Meizuk ka sim - ka lawm hle

A kum a la rei lo, mei zu heh deuh ka ni ve a, mahse kum lo upat tawh bakah taksa tan a ṭha lo tlata ka hriat avangin ka sim ta hmak mai a, ka thil simah rau rau chuan ka inchhir loh pawl tak a ni.

Hman kum khan Mumbai-ah damlo ka kalpui a, kha'ng hunlai khan mei ka zu a, ka heh phian lehnghal. Khawlai kawngsirah ka zu vang vang a, a tawpah culvert-ah ka zuk bung chu ka paih mai pek a. Duty a lokal a, Rs. 200 chawi turin min ti ta mai a, ka chawi ta nghe nghe a. Kha duty pa khan ka zuk lai khan zuk lohna tur hmun a nih thu min hrilh mai se, chawi buai loin a awm theih reng mai. Mahse ka zu zo a bung ka paih chiah min han man kha a ngeiawm duh khawp mai.

Meizuk hi thil mawi lo tak a ni tih tun hnu hian ka hre thar leh a, a mawi loh mai bakah taksa peng hrang hrangin a tuar a, chuap ngat phei chuan a tuar zual hle a ni. Ṭhenkhatin intihtheih nana hmangin an han zu pat pat maite hi a mawina a awm lo khawp mai. Mahni tan mai bakah kan bula awm vete tan boruak ṭha lo tak kan siam tih kan hre chang ta ṭhin lo. Hetianga seconhand smoke tuartute hian a zu-te ai mahin an taksain a lo tuar hle tih mi thiamten an sawi a, a dik hle mai.

Chief minister chawl ta Pu (Dr) Lal Thanhawla nupui Pi Lal Riliani khan zuk leh hmuam kha theihtawpin a do a, a sawisel satliah a ni mai lo; a ṭhat lohzia kha CM nupui power hmang khan a tlangaupui ṭhin a, a power hman kha mi dang tan a ni bawk a, a fel ka tiin ṭha ka va ti tak. A bulah khan tu ma'n mei an zu ngam lo a, a bulhnaia an awm tam leh mei an zu tlem mai ṭhin. An hlauh vang ai mahin amah an zah vang khan an zu ngam lo a ni.

Mizote zingah meizu, a zukna hmun lo leh puipuina hmuna zu khua ta luai luai an la kat nuk mai. Chu'ng mite chuan an mei rim mi dangin an lo hip tih ngaihtuahna chang an hre duh miah lo. Mei zu tam tak chuan inthlahrung taka an inthiarfihlim laiin, a tam zawk chuan intihtheih nan taka la hmang an kat nuk mai. Ṭhenkhat phei chuan an meizial bung tladah taka paih mai mai te, kawngpuia paih khu ta tulh tulhte pawh an awm nawk mai. Hengho hian a mawi lohzia hrilhtu an nei lo a ni chek ang.

Kei ngei pawh mei ka nghei har a, ka inchhir khawp mai. Ka fanu chuan ka sikret ipte-a ka ah a hmuh chuan min paihsak hmak hmak ṭhin a, ṭap zawih zawiha ka kawr aṭanga a lakchhuah a, a sikret tak a tihchhiat lai ka mihthlaa a lan chuan ka nghei har mah mah tih ka inhria a, ka fanu kha ka fak let hial a ni.

Kan mei zuk khan mi dang hriselna a tichhia tih hria ila, chu ai ber chuan a khu lo hip vetu tan an hriselna kan tihchhiatsak a ni tih i hre thar leh teh ang u.

-Lal Rinmawia