Hnam dang pasal nei inchhir an awm

Hman kum deuh khan nu pakhat upa lam deuh tawh hian hnam dang pasal a neih a inchhir thu min hrilh a, a kum zawng zawng leh a awm dan en chuan a khawngaihthlak let ling hle. A khawhar thlak thu min hrilh keuh keuh mai a ni.

Kha nu khan a nulat vanglai, a hmelṭhat leh duhawmna zawng zawng nen khawvel a hmang chho ve ngei dawn tih a lang reng. Mahse, a hnampui thlang ta lo chuan hnam dang (foreigner) pasalah a thlang ta mauh mai si a. Ram hla takah an awm a, a kum a lo upat deuh hnuah mahni hnampui leh a pian leh murna Mizo leh Mizoram a ngai vawng zawng mai zu nia.

Kha nu kha ram hla taka awmin an fate an lo tlei chho a, nupui pasal an han nei a, in hrang an han chan zawh takah chuan a pasal nen an khawsa ta rak rak mai a. An tu leh fate han chhawnchhaih ngaihna awm loin in hrang an chan tak siah chuan an khua a har ngawih ngawih mai a ni.

Mizote chu chhungkua kan insiam a, kan tu leh fate kan chenpui a, Mizo tlawmngaihna leh hmangaihna nen kan la indawm kang a, hlim takin kan la khawsa ho thei zel a. Tar leh upa pawh tu leh faten an duat em em zel a, a va hlu em! Hnam dang tam tak chu chutiang an ni ve lo a, nupui pasal an neih chuan an nu leh pate kalsanin an indan san lawng lawng thin. An nu leh pate an hmangaih lo bik pawh a ni lo, an hnam dan a ni tlat si.

Nupui pasalah hian hnam dang neih ngawr ngawr hi kan haw em em bik tur pawh a ni lo, an in hmangaih miau chuan an nei a ni ve mai. Tu hi nge nupui pasala neih tur tih hi khawvel danah a awm lo a, khawvela cheng ho vek kan ni a, kan in duh a, kan in hmangaih miau chuan indem em em tur pawh a ni lo. Vawi khat bak kan piang dawn lo a, vawi khat bak kan thi dawn bawk lo. Kan dam chhung a rei lo em em mai leh nghal bawk nen.

Chuvangin nupaa kan insiam duh a nih chuan khawvel piah lama awm nupui pasala neih ngaihna awm hek lo, khawvela chengte tho a ni kan neih ni. Hnam dang, ram dang mi tih vanga nupui pasal an neiha kan dem ngawt hi kan rilru zim vang pawh a ni ang e.

Amaherawhchu, Mizo Kristian kan ni a, kan kristianna min vawn him pui thei tur nupui pasalah neih tum tal ila, kan tu leh fate thlarau chan tur ngaihtuah ila a tawk viau. Hnam te lutuk rilru pua kan thikthu tihchhiat viau hian awmzia a nei lo.

- Lal Khirhvela