Burma Ramri Hung Ka Thlawp E
Central sorkar chuan Burma ramri hung a, border fencing tih a tum leh, ramri hrula chengte inkalpawhna Free movement Regime (FMR) tihtawp a tum chu mi tam zawkin duh lo viau mah se, kei chu ka thlawp ve tlat.
Kan political party leh an hotuten Zo hnahthlak inzawmkhawm an sawi an sawi te, Mizoram zauh lam hawia an sawi te, Zo hnahthlak chenho an sawite hi a ṭhat viau rualin; a ṭhatna ka hre map lo.
Dik tak chuan Mizorama sualna chi hrang hrang hi Burma leh Manipur aṭanga lo chhuak deuh vek an ni ti ila a sual tam lo ang. Ruihhlo leh tualthah chungchangah phei chuan Burma aṭanga lo kal a ni a, kan unaute kan tiha kan duat der der lai hian; Mizoram mipui min tichhetu an ni. Hengho hian kan Aizawl khawpui hmun laili lai lai an chang zo dawn ta.
A bikin Burma aṭanga rawn tla thla zingah hausa ngial ngial an tam em em a, hengho hian ruihhlo leh smuggling aṭang bak sum an ngah kher ang em aw? Kan khawpui daifem hmun ṭha zawng zawngah an invalh tawh a nih hi. Kan la buaipui tur hmabak a ni. Political party chang an ni a, YMA leh zirlai pawlte pawhin Zo hnahthlak unaute an tih kur dup dup lai hian, hmathlir thui tak neih a ngai. Burma aṭanga lo chhuk thla chang an ni lo. Manipur kan Zo unaute pawh an la hnawk dawn chiang.
Manipur a buai a, tam tak an rawn tlanchhia a, lirthei changkang tak tak nen Aizawl leh thingtlangah an rawn khawsa a, hengho pawh hi Mizo dik tak leh Zo hnahthlak ni sek sek rawh se. Nakinah chuan kan la buaipui tur leh min eichhetu an la ni dawn khawp.
Sualna lo pung zelah hian Tripura Jampui tlangdunga kan Mizo unaute hming lanna a vang khawp. Drugs man kawngah te, tualthah leh inbumna lamah te, Jampui unaute hming hi media-ah a lang ve tawh em? Sawi tur ting chu a lo awm a nih chuan ka hre lo a. Mahse an lan ngai awm reng reng ka hre lo.
Thil sual tihna lamah chuan Manipur leh Burma aṭanga lo kalte hming a kat zat zat hi tu ma'n kan hai lo ang. Hengho hian Mizoram an hmangaih lémin ka ring lo. Anmahni dam khawchhuahna bak chu!
Chuvangin insuihkhawm tih ang velte hi ka duh map lo. Mizorama cheng Mizote angin an rilru a 'Mizo' dawn lo tih a hriat reng. Veng tin leh khaw tinah Local Council leh VC te, kan innghahna bulpui ber YMA kan nei a, chu'ngte chuan Mizoram leh Hnam ṭhatna turin theihtawp an/kan chhuah tlang a. Manipur leh Burma aṭanga lo kalte erawh chuan anmahni bak an inngaihtuah tak tak lo.
Chuvangin, chenho leh intlawhpawh vak ṭulin ka hre lo. Kan khawsakna, kan ram leh an ramah hlim taka awm a ṭha ber mai. Zo hnahthlak unaute tih chiam chiam hi ka ei loh zawng tak a ni. Mizoram mi dik tak rilru ang an pu miau lo.
- Lal Khirhvela