RAM KA VEI TA LO!
Tun hma aṭangin mahni phak tawk tawkin ram hi ka vei ve ṭhin a, Mizoram mai ni lovin khawvel zau zawk leh ram ropui zawka an Politics boruak inlumlet velte thlengin ralkhatah ka lo ngaihven ve ṭhin. Ram inrelbawlna hi a pawimawh nasa si a, kan ram neih chhuna kan aiawha ram leh mipuite tana thil ṭha ti tura kan thlan tlinten beisei an phak lo mai pawh ni lovin, anmahni leh an party, an lam hnaite vulhna mai atan an thuneihna leh an lalnate chu an hmang leh ṭhin a, ram siamna tur sumte chu anmahni insiam lenna mai atan an hmang leh bawk si ṭhin a, tih theih nei si lovin ram hi ka vei ve em em ṭhin a, a tawpah leilung leh a chhunga thil awm zawng zawng neitu Pathian hnena ṭawngṭai mai loh chu tih theih ka nei si lo!
Roreltu hi Pathian rawngbawltu, missionary a ni: Ram rorelna hi Pathian ta a ni a, rorel tura mipuiin kan thlan tlinte hian a neitu Pathian aiawhin dik takin ro an rel tur a ni. Ram rorelna hi Pathian rawngbawlna pawimawh berte zinga pakhat a ni a, ram roreltute hi ‘missionary’ an ni nghal bawk tih hi an hriat a va pawimawh em! Keini India ramah phei chuan, Mizoram state-a roreltute hian Pathian tih chung leh dik takin ro han rel se la, India ram state dangten mak an tih khawpin hma kan sawn ang a, mipui kan hlim ang a, chutah chiah chuan eng tin nge hetianga hma kan sawn theih chhan min rawn zawt ang a, “Pathian ṭihna leh Lal Isua zirtirna zuiin ro kan rel a ni,” tia kan lo chhan hunah chuan, India ram chhunga missionary nuai khat tirh aiin a sawt zawk ang!
Ram tana ṭawngṭaitute ṭawngṭaina Lalpa'n a chhang mek : Kristian ram kan ni a, ram tana rinawm taka ṭawngṭai ṭhin mi tam tak kan awm ṭhin. Kei pawh kum eng emaw ti kal ta aṭang khan ram tana tawngtaitute zingah theih ang tawk te tein ka lo tel ve tawh ṭhin a, ram roreltu ṭha beiseiin nghakhlel takin Lalpa kan dil ṭhin. Kan ṭawngṭai nasat poh leh kan ramah hlemhletna te, sum leh paia duhamna avanga sualna chi hrang hrangte a pung zaw mah emaw tih chang a va tam ṭhin em! Roreltute tana ṭawngṭai tura Bible zirtirna hre reng mah ila, an hmel han mitthlaa ṭawngṭai titui lo ve tak takte tana ṭawngṭai luih hram hramte kha a va har ṭhin em!
Tun MLA inthlan hnuhnung berah pawh khan beiseina sang tak nen, beisei tak tak ngam si lovin ka lo thlir a. Chuta ka ṭawngṭaina hla ber pakhat chu, “Lalpa, BJP tel lova rorel thei tur min pe ang che,” tih chiah kha a ni. Inthlan result a lo chhuak a, ZPM-in majority changin ro an han rel thei tur kha ṭawngṭai chhanna hmasa a ni ta phawt! Chutah, kan CM thar Pu Lalduhawman ni 100 chhunga an hna hmasa tur a han puang a, kan lo ngaihthlakna beng pawh ringhlel rum rum khawpa thu lawmawm kan han hre ta mawlh mawlh mai a! Ṭawngṭai chhanna thuah hnihna!
Hun a han kal deuh va, kan sawrkar thara Cabinet Minister hrang hrangten an hna chanpuala hma an lak ṭan dan leh hma lak zel an tum dan, ram tana thil tha an ruahman dante an han sawi thliah thliah a, ngaihnawm a tling chho zel mai. A dik tak chuan, ZPM sawrkar thar hian ka beisei phak baka ṭha leh ropuiin hma an la mek a, a ṭha zawngin min barakhaih takzet a ni!
‘Sanbalata’ leh a ṭhiante an lo lang dawn chiang! Ram tana thil ṭha titute phur taka thlawp aia mahni ṭanghma sial taka dawt leh thudik chanve hmanga thu veivir tir thiam tak tak, Sanbalata te ho an lo lang nghal ṭuam ṭuam mai dawn! Heng ang mi hi chu beisei sa tur reng an ni. Lalna te, thuneihna te, sum leh sannate ngaina mite chuan ram mipuite hmasawnna hian an dinhmun a tiderthawngin an hre zawk tlat ṭhin. Chuvangin, ram tana theihtawp chhuahtute dik lohna eng emawte lo kher chhuah tumin an chang ràn ṭhin a, hna berah an neih a, thil te tham te pawh an sawi vung chiam ṭhin a ni. Sanbalata leh a hote chu hnam History-in thiam loh a chantir zel ang.
Ram ka vei ta lo! Kan sawrkar thar, ‘Kal phung thar, mipui sawrkar’ tih Champion-pui tuma ṭan la mekte hian tun thleng hi chuan thla an timuang a, kal phung dik lo kal phung pangngai emaw ti khawpa mipuite hruai suala awm tawh hnu, kal phung pangngai leh dik min han kawh hmuh ṭan ta mek a nih hi. Tunah chuan ram ka veina a reh ta huai mai! Kan aiawha ram siam ṭhaa ro min relsak tura kan thlante hi, Lalpa'n an tha tichak sauh sauh rawh se. Lalpa tihna nen dik leh huaisen taka ro an rel phawt chuan, an peih chen chen he ramah hian rorel turin mipui, party ruihchilh ve lote hian kan thlang tling zel ang!
Tunah chuan roreltute tan phur taka ṭawngṭai sauh sauh bak tihtur ka nei ta lo!
- Dr. Ramdinthara Sailo