Kum Tawp Exam
Tuna kan Sawrkar (thar) chuan kalpung thar an intiam angin kal phung tihdanglam tumna leh, kal phung dik lo leh fel loa kan kalna tam tak siam dik tumin hma a la chho mek zel a, a lawmawm hle. Vawilehkhatah fel duak duak thei lo mah se, a fawng vuantuten an tum tlat chuan thil thar kan hmu ngei dawn pawhin a lang.
Kan Minister-te pawhin awmze nei taka hma lak tumin an Dept. chan an zir nasa hle tih a hriat a, thil ṭha tam tak an hmuh laiin thil ṭha lo tam tak pawh an hmu ngeiin a rinawm. Tuna kan ram hruaitute sawi lar em em pakhat chu; a ṭul lova mipui sum luan ralna tihziaawm hi a ni a, hei hi thil ṭul tak ni pawhin a lang. Tin, dan zawm kawngah mipuite pawhin thu awih kan zir a ṭul viau dawnin a lang.
School Education Department-in School Calendar a tichhuak ṭhin a, hei hian hun rei tak aṭang khan zawm a hlawh viau lo ṭhin. Hun eng emaw chen aṭang khan School ṭan ni hi a ngai pawimawh ta viau a, zirtirtu kal dan report turte pawhin a ti ṭhin a, chu chuan School ṭan ni pawhin ngaih pawimawh a hlawh a, zirtirtute pawh a tiṭang hle an ti a, a lawmawm tak zet.
School Calendar-a lang leh a hun bituksa awm vek Exam hun erawh chuan tun thlengin ngaih pawimawh a la hlawh lo hle. Sawrkar School tam takah zirtirtuten chawlh neih rei an duh avangin exam hun an sawn hma fo ṭhin. Hei hi a Deptt. lam pawh hian an en zui lem lo em ni? a tih theih.
Sawrkar school tam takin exam hun an sawn hma laiin private school tam tak erawh chuan Exam hun ruahmansa pelin, Monthly Fee lak leh hram dan an ngaihtuah em ni? tih turin thla thar ni thum/ni li lekte an han kai hram ṭhin. Chu chuan monthly fee a nghawng ngei bawk ṭhin. Tun dinhmunah chuan sawrkar school aiin private (English Medium) ah hian zirlai an tam zawk a. Thla khat chhunga kan sum sèn hi a tam hle. Nu leh pa tam tak tan chuan monthly fee thla chanve han àwl pawh hi thil hlu tak a ni. Nu leh pate pawhin school calendar hi kan en chian ve fo a ṭha hle mai. School lamin chumi thleng kal tur, chumiah chuan result puan a, fee pek fel vek tur an tih pawha School Calendar ang a ni em? tih lo en nachang kan hriat a hun tawh hle.
Department lam pawhin an calendar siam hian zawm a hlawh em? tih hi tun ai hian han vil ngun deuh ta se, a zàwm lo an lo awm pawhin hma la ngam se a duhawm hle. Kan hma lawkah school naupang kum tawp Exam a ni dawn a, school calendar anga kal lo leh thuawih lo kan awm tawh lohna turin, Sawrkar hian na deuh hleka aw neih a ṭul hle mai.
- Tea Pa