha lo an pholang nasa ta a. Chu chu ṭhenkhatin tih ve chakna an lo nei a, an tih ve tak zel avangin chu chuan kan ram ṭhalaite nun a tichhe zo ta a nih hi.
Kan Pi leh pute nun hlu leh mawi tak, awhna leh itna reng reng an neih lohna kha kai tho leh ila, chu nun ropui leh thlakhlelhawm tak hmang chuan kan thinlung leh ngaihtuahna te hi kan ram tan i din thar leh ang u.
- H. Neihchungnunga, Durtlang North