Hremna Hmachhawn Ngam Mi Dik Kan Mamawh

Kan ram hian inzirtirna kawnga kan mamawh tak nia ka hriat fo chu, kan tih suala hremna (punishment) an lek apiang puitling taka pawm ngamna hi a ni. Hei hi dikna kawnga kan din lehna kawng pawimawh tak a ni tlat. Hei hian dik lo taka rorelna leh uchuak taka diriamna lam erawh a huap hauh lo va. Hriat loh leh tihsual palh ngawih ngawih lah a huap vek ngawt hek lo vang. Thil har deuh ni ta erawh chu, dam khaw chhuah nâna thil tih lam hi a ni. He'ng hi chu court lamin rilru fim takin thlifim ta mai se la.

Heti chung chung hian, rilrua lang lian ta ber chu, thil kan lo ti sual ta a, mi pawi kan sawi a, ngaihdam dil meuh chung pawha dân lamin a hremna a lo neih kuau si-ah chuan, chu hremna chu nun siam ṭhatna tûra duan a nih ngei pawh a rinawm a. A hremna chu a rei emaw rei lo emaw, chu hremna hmachhawn ngam tûra 'puitling takin, ka tihsual hi ka pawm thlap e' tih theihna tûra dikna mawlh mai hi a ni, inzirtir uar deuh deuh tûra Zoram hian kan mamawh nia ka hriat chu ni. A khal erawh a khal ṭha viau mai a, a awlsam bawk hek lo. Kohhran lam hian hetiang kawnga 'ka sual tih ka inpawm thlap e' tih lam aia 'ngaihdamna hmanga sual vulh len' lam a hawi deuh tlat hi chu, ngaihdamna ropui tak hman khaw lohna a ni thei tlat.

Mi ṭha famkim awm lohna khawvelah hian, mi ṭha lehzuala min chhertu tûr 'hremna' hmachhawn ngam tûra infuihna hi tun aia nasa lehzuala Kohhran lam pawhin kan inzirtir thar a ṭul hle a ni.

Dân bawhchhetu thlavang kan hauh tum dân hi, a dân bawhchhetuin a sim ngei theihna tûra hremna hmachhawn kawnga huaisen ngam tûr leh, chu hremna kan tih pawh chu nun siam ṭhatna hmanrua tling tûr khawpa awmze nei taka hremna ni ngei se. Tute emaw dân bawhchhe zawnga che ngei si, man chhuah tâkte pawh awmze nei hawt lova 'thi rawh se' intih khum bawng bawng te leh, nun awmze nei zawka an dam khaw chhuahna tûr lam hawipui hauh lo v,a ṭawngkam dengkhawng tak taka diriam zui chiam chiam kan ching hi chu insum det kan ngai mang e.

- Samuel Dinté, Chennai