Thuampui To Selesih Kawng Siam Hmanhmawh A Ngai
Tun hnaiah Bawngkawn to Durtlang inkar kawngpui hrul chhak lamah, In sakna tur ni awm tak hmun 3/4 laiah laih a ni a. He’ng zinga pakhat phei hi chu Petrol Pump hmun tur nia sawi a ni nghe nghe a. An hmun laih kopang sanzia te, a lei ngheh lohzia te, fur ruahtui tlak huna a min nasat theih turziate ngaihtuah hian, helaia ni tina kal ṭhinte leh veivak ṭhinte chu tun apangin an rilru a thlaphang nghal a ni tih hi a hriat. He’ng hmuna In sak phalna hi eng tin nge AMC hian a pek theih tih hi mi tam tak zawhna a ni nghal a. Kawng a tihkhuka kal vel a tihhrehawmzia te, nakina traffic jam a la siam nasat turziate ngaihtuah phei chuan, helai hmuna an hma lak mekna hi thuneituten an en ṭhat leh a ngai hle tih a lang reng a ni.
Nikum eng emaw ti lai khan Leitan thlen chhoh hmaah kawng chhak aṭanga lei tawlh chuan kawng a hnawh phui vek a. Helai pal tlanga kal ṭhin sawrkar hnathawk te, sumdawng leh ṭul hrang hrang avanga he kawng zawh ṭhinte leh, Durtlang-Kawnpui tlangdunga kalte tan namen lovin harsatna a siam a, buaithlak tak a ni.
Chutianga helai kawng hi hun eng emaw chen kal tlang theih a nih loh chhung khan, Ṭhuampui to Selesih kawngpui chu kalna awm chhun a ni ta a. Helai kawng hi a lo chhe em em mai si a. A hèlna kawng awm chhun a nih si avangin chhim leh hmar lam pana kalten an zawh lo thei ta si lo. Traffic Jam chu nasa tak a ni. Sawrkar hnathawk tam takin chhun dar l2 dawnah office an thleng a. Ṭhenkhat phei chu beidawngin an let leh a. Ṭhenkhat, damlo phur tan phei chuan manganthlak tak a ni. He thil thleng hian Ṭhuampui to Selesih kawng siam ṭhat a ṭulzia a tilang chiang hle.
A chunga kan sawi tak, Bawngkawn to Leitan inkara In hmun tur laih mekte hian hetiang harsatna hi an thlen leh lo vang tih a sawi theih ta lo va. Tun aṭangin an hna hi chawlhsan pawh ni se, fur a lo nih meuh chuan leimin eng emaw chen chu a siam ngeiin a rinawm. Hei bakah kawngpui diak leh nál nasa tak a siam ngei bawk ang. Vanneihthlak taka lei hi a min lo a nih pawhin, vanduaina mangkhawng chu a ni reng reng dawn a. Helai pal tlang ngam lo hi an tam ngawt ang le.
Chuvang chuan…
Sawrkar hian Ṭhuampui to Selesih kawng hi ṭhal khaw ṭhat lai hian siam ṭhat dan kawng a zawn ngei ngei hi a ngai a ni. Kan sawi angin furah leimin hi a awm ta lo hlauh a nih pawh a, hlauhthawnna avanga helai pal tlang ngam lote hian Ṭhuampui to Selesih kawnga kal duh zawk hi an tam dawn tih a chiang. Lei a min a, kawng a hnawh a nih vaih phei chuan, a hèlna kawng awm chhun hi namen lovin a lûn leh dawn a. Kawng a chhiat miau chuan Traffic Jam a nasa leh lo thei dawn lo a. Chuvang chuan, helai kawng hi a rang lama siam ni se a duhawm tak zet. A taka harsatna kan tawh hmaa a theih ang anga lo inbuatsaih lawk hi a finthlak tak zet dawn a ni.
- Chhuani Pa