AMC ṭang fan fan

Aizawl Municipal Corporation (AMC) chuan Aizawl khawpui chu chi hrang hrangin a enkawl mek a, mi tam tak tan chuan a hnawk viau mai theih. Mahse sawiselna karah pawh tang fan fan se kan duh.

Tunhnai lawkah Bawngkawn-Durtlang inkarah building sak mek pakhat chu ṭhiat turin thupek a chhuah a, hunbi neiin hun a pe a ni. Hun pek chhunga a ṭhiat loh a nih chuan AMC-in a power hmangin a ṭhiahsak dawn a, a ṭhiah man erawh building neituten an tum tur a ni, tih a thupek chu a ni.

AMC hi party behchhana sorkarna chang a nihna chin a awm a, chumi phenah chuan official hian thuneihna thuk tak an nei tih chu mipui hian kan hai lo a, hma han la zel teh se.

Tun hnaiah vawk vulh chungchangah dan a siam a, a dan siam lah veng tin Local Council ten an keng kawh bawk si a, an thawh hlawk viau a ni.

Veng tin hian LC kan nei theih a, khawtlang enkawltu ṭangkai tak an ni. Chumi khaikhawm tur chuan AMC chak tak a awm bawk a. Hei hian khawpui vawnfai leh inrelbawlna kawngah nasa takin hma a sawn phah a, AMC-in a tih tur dik taka a tih chuan hma kan sawn zel dawn a nih hmel.

Tuna Durtlang kawngah building sak ṭhiat tura an tih mek lai erawh chuan kawng chhak lamah hmun hnih laiah nasa taka laih mek a ni a, fur a nih hmain a khu em em a, fur han ni se a diakin lirthei tan a hlauhawm ngawt ang.

Chuvangin heng hmun hniha lei lai mekte hi phalna nei an em? AMC pawh kan zawt nghal a ni.

Thil tithei tan chauha AMC an awm a, a thei lo tana khauh hlur ringawt hi a dik bik lo. Tuna lei lai mekte dinhmun hi media kaltlang takin han sawifiah teh sem. Building sak mek ṭhiat tura tih a nih laia vantlang tana hnawksak khawpa inhmun lai pahnih dinhmun hi hriat kan duh e.

AMC tang fan fan se, hleih neiin awm lul Suh se. Kan lo en reng a nia.

- Lalkhirhvela